1 Samuel 13 - MUMA MALER 2015

Lweny e kind jo-Israel gi jo-Filistia

² Saulo noyiero ji alufu adek kuom jo-Israel, mondo ji alufu ariyo kuomgi obed kode Mikmash, kendo e piny gode mag Bethel, to alufu achiel obed gi Jonathan wuode, Gibea, dala jo-Benjamin. Ji moko duto to noweyo, modok miechgi.

³ Jonathan nonego jatend jolweny mag jo-Filistia mane ni Geba, mi jo-Filistia nowinjo ni jo-Hibrania oseng’anyo. Saulo nogoyo tung’ e piny Israel,

⁴ mi jo-Israel duto nowinjo ni Saulo osenego jatend jolweny mag jo-Filistia, kendo ni jo-Filistia ojok kodgi. Omiyo ne giwakore ir Saulo, mane oyudo ni Gilgal.

⁵ Jo-Filistia nochokore mondo oked gi jo-Israel. Ne gin gi geche alufu piero adek, gi joidh farese alufu auchiel, kod ji mathoth ka kuoyo mae dhonam. Ne gidhi Mishmash, mi gijot kuno, yo wuokchieng’ mar Bethaven.

⁶ To kane jo-Israel oneno ka wach otamo wang’gi, nikech nothung’gi ahinya, ne gipondo kamoro amora mane ginyalo tonyie, kaka buche gi bunge gi bugni kod sokni, kendo e kind lwendni.

⁷ Jomoko kuomgi nokadho aora Jordan nyaka piny Gad gi Gilead. Saulo to ne pod odong’ Gilgal, kendo ji duto mane ni kode ne luoro omako.

⁸ Saulo norito kuom ndalo abiriyo, kaka Samuel nosechike, to ka ne ji oneno ni Samuel ok obiro, ne gichako ke, ka gia kuom Saulo.

⁹ Omiyo Saulo nowacho niya, “Kelnauru dhok mitimogo misango miwang’o pep, kod misengni mag sawo.”

¹⁰ To e sa mane otieko timoe misango miwang’o pep ema Samuel nobiroe, mi Saulo nowuok mondo oromne, kendo omose.

¹¹ Samuel nopenje niya, “En ang’o misetimoni?” Saulo nodwoke niya, “Naneno ka ji ke a kuoma, to bende in ne ok ibiro kaka ne ichiko, kendo jo-Filistia chokore Mikmash.

¹² Emomiyo naparo ni koro jo-Filistia biro biro monja Gilgal, ka pok akwayo Ruoth Nyasaye mondo okonya. Kuom mano, nochuna timo misango.”

¹³ Samuel nowacho ni Saulo niya, “Itimo tim mofuwo. Ok iserito chik mane Ruorh Nyasaye omiyi. Da bed ni iserito chikne, to da oguro lochni e Israel nyaka chieng’.

¹⁴ To koro lochni ok nosiki. Ruoth Nyasaye osedwaro ng’at ma chunye mor godo, kendo osekete mondo obed jatend joge, nikech ne ok irito gima ne Ruoth Nyasaye ochiki.”

¹⁵ Eka Samuel noa Gilgal, modhi adhiya. Saulo bende noa kuno, mowuotho kochomo kambi mar lweny, ka ji duto modong’ luwo bang’e. Kane ochopo Gibea, dala jo-Benjamin, nokwano joma ne ni kode, monwang’o ni gin ji ma dirom mia auchiel.

¹⁶ Saulo gi Jonathan wuode, kod joma ne en go, nobet Geba, dala jo-Benjamin, to jo-Filistia ne pod jot Mikmash.

¹⁷ Ogendni adek mag mony ne thoro wuok e kambi jo-Filistia. Oganda achiel ne luwo yo madhi Ofra e piny Shual,

¹⁸ to oganda machielo ne luwo yo madhi Beth-horon, kendo oganda mar adek ne luwo yo mochiko gode, momanyore gi holo mar Zeboim gi thim.

¹⁹ Ne ok nyal yud jatheth e piny Israel duto, nikech jo-Filistia ne ok oyie mondo jo-Hibrania othedh ligengni kata tonge.

²⁰ To jo-Isreal duto ne dhi ir jo-Filistia mondo ng’ato ka ng’ato opiag kweye gi leye gi ratonge kod bithe.

²¹ Nengo mar piago kwer kata le ne en nus shekel, to mar ratong’ kata bidhi ne en achiel kuom adek mar shekel.

²² Omiyo kane ndalo mar lweny ochopo, ne ok nyal yud ligangla kata tong’ e lwet ji duto mane ni kod Saulo gi Jonathan, to mak mana Saulo gi Jonathan kende ema ne nigi gilweny.

²³ Noyudo jo-Filistia oseketo jolweny e holo mar Mikmash.