1 Samuel 10 - MUMA MALER 2015

¹ Samuel nokawo tung’ mar mo, moolo ewi Saulo. Nonyodhe, mowachone niya, “Ruoth Nyasaye osewiri gi mo mondo ibed ruodh joge Israel. Initel ni jo-Ruoth Nyasaye, kendo iniresgi e lwet wasikgi molworogi. To gima biro bedoni ranyisi ni Ruoth Nyasaye oseyieri mondo ibed ruodh joge ema:

² Ka isea kuoma kawuono, to ibiro yudo ji ariyo Zelza e piny Benjamin, but liend Rahel. Ginikoni niya, ‘Kenje mane idhi dwaro oseyudi. Koro wuoru oweyo paro kenje to oparo mana in, kowacho niya, “Atim ang’o, ka koro wuoda olal?” ’

³ Bang’ mano, inichop e yath maduong’ man Tabor, kama iniromie gi ji adek ma dhi lamo Nyasaye, ka achiel kuomgi oting’o nyidiek adek, to machielo oting’o makati adek, kendo moro oting’o ndede mar divai.

⁴ Ginimosi, kendo ginimiyi makati ariyo, mi inikaw e lwetgi.

⁵ Bang’ mano, kichopo e Gibea-elohim, kama jolweny mag jo-Filistia nitie, to inirom gi oganda jonabi, kalor a e hembko, ka joma goyo thumbe gi nyigwerni kod asili, otelonigi, kendo iniyud ka gidhumore.

⁶ Much Ruoth Nyasaye nobi kuomi gi teko, mi inidhumri kaachiel kodgi, kendo inilokri ng’at moro machielo.

⁷ Ka ranyisigo otimoreni, to tim gima ineno ni ber, nikech Nyasaye ni kodi.

⁸ Tel nyima kilor nyaka Gilgal, to anabi iri mondo atim misengni miwang’o pep, kod mag sawo. Rita kuom ndalo abiriyo, eka nabi iri mondo anyisi gima onego itim.”

⁹ Kane Saulo pod loko ng’eye a ir Samuel, Nyasaye nomiye chuny manyien, kendo ranyisigo duto notimore chieng’no.

¹⁰ Kane gichopo Gibea, oganda jonabi noromo kode, kendo much Nyasaye nobiro kuome gi teko, mi en bende nodhumore kodgi.

¹¹ Kane ji duto mong’eye oneno kaka odhumore kod jonabi ne gipenjore niya, “En ang’o mosetimore ni wuod Kishni? Kara Saulo bende en achiel kuom jonabi?”

¹² To ng’at moro ma ja gweng’no nopenjo niya, “Gin yawuot ng’a?” Mano e chakruok ngero, mawachore ni, “Kara Saulo bende en achiel kuom jonabi?”

¹³ Kane Saulo osetieko dhumore, nodok dala.

¹⁴ Wuon Saulo matin nopenjo Saulo kod jotichne niya, “Ne udhi kanye?” Nodwoke niya, “Ne wadhi dwaro kenje, to kane waneno ni ok wanyal yudogi, ne wadhi ir Samuel.”

¹⁵ Wuon Saulo matin nomedo penje ni, “Kiyie, nyisa gima Samuel nowachoni.”

¹⁶ Saulo nodwoke niya, “Nonyisowa ratiro kenje oseyudi.” To wach bedo ruoth mane Samuel owachone, to ne ok onyise.

¹⁷ Samuel nochoko jo-Israel Mizpa e nyim Ruoth Nyasaye,

¹⁸ mowachonigi niya, “Ruoth Nyasaye ma Nyasach Israel, owacho kama: ‘Ne agolou Misri, maresou e lwet jopinyno, kendo e teko mar pinje duto mane othirou’

¹⁹ To un koro usedagi Nyasachu, ma noresou e masicheu, kod chandruoku duto, kendo usekwaye mondo oketnu ruoth. Emomiyo koro chung’uru e nyim Ruoth Nyasaye, kuchanoru e libembni mau, kendo e dhoutu.”

²⁰ Eka Samuel nokelo libembni duto mag Israel machiegni, to libamba mar Benjamin ema ne ombulu okwanyo.

²¹ Mi nokelo libamba mar Benjamin machiegni, dhoot ka dhoot, kendo dhood Matri ema noyier. Eka nokelo dhood Matri machiegni, ng’ato ka ng’ato, kendo Saulo wuod Kish ema ombulu nolwar kuome. To kane gidware, ne ok ginyal nwang’e.

²² Emomiyo ne gichako gipenjo Ruoth Nyasaye wach niya, “Ng’atno osebiro ka koso?” Ruoth Nyasaye nodwokogi ni, “Ero opondo e kind misike.”

²³ Mi ne giringo giome kuno. Ne orabora ahinya, ma kochung’ e dier ji, to giduto girem mana e goke.

²⁴ Samuel nowacho ni ji duto niya, “Neuru jal ma Ruoth Nyasaye oyiero. Onge ng’at machal kode kuomu duto.” Mi ji duto nokok kawacho niya, “Ruoth mondo odag aming’a!”

²⁵ Eka Samuel nonyiso ji kaka tich ruoth chalo,, kendo nondiko wachno e kitabu, mi okano e nyim Ruoth Nyasaye. Bang’e nomiyo ji thuolo mondo ng’ato ka ng’ato odog dalane.

²⁶ Saulo bende nodhi dalagi Gibea, kendo thuondi moko ma Nyasaye omulo chunygi, nodhi kode.

²⁷ To jomoko ma acheje nowacho niya, “Ere kaka jali dikonywa?” Ne gichaye, mi ne ok gikelone mich.