1 Samuel 14 - MUMA MALER 2015

¹ Chieng’ moro Jonathan wuod Saulo nowacho ni jating’ne gilweny niya, “Bi mondo waidh loka cha ir jolweny mag jo-Filistia.” To ne ok onyiso wuon mare wachno.

² Noyudo ka Saulo oguro hembe e tiend yath maduong’ man Migron e tong’ Gibea, kendo ji mane ni kode ne dirom mia auchiel.

³ Ahija wuod Ahitub, ma owadgi Ikabod, ma wuon Finehas, ma wuod Eli, jadolo mar Ruoth Nyasaye e Shilo, ema ne oting’o law dolo miluongo ni efod. To onge ng’ama nong’eyo ni Jonathan osedhi.

⁴ E hoho mar jolweny mag jo-Filistia, ne nitie lwendni ariyo mogingore e bathe koni gi koni. Nying lwanda mokwongo ne Bozez, to nying machielo ne Sene.

⁵ Lwanda achiel ne ni yo nyandwat, koma omanyore gi Mikmash, to machielo ne ni yo milambo, koma omanyore gi Geba.

⁶ Jonathan nowacho ni jating’ne gilweny niya, “Bi mondo waidh loka ir jolweny mag joma ok ter nyangugo. Dipo ka Ruoth Nyasaye okonyowa, nimar onge gima mono Ruoth Nyasaye resowa, kata ka wang’eny, kata ka wanok.”

⁷ Jating’ne gilweny nokone ni, “Tim duto manie chunyi, nikech abiro konyi e gimoro amora ma idwaro timo.”

⁸ Mi Jonathan nowacho niya, “Ber wadhi loka ir jogo mondo ginewa.

⁹ Kapo ni giwachonwa ni, ‘Ritwauru kanyo,’ to wanachung’ mana kanyo, mak wadhi irgi.

¹⁰ To ka giwacho ni wadhi irgi, eka wanadhi, kwang’eyo ni Ruoth Nyasaye osechiwogi e lwetwa. Mano ema nobednwa ranyisi.”

¹¹ Omiyo ne giwuok e lela, mondo jolweny mag jo-Filistia onegi. Jo-Filistiago nowacho ni, “Neuru! Jo-Hibrania wuok e buche ma yande gipondoe.”

¹² Ne giluongo Jonathan kod jatichne, ka giwacho niya, “Idhuru ubi ku, ubiro neno!” Jonathan nowacho ni jatichne niya, “Luw bang’a, nikech Ruoth Nyasaye osechiwogi e lwet jo-Israel.”

¹³ Jonathan noidho kalawore gi lwete, ka jatichne luwo bang’e. Eka nomonjo jo-Filistia, kogoyonigi piny, to jatichne negogi, ka luwo bang’e.

¹⁴ E lweny mokwongono, Jonathan gi jatichne nonego ji ma dirom piero ariyo, e pap matin mane gintieno.

¹⁵ Mi luoro maduong’ nolandore kuom jo-Filistia duto, mane nie paw lweny, kendo mane nie kambi. Jolweny ma jorit, kaachiel gi oganda mony bende nokirni, kendo piny noyiengni, mi kihondko malich nobetie.

¹⁶ Jorito mag Saulo mane ni Gibea noneno ka oganda lweny mag jo-Filistia ke, karingo koni gi koni.

¹⁷ Eka Saulo nowacho ni joma ne ni kode niya, “Kwanreuru, mondo une ane ng’ama onge kuomwa.” To kane gitieko kweno, ne ginwang’o ni Jonathan gi jating’ne gi lweny ema onge.

¹⁸ Saulo nowacho ni Ahija ni, “Kel Sanduk mar Nyasaye ka.” Ahija ema ne ting’o Sanduk ni jo-Israel ndalogo.

¹⁹ To kane Saulo pod wuoyo gi jadolo, mahu mane nie kambi jo-Filistia nomedore, omiyo nokwero jadolo mondo owe aweya.

²⁰ Eka Saulo gi joge duto nowuok mogiyo kadhi e lweny, kuma ne giyudoe ka jo-Filistia negore kendgi giwegi, achadha nono.

²¹ Jo-Hibrania mane ni kor jo-Filistia chon, kendo mane jot kodgi, nodok kor jo-Israel mane luwo Saulo gi Jonathan.

²² Bende kane jo-Israel duto mane osepondo e piny gode mag Efraim owinjo ni jo-Filistia ringo, ne gilawogi matek.

²³ Kamano Ruoth Nyasaye noreso jo-Israel chieng’no, kendo ne gikadho dala mar Bethaven, mana kapod gikedo.

²⁴ Jo-Israel nool ahinya chieng’no nikech Saulo nosekwerogi niya, “Okuong’ jalo mochamo gimoro kapok piny oyuso, kendo kapok atieko chulo kuor kuom wasikwa.” Kamano ne onge ng’ato kuomgi mane obilo gimoro.

²⁵ To noyudo ka ji duto ochopo e bungu kama mor kich ne chuerie piny.

²⁶ Kane gidonjo e bunguno, ne gineno mor kich ka ton, to onge ng’ato ma notero lwete e dhoge, nikech ne giluoro kuong’.

²⁷ To Jonathan ne ok owinjo ka wuon mare kwero ji gi kuong’. Emomiyo nochwowo pedni gi luth mane en go e lwete, moketo mor kich e dhoge, mi chunye nodwogo.

²⁸ Eka ng’at moro nowachone niya, “Wuoru nokwero ji matek gi kuong’ niya, ‘Okuong’ jalo machamo gimoro tinende.’ ” To noyudo nong’no koro ohewo ji ahinya,

²⁹ omiyo Jonathan nowacho niya, “Wuora osethago ji, kuom kwerogi kamano. Neuru kaka chunya koro oduogo. Mana nikech mor kich matin ma abiloni.

³⁰ Dobedo maber manade ka da ji ochamo chiemo mane giyako kuom wasikwa, mi da wanego jo-Filistia oyokre!”

³¹ Ne giloyo jo-Filistia chieng’no, mi gilawogi chakre Mikmash nyaka Aijalon. To kata kamano nong’no nohewo jo-Israel ahinya.

³² Omiyo ne gigore kuom gik mope, mi gikawo rombe gi ruedhi kod nyiroye, kendo ne ginegogi mana e lowo. Ne gichamogi kapod gitimo remo.

³³ Eka nonyis Saulo niya, “Ji ketho ni Ruoth Nyasaye, nikech gichamo ring’o motimo remo.” Saulo nowacho ni ji niya, “Usetimo marach, omiyo ng’ieluru kidi maduong’, ukelna ka.”

³⁴ Eka nomedo wacho niya, “Dhiuru kuom ji, ulandnigi wach ni ruoth wacho kama: ‘Ng’ato ka ng’ato mondo okelna rwadhe kata rombone mondo onegi kendo ocham ka. To kik uketh ni Ruoth Nyasaye, kuchamo ring’o motimo remo.’ ” Omiyo godhiambono, ng’ato ka ng’ato nokelo chiache monego kanyo.

³⁵ Mano emomiyo Saulo nogero ni Ruoth Nyasaye kendo-mar-misango. En e kendo-mar-misango mane okuongo gero ni Ruoth Nyasaye.

³⁶ Saulo nowacho ni ji niya, “Waloruru mondo wamonj jo-Filistia gotienoni, kendo wayakgi nyaka piny ru, bende kik wawe kata ng’at achiel dong’ kangima.” Mi ne gidwoke niya, “Tim gima ineno ni ber.” To jadolo nowacho ni, “Wapenjuru Nyasaye wach mondi.”

³⁷ Omiyo Saulo nopenjo Nyasaye wach niya, “Alaw jo Filistia koso? Bende ibiro chiwogi e lwet jo-Israel?” To ne ok odwoke gimoro chieng’ono.

³⁸ Mi Saulo nowacho ni jodonge niya, “Suduru machiegni, mondo unon kendo ufweny kuma kethoni oaye tinendeni.

³⁹ Gi nying Ruoth Nyasaye mareso Israel, kata dabed ni ng’at mokethono en mana Jonathan wuoda, to nyaka otho!” To onge kata ng’at achiel mane odwoke.

⁴⁰ Eka nowacho ni jo-Israel duto niya, “Un beduru bathe konchiel, to an gi Jonathan wuoda, wabed komachielo.” Mi ji duto nodwoko Saulo ni, “Tim gima ineno ni ber.”

⁴¹ Eka Saulo nowacho niya, “A Ruoth Nyasaye ma Nyasach Israel, ang’o momiyo ok isedwokowa tinendeni? A Ruoth Nyasaye ma Nyasach Israel, ka ketho ni kuoma, kata kuom Jonathan wuoda, to chiw ombulu miluongo ni Urim. To ka en kuom jogi Israel, to chiw ombulu miluongo ni Thumim.” Mi Saulo gi Jonathan ema noyier, to jo-Israel nowe.

⁴² Eka Saulo nowacho niya, “Go ombulu e kindwa gi Jonathan wuoda.” Mi ombulu nolwar kuom Jonathan.

⁴³ Saulo nowacho ni Jonathan niya, “Nyisa gima isetimo.” Mi Jonathan nonyise ni, “Adier, nabilo mor kich matin gi luth mane nie lweta. Era e, ayie tho.”

⁴⁴ Saulo nowacho niya, “Nyasaye mondo okweda ka ok itho. Jonathan, in nyaka itho!”

⁴⁵ To ji duto nowacho ni Saulo niya, “Bende Jonathan nyalo tho adier, to en ema osekelo konyruok maduong’ kama e Israel? Ngang’! Gi nying Ruoth Nyasaye, kata mana yie wiye achiel ok nolwar piny, nikech Nyasaye ema osekonye timo tich mosetimo kawuononi.” Kamano ji nowaro Jonathan mondo kik tho.

⁴⁶ Eka Saulo noweyo lawo jo-Filistia, nikech ne gisedok thurgi.

⁴⁷ Kane Saulo obedo ruodh Israel, nokedo gi wasike duto koni gi koni, moloyogi kuonde duto modhiye. Ne gin jo-Moab, gi jo-Amon, gi jo-Edom, gi ruodhi mag Zoba, kod jo-Filistia.

⁴⁸ Notimo chir, mi noloyo jo-Amalek bende, kendo noreso jo-Israel e lwet joma ne monjogi.

⁴⁹ Yawuot Saulo ne Jonathan gi Ishfi kod Malkishua, to nyige ne Merab, nyare maduong’ gi Mikal nyare matin.

⁵⁰ Nying chi Saulo ne Ahinoam nyar Ahimaaz. To nying jatend jolwenje ne Abner wuod Ner, owadgi wuon Saulo.

⁵¹ Kish wuon Saulo, kod Ner wuon Abner, ne yawuot Abiel.

⁵² Ne nitie lweny mager e kind jo-Israel gi jo-Filistia kuom ndalo duto mag ngima Saulo. Omiyo kane oneno ng’at moro maratego, kata mathwon, to nokete achiel kuom jolwenje.