1 Samuel 1 - MUMA MALER 2015

Nywol mar Samuel

¹ Ne nitie ja-Ramathaim moro, ma ja-Zuf, mane odak e piny gode mag Efraim. Nyinge ne Elkana wuod Jeroham, wuod Elihu, wuod Tohu, wuod Zuf ma ja-Efraim.

² Ne en gi mon ariyo, ma nyinggi Hana gi Penina. Penina ne nigi nyithindo, to Hana ne ongego.

³ Higa ka higa, ng’atni ne wuok e dalane, kadhi Shilo mondo olem kendo otim misango ni Ruoth Nyasaye Manyalo Gik Moko Duto. E ndalogo, noyudo ka Hofni gi Finehas, yawuot Eli, ne tiyo kuno ka jodolo mag Ruoth Nyasaye.

⁴ Kane Elkana timo misango, nopogo migepe mag ring misango ni chiege ma Penina kod yawuote gi nyige duto.

⁵ Nohero Hana, to kata kamano nomiye mana migawo achiel, nimar Ruoth Nyasaye ne ok omiye nyathi.

⁶ Nyiek Hana ne chando chuny Hana malit, konyiere nikech Ruoth Nyasaye ok omiye nyathi.

⁷ Wachni ne timore higa ka higa. Kane odhi e Od Ruoth Nyasaye, nyieke nosiko ka chande, omiyo noywak, kendo nokuno chiemo.

⁸ Chieng moro, Elkana chwore nopenje niya, “Hana, ang’o momiyo chunyi lit, kendo iywak kamano, ma ok inyal kata chiemo? Donge aberni moloyo yawuowi apar?”

⁹ Kane gisetieko chiemo kod metho e sawo mane ni Shilo, Hana noa malo modhi ochung’ e nyim Ruoth Nyasaye. To noyudo ka Eli jadolo obet e kome but dhood Hekalu mar Ruoth Nyasaye.

¹⁰ Chuny Hana ne chandore, kendo nolamo Ruoth Nyasaye, koywakne malit.

¹¹ Nokuong’ore kowacho niya, “A Ruoth Nyasaye Manyalo Gik Moko Duto, ka inine chandruokna, kendo ipara an jatichni, ma ok wiyi owil koda, mi imiya nyathi ma wuowi, to anachiwnigo, mondo obed mari ndalo duto mag ngimane, kendo mirich ok noka wiye.”

¹² Kane Hana pod lemo e nyim Ruoth Nyasaye kamano Eli to ne ng’iyo dhoge.

¹³ Hana ne lemo gi chunye. Kata obedo ni dwonde ne ok winji, to dhoge ne diemore, omiyo Eli ne paro ni omer,

¹⁴ mopenje niya, “Inimer nyaka karang’o? Kuer kong’o!”

¹⁵ Hana nodwoke niya, “Ooyo jaduong’, an mana dhako ma chunye chandore. Ok asemadho kong’o kata gimoro ma nyalo mero ji, to achiwo chunya ni Ruoth Nyasaye.

¹⁶ Kik ikawa ka dhako machach. Ywagruok gi kuyo mogundho ema omiyo asewuoyo kamano kindeni duto.”

¹⁷ Eli nodwoke niya, “Dhiyo gi kue, kendo Nyasach Israel mondo omiyi gima isekwaye.”

¹⁸ Hana nowachone niya, “Mad abed ng’ama owinjore gi ng’wononi.” Eka nodhi mochiemo, ka chunye ler.

¹⁹ Ne gichiew gokinyi mang’ich, kendo kane giselemo e nyim Ruoth Nyasaye, ne gidok dalagi Rama. Elkana noriwore gi chiege ma Hana, mi Ruoth Nyasaye noparo Hana.

²⁰ Nomako ich, kendo kane ndalo ogik, nonywolo wuowi, mi owacho niya, “Achake ni Samuel, nikech ne akwaye Ruoth Nyasaye.”

²¹ Kane ndalo ochopo, Elkana gi joode duto nodhi timo ni Ruoth Nyasaye misango mar higa ka higa, kendo chopo singruokne.

²² Hana to ne ok odhi, to nowacho ni chwore niya, “Ok nadhi nyaka nyathi we dhoth, eka natere e nyim Ruoth Nyasaye, mi nosik kuno.”

²³ Elkana chwore nokone niya, “Tim gima ineno ni ber. Rit nyaka nyathi we dhoth. To Ruoth Nyasaye mondo one ni ichopo singruokni.” Kamano Hana nodong’, kadhodho nyathine nyaka we dhoth.

²⁴ Kane nyathi oseweyo dhoth, nodhi kode Shilo gi rwath ma hike adek, gi mogo ma dirom depe ariyo, gi divai e ndede mar pien, modonjo e od Ruoth Nyasaye.

²⁵ Ne ginego rwadhno, eka Hana nokelo nyathi ir Eli,

²⁶ mowacho niya, “A jaduong’, an e dhako mane ochung’ kalamo Ruoth Nyasaye cha.

²⁷ Ne akwaye nyathini, kendo koro osemiyago kaka nakwaye.

²⁸ Emomiyo an bende achiwe ni Ruoth Nyasaye, mondo obed jatichne ndalo duto mag ngimane.”