1 Samuel 11 - MUMA MALER 2015

Saulo oloyo jo-Amon e lweny

¹ Bang’ due achiel, Nahash ja-Amon nodhi molworo Jabesh-gilead mondo okaw. Omiyo jo-Jabesh duto nowacho ni Nahish niya, “Tim kodwa winjruok, mondo wabed jogi.”

² To Nahash ja-Amon nodwokogi niya, “Ok ayie timo kodu winjruok, mak mana ka agolo wengeu ma korachwich mondo akuodgo wi jo-Israel duto.”

³ Jodong Jabesh nowachone niya, “Wenwa kinde kuom ndalo abiriyo, mondo waor joote e piny Israel duto. Bang’ mano, ka joma resowa onge, eka wanachiwre e lweti.”

⁴ Kane jootego obiro Gibea, dalagi Saulo, ne ginyiso ji wachno, mi ji duto nochako ywak.

⁵ Noyudo ka Saulo donjo e dala koa puodho, ka sembo dho pur, mi kane owinjo ywak, nopenjo gima ji ywago. Eka ne ginyise wach jo-Jabesh.

⁶ Kane Saulo owinjo wachno, Much Nyasaye nobiro kuome gi teko, kendo mirima nomake ahinya.

⁷ Nonego dho pur ariyo, mopogo lemo lemo. Eka nomiyogi joote, moterogi e piny Israel duto, kowacho niya, “Ng’at modagi wuok bang’ Saulo, kendo bang’ Samuel noneg dhoge mana kama.” Luoro moa kuom Ruoth Nyasaye nomako ji, mi ne giwuok giduto gi chuny achiel.

⁸ Saulo nochanogi Bezek, moyudo ni jo-Israel oromo ji alufu mia adek, to jo-Juda alufu piero adek.

⁹ Eka nowacho ni joote mane obiro niya, “Wachuru ni jo-Jabesh-gilead ni kiny gonyango giniyud konyruok.” Kane jootego odok, monyiso jo-Jabesh kamano, ne gidoko mamor,

¹⁰ mi giwacho ni jo-Amon niya, “Kiny wanawuognu, mondo utimnwa gima uhero.”

¹¹ Kinyne Saulo nopogo joge e migepe adek. Ne gimwomore e kambi jo-Amon kogwen, mi ginegogi nyaka chieng’ otegno. Jo-Amon mane odong’ noke, mane ok nyal nwang’ kata ji ariyo kaachiel.

¹² Eka jo-Israel nowacho ni Samuel niya, “Ng’a gini mane odagi ni Saulo kik bed ruodhwa? Kelgiuru mondo waneggi.”

¹³ To Saulo nowacho niya, “Kawuono ok nyal neg ng’ato, nikech tinendeni ema Nyasaye oresoe jo-Israel.”

¹⁴ Bang’e Samuel nowacho ni ji niya, “Wadhiuru Gilgal, mondo wagur ruoth e loch kuno.”

¹⁵ Kamano ji duto nodhi Gilgal, kendo ne giketo Saulo ruoth e nyim Ruoth Nyasaye kuno. Ne gitimo ni Ruoth Nyasaye misengni mag sawo, kendo Saulo kod jo-Israel duto nobedo mamor ahinya.