1 Samuel 15 - MUMA MALER 2015

Saulo otamore winjo chik Nyasaye, mi Nyasaye odage

¹ Samuel nowacho ni Saulo niya, “Ruoth Nyasaye ne oora ni mondo awiri mo, ibed ruodh joge Israel. Emomiyo koro winj wachne.

² Ruoth Nyasaye Manyalo Gik Moko Duto owacho kama: ‘Anakum jo-Amalek kuom geng’o ni jo-Israel yo, kane gia Misri.

³ Koro dhiyo iked gi jo-Amalek, kendo iketh mwandugi duto chuth. Kik iwegi, to ineggi duto, chwo gi mon, rawere gi nyithindo madhoth, gi dhok gi rombe, kod ngamia gi kenje.’ ”

⁴ Omiyo Saulo noluongo jo-Israel Telaim. Nokwanogi, monwang’o ni gin jolweny alufu mia ariyo, kaachiel gi ji alufu apar moa Juda.

⁵ Eka nodhi e dala jo-Amalek, mobutonigi e holo.

⁶ To nowacho ni jo-Keni niya, “Un to, wuoguru ua kuom jo-Amalek, nimar dipo ka anegou kaachiel kodgi, to un nutimo maber ni jo-Israel kane giwuok gia Misri.” Kamano jo-Keni nowuok moa kuom jo-Amalek.

⁷ Eka Saulo nonego jo-Amalek, chakre Havila nyaka Shur, man yo wuok chieng’ mar Misri.

⁸ Agag, ruodh jo-Amalek, ema nomako kangima, to jomoko duto nonego pep.

⁹ Saulo gi joge noweyo Agag kangima, to bende ne ok giketho rombe gi dhok machwe gi nyirombe kod gik moko mabeyo. To gik moko maricho, ma onge ohala, ema ne giketho chuth.

¹⁰ Eka wach Ruoth Nyasaye nobiro ni Samuel niya,

¹¹ “Chunya olokore kuom keto Saulo ruoth, nimar osedok chien ma ok oluwa, kendo ok osetimo gima nachike.” Mirima nomako Samuel, moywak ni Ruoth Nyasaye otienono duto.

¹² Eka nochiew gokinyi mang’ich, modhi mondo one Saulo, to noyudo wach ni Saulo nende odhi Karmel, mochungo rapar mondo oparego, to bang’e ochweyo nyaka Gilgal.

¹³ Samuel nodhi ir Saulo, mi Saulo owachone niya, “Ruoth Nyasaye mondo oguedhi. Asetimo gima ne Ruoth Nyasaye ochika.”

¹⁴ To Samuel nopenje niya, “Ka kamano, to ere gimomiyo awinjo ywak rombe gi mar dhok?”

¹⁵ Nodwoke niya, “Gin rombe gi dhok mabeyo mag jo-Amalek, mane ji oweyo mak onego, mondo gitimgo misango ni Ruoth Nyasaye ma Nyasachi. To moko duto wasenego pep.”

¹⁶ Eka Samuel nowacho ni Saulo niya, “Ter mos, mondo anyisi gima Ruoth Nyasaye nende owachona gotienoni.” Saulo nodwoke ni, “Wachna.”

¹⁷ Samuel nowachone niya, “kata obedo ni in iwuon ineno ni itin, to oseketi jatend dhout Israel. Ruoth Nyasaye ne oyieri mondo ibed ruodh Israel.

¹⁸ Ne oori mondo idhi iked gi joricho ma jo-Amalek, kinegogi nyaka itiekgi chuth.

¹⁹ Koro marang’o ne ok iwinjo dwond Ruoth Nyasaye, mitimo gima rach e nyime, kimwomori, kendo ipeyo mwandu?”

²⁰ Saulo nodwoko Samwel niya, “Ooyo, asewinjo dwond Ruoth Nyasaye, kendo asetiyo tich mane Ruoth Nyasaye oorae. Asekelo Agag ruodh Amalek, kendo asetieko jo-Amalek chuth.

²¹ To ji ema nokawo rombe gi dhok mabeyo kuom mwandu mowe ni mondo okethi, mana ni mondo gitimgo misango ni Ruoth Nyasaye ma Nyasachi, Gilgal.”

²² To Samuel nopenje niya, “Iparo ni Ruoth Nyasaye ohero chiwo kod misengni moloyo mako chikene koso? Ooyo, mako chik ber moloyo misango, kendo chiko it ber moloyo boche imbe.

²³ Tamruok mako chik chalo gi tim jwok, kendo wichteko chalo gi tim mamono. Isedagi chik Ruoth Nyasaye, omiyo en bende osedagi ni kik ibed ruoth.”

²⁴ Saulo nowacho ni Samuel niya, “Aseketho, kaweyo luwo chik Ruoth Nyasaye kod wechene bende, nimar naluoro ji, kendo nawinjo dwondgi.

²⁵ Emomiyo koro asayi ni wena kethona, kendo lokri wadog kodi, mondo alam Ruoth Nyasaye.”

²⁶ To Samuel nodwoke niya, “Ok nadog kodi, nimar isedagi wach Ruoth Nyasaye, kendo Ruoth Nyasaye osedagi ni kik ibed ruodh Israel.”

²⁷ Kane Samuel olokore mondo odhi, Saulo nomako riak lawe, mi oyiech.

²⁸ Eka Samuel nokone niya, “Kawuono Ruoth Nyasaye oyiecho loch Israel kuomi, kendo omiyo ng’at machielo, maber moloyo.

²⁹ Bende Nyasaye ma en Duong’ Maler mar Israel ok riambi kata lokre, nimar ok en dhano ma dolokre.”

³⁰ Eka Saulo nowacho niya, “Aseketho, to kata kamano, asayi, miya duong’ kawuono e nyim jodong joga, kendo e nyim jo-Isarel. Wichri wadog kodi, mondo alam Ruoth Nyasaye ma Nyasachi.”

³¹ Kuom mano, Samuel nowichore, moluwo bang’ Saulo, kendo Saulo nolamo Nyasaye.

³² Samuel nowacho niya, “Kelnauru Agag, ruodh jo-Amalek.” Mi Agag nobiro ire gi mor, koparo ni koro ok obi tho.

³³ To Samuel nowachone niya, “Kaka liganglani osenego nyithind mon, e kaka meru bende nobed achiel kuom mon ma nyithindgi onegi!” Eka Samuel nonego Agag achanya achanya Gilgal e nyim Ruoth Nyasaye.

³⁴ Samuel nodok Rama, to Saulo bende nodok e dalane Gibea.

³⁵ Samuel nokuyo nikech Ruoth Nyasaye ne oneno ni kara ne ok ber mondo oket Saulo ruodh Israel. Nyaka chop tho Samuel ne ok ochako oneno Saulo kendo.