1 Ruodhi 9 - MUMA MALER 2015

Nyasaye ochako ofwenyore ni Solomon

¹ Kane Solomon osetieko gero Od Ruoth Nyasaye, gi ode owuon, kod udi duto mane odwaro gero,

² Nyasaye nofwenyorene kendo, kaka nofwenyorene mokwongo e dala Gibeon.

³ Nowachone niya, “Asewinjo lemoni kod kwayoni, mi asegwedho Hekalu misegeronani. Aketo nyinga kanyo mochwere, kendo wengena kod chunya nobedie nyaka chieng’.

⁴ To in, kiwuotho e nyima gi chuny makare kod bidhruok, kitimo duto masechiki, kendo kimako chikena gi buchena kaka Daudi wuoru notimo,

⁵ eka anagur loch mar nyikwayi e Israel nyaka chieng’ mana kaka nasingora ni Daudi wuoru, ka awachone ni, ‘Ndalo duto, nyikwayi nobed ruodhi mag Israel.’

⁶ To ka un kata nyithindu, ulokoru muweyo luwa, ka ok umako wechena gi chikena mane aketo e nyimu, mudhi tiyo ni nyiseche mamoko, kendo lamogi,

⁷ to anagol jo-Israel e piny mane amiyogi, kendo Hekalu masewalo ni nyingani naketh, mondo olal e wang’a, mi nying Israel nolok ka ngero, kendo gima ji duto jaro.

⁸ To bende Hekaluni nodong’ gunda, kendo ji duto ma kadho bute nowuor kendo nohum, ka gipenjo niya, ‘Ang’o momiyo Ruoth Nyasaye osetimo gima kama ni pinyni gi Hekaluni?’

⁹ Eka nodwokgi niya, ‘Ne giweyo Ruoth Nyasaye ma Nyasachgi, mane ogolo kweregi e piny Misri, mi ne gilamo nyiseche mamoko, kendo gitiyonigi. Emomiyo Ruoth Nyasaye osekelo masichegi duto kuomgi.’ ”

Gik mamoko ma Solomon otimo

¹⁰ Kane higni piero ariyo mane Solomon ogeroe Od Ruoth Nyasaye gi ode owuon oserumo,

¹¹ nomiyo Hiram mier piero ariyo e piny Galili. (Hiram ruodh Turo nosemiyo Solomon bap sida gi bap saipras kod dhahabu kaka nodwaro.)

¹² To kane Hiram oa Turo mondo odhi one mier mane Solomon omiye, ne ok oherogi.

¹³ Omiyo nowacho niya, “Owadwa, imiya mier machal nadi?” Emomiyo nochako gweng’no ni ‘piny Kabul’ (tiende ni, piny motimo ongoro.) Pod iluonge kamano nyaka chil kawuono.

¹⁴ Hiram nokowo ni Ruoth Solomon dhahabu moromo kilo alufu ang’wen.

¹⁵ Tije mane ruoth Solomon otiyo gi joma nichuno mondo oti gi thwon e magi: nogero Od Ruoth Nyasaye, gi ode owuon, gi Milo, kod ohinga mar Gezer, gi Hazor, gi Megido kod Gezer.

¹⁶ (Noyudo ka Farao ruodh Misri osedhi, mokawo Gezer, mowang’o gi mach, kendo nosenego jo-Kanaan modak kanyo, mi dalano nomiyo nyare ma chi Solomon kaka chiwo mar kopo.

¹⁷ Mano emomiyo Solomon nochako gero Gezer kendo.) Bende nogero Beth-horon ma Mwalo,

¹⁸ gi Baalath, gi Tamar manie thim e piny Juda,

¹⁹ kod mier duto mag keno mane en go, gi mier mokanoe gechene mag lweny, kod miech joge ma joidh farese,. Bende Solomon nogero udi e Jerusalem, kod Lebanon, kendo e pinye duto, kaka nodwaro.

²⁰ Ji duto ma nodong’ e piny Israel kuom jo-Amor, gi jo-Hiti, gi-jo-Perizi, gi jo-Hivi, kod jo-Jebus, ma ok jo-Israel,

²¹ Solomon noloko wasumbni mochuno mondo oti gi thwon, kaka obet nyaka chil kawuono. Ne gin joma notamo jo-Israel tieko chuth.

²² Solomon ne ok oloko jo-Israel wasumbni to noketogi jolweny, gi jobura, gi jodong lweny, gi jotend joidh gechene kod joidh faresene.

²³ Ne en gi jotelo madongo mia abich gi piero abich mane rito jotichne.

²⁴ Nyar Farao noa e dala Daudi, modhi e ode mane Solomon osegerone, eka Solomon nogero Milo.

²⁵ Didek e higa, Solomonn ne timo misengni miwang’o pep, gi mag sawo e kendo-mar-misango ma nogero ni Ruoth Nyasaye, kowang’o ubani e nyim Ruoth Nyasaye. Kamano nochopo singruokne.

²⁶ Ruoth Solomon nohondho yiedhi moko Ezion-geber but Eloth e dho wadh Nam Makwar e piny Edom.

²⁷ Eka Hiram nooro jokwang’ molony kuom tich nam mondo oti e yiedhigo kaachiel gi jotich Solomon.

²⁸ Ne gidhi Ofir, kuma ne giomoe dhahabu moromo kilo alufu apar gang’wen, mi ne gikelo ni ruoth Solomon.