1 Samuel 18 - MUMA MALER 2015

Jonathan gi Daudi jotimo singruok

¹ Kane Saulo otieko wuoyo gi Daudi,

² nokawe chieng’ono mi ok oyiene odog ka wuon mare, nikech noneno ka chuny Jonathan oriwore gi chuny Daudi, mohere mana kaka oherore owuon.

³ Jonathan gi Daudi ne joherore ahinya, omiyo ne gikuong’ore ni osiep manie kindgi ok norum.

⁴ Jonathan nolonyo nanga mane orwako, momiyo Daudi kaachiel gi liganglane gi atung’e kod okandane.

⁵ Daudi nolocho kuonde duto mane Saulo oree, omiyo Saulo nokete jatend jolweny. Wachno nodoko maber ni ji duto, kata mana ni jodong Saulo.

Nyiego omako Saulo gi Daudi

⁶ Kane Daudi dok dala koa nego ja-Filistia, mon nowuok e miech Israel duto, mondo orom ni ruoth Saulo. Ne giwero wende geto, kendo ne gimiel ka gigoyo thum gi bul.

⁷ Ne gimiel ka giolo wer niya, “Saulo onego ji gana, Daudi to onego ji gana gi gana.”

⁸ Wachno ne rach ni Saulo, omiyo mirima nomake ahinya. Nowacho niya, “Giketo ni Daudi ji gana gi gana, to an giketona mana gana kende. En ang’o machielo ma pod odongne, mak mana bedo ruoth?”

⁹ Chakre chieng’no Saulo ne ng’iyo Daudi gi wang’ marach.

¹⁰ Kinyne muya marach moa kuom Nyasaye nobiro gi teko kuom Saulo, mi nodhumore e ode, kendo Daudi nogoyone thum, kaka nojatimo. To Saulo ne nigi tong’ e lwete,

¹¹ mi nobayogo Daudi koparo ni mondo ochwowego oriwe gi kor ot, to Daudi noleng’o motony. Gima kama notimore diriyo.

¹² Noyudo ka Ruoth Nyasaye oseweyo Saulo, to koro ni kod Daudi, emomiyo Saulo noluoro Daudi.

¹³ Kuom mano, nogole bute mokete jatend jolweny alufu achiel. Daudi ne telo ni joge e lweny,

¹⁴ kendo nolocho kuonde duto modhiye, nikech Ruoth Nyasaye ne ni kode.

¹⁵ Kane Saulo oneno kaka Daudi dhi nyime maber, nomedo luore ahinya,

¹⁶ to jo-Israel gi jo-Juda duto nohero Daudi, nikech notelonigi e lweny.

¹⁷ Saulo nowacho ni Daudi niya, “Ineno Merab nyara maduong’ni? Abiro miyigo, ikende. To in nyaka ibed mathwon, kikedona lwenje gi wasik Ruoth Nyasaye.” To Saulo ne dwaro ni mondo jo-Filistia ema oneg Daudi, ma ok onege en owuon.

¹⁸ Daudi nodwoko Saulo niya, “An ng’a, koso anywolana en ang’o, kata joodwa gin ng’a gini e Israel, ma dahedhra bedo or ruoth?”

¹⁹ To kane ndalo ochopo ma Saulo onego chiwie Merab nyare ni Daudi, nochiwe mana ni Adriel ja-Mehola.

²⁰ To Mikal nyar Saulo nohero Daudi, kendo kane Saulo owinjo wachno, nodoko mamor.

²¹ Noparo ni komiyego, to obiro bedone obadho, mondo jo-Filistia onege. Omiyo Saulo nochako oparo ni mondo Daudi obed chwor nyare.

²² Kuom mano nochiko jotichne mondo owach ni Daudi ling’ling’ niya, “Ruoth mor kodi, kendo jotichne duto oheri. Omiyo koro mondo ibed or ruoth.”

²³ To kane jotich Saulo onyiso Daudi, nodwokogi niya, “Uparo ni bedo or ruoth en gima yot koso, ma ng’at ang’ata ma jachan ka an kama, nyalo mana bet?”

²⁴ Jotich Saulo noduogo ire, monyise gima Daudi owacho.

²⁵ Eka Saulo nowachonigi niya, “Wachuru ni Daudi ni ruoth ok dwar gima inywomone, to odwaro mana ringre jo-Filistia mia achiel, mondo ochulgo kuor ni wasike.” To Saulo noparo ni mano ema dimi Daudi tho e lwet jo-Filistia.

²⁶ Kane jotich Saulo onyiso Daudi wechego, Daudi ne mor gi bedo or ruoth.

²⁷ Omiyo nowuok gi joge ka ndalo moket pok ochopo, mi ne ginego jo-Filistia mia ariyo. Eka Daudi nokelo ringregi, mokwano ni ruoth mondo obed ore, mi Saulo nomiye Mikal nyare mondo obed chiege.

²⁸ To kane Saulo oneno malong’o kaka Ruoth Nyasaye ni kod Daudi, kendo kaka jo-Israel duto ohere,

²⁹ nomedo mana luore, mobedo jasike mochwere.

³⁰ E kinde ka kinde mane jotend lweny mag jo-Filistia odhi kedo gi jo-Israel, Daudi ne kedo matek, kendo nonego ji moloyo jolwenj Saulo moko duto. Omiyo nyinge noyudo pak maduong’.