1 Samuel 22 - MUMA MALER 2015

¹ Kuom mano, Daudi noringo modhi otony e rogo mar Adulam. Kane owetene kod joodgi duto owinjo wachno, ne gidhi ire kuno.

² Bende ji duto mane nigi chandruok moro amora, kaka gowi kata ng’ur, nochokore ire, ma dirom mia ang’wen, mi odoko jatendgi.

³ Daudi noa kanyo, modhi Mizpe e piny Moab. Nowacho ni ruodh Moab niya, “Akwayi, yie mondo wuora gi mama odag kodi, nyaka chop ang’e gima Nyasaye biro timona.”

⁴ Mi noweyogi e dala ruodh Moab, kendo ne gidak kanyo ndalo duto mane enie rogo.

Saulo onego jodolo mag Nob

⁵ Gad janabi nowacho ni Daudi niya, “Kik isik e rogo. Wuogi idhi e piny Juda.” Omiyo Daudi noa kanyo, modhi e bungu mar Hereth.

⁶ Saulo nowinjo ni osefweny kama Daudi gi joge opondoe. Noyudo ka Saulo ni Gibea, kobet piny e tiend yath moro mane ni ewi pith. Ne en gi tong’ e lwete, kendo joge duto nochung’ bute, kolwore.

⁷ Nowacho ni jogo niya, “Winjuru un jo-Benjamin, uparo ni wuod Jesse biro miyo ng’ato ka ng’ato puothe mag cham gi mag mzabibu koso? Koso uparo ni obiro ketou jotend ogend lweny madongo gi matindo?

⁸ Kara mano emomiyo uduto uriwona? Onge ng’ato kuomu mosenyisa ni wuoda notimo singruok gi wuod Jesse, bende onge ng’ato mane chunye okecha, kata mane onyisa ni wuoda nothuwo jatichna koda, mondo obutna, kaka otimo kawuononi.”

⁹ Eka Doeg ja-Edom, ma bende noyudo ochung’ gi jodong Saulo, nodwoke niya, “Naneno wuod Jesse kobiro Nob, ir Ahimelek wuod Ahitub.

¹⁰ Ahimelek nopenjone Ruoth Nyasaye wach, kendo nomiye chiemo kod ligangla mar Goliath ja-Filistia.”

¹¹ Eka ruoth nooro wach, moluongo Ahimelek jadolo, ma wuod Ahitub, kod joodgi duto, mane gin jodolo Nob, mi ne gibiro ire giduto.

¹² Saulo nowacho niya, “Koro winji, wuod Ahitub.” Ahimelek nodwoke niya, “Ruoth, awinjo.”

¹³ Saulo nopenje niya, “Marang’o uriwona gi wuod Jesse? Nimiye chiemo kod ligangla, kendo nipenjone Nyasaye wach. Mano omiyo koro osebalo koda, kendo osebutona tinendeni.”

¹⁴ Ahimelek nodwoko ruoth niya, “To kuom jotichni duto, ere ng’at ma jaadiera ma dirom gi Daudi ma ori, ma jatend joma riti, kendo momi duong’ e odi?

¹⁵ Kawuono eka achako penjone wach kuom Nyasaye koso? Ooyo, ok kamano! Kik ruoth jig wach kuoma, kata kuom joodwa duto, nimar nakiya wachno chuth.”

¹⁶ To ruoth nowachone niya, “Nyaka itho, Ahimelek, in gi joodu duto!”

¹⁷ Eka ruoth nowacho ni jorit ma nochung’ bute niya, “Dhiuru, uneg jodolo mag Ruoth Nyasaye, nikech gin bende giriwore gi Daudi. Ne ging’eyo ni oringo to ne ok ginyisa.” To jotich ruoth notamore nego jodolo mag Ruoth Nyasaye.

¹⁸ Omiyo ruoth nowacho ni Doeg ja-Edom niya, “In dhi ineg jodolo.” Mi Doeg nodhi momwomore kuom jodolo, kendo chieng’no nonego ji piero aboro gabich, mane joting’ law dolo miluongo ni efod.

¹⁹ Bende Doeg nomonjo Nob, dala jodolo, monego chwo gi mon, kod rawere gi nyithindo madhoth, kod dhok gi kenje gi rombe.

²⁰ To wuod Ahimelek achiel ma nyinge Abiathar, notony, moringo odhi ir Daudi,

²¹ kendo nonyise kaka Saulo osenego jodolo mag Ruoth Nyasaye.

²² Daudi nokone niya, “Kane aneno Doeg ja-Edom chieng’ cha, nang’eyo ni asekelo tho ni joodu duto.

²³ Bed koda ka, kendo kik iluor, nikech jal madwaro negino, ema dwaro nega an bende. To kibet koda, to nitony.”