1 Ruodhi 6 - MUMA MALER 2015

Solomon ogero Hekalu mar Nyasaye

¹ E higa mar mia ang’wen gi piero aboro bang’ wuok jo-Israel Misri, kane Solomon osebet ruodh Israel higni ang’wen, nochako gero Hekalu mar Ruoth Nyasaye, e due mar ariyo miluongo ni Zif.

² Bor mar Hekalu mane ogero ni Ruoth Nyasaye noromo mita piero adek, lachne mita apar, to borne modhi malo mita apar gabich.

³ Bor mar agola mane ni e nyim Kama Ler mar Hekalu noromo mita apar, maromre gi lach Hekalu, to lach agolano, koa e nyim Hekalu, noromo mita abich.

⁴ Noloso ni Hekalu dirise mogaji,

⁵ kendo nogero udi moko momakore gi kor Hekalu gi oko. Udigo noluoro Kama Ler, kaachiel gi Kama Ler Moloyo.

⁶ Udigo ne oluwo gorofa adek, kendo lach mar udi mapiny noromo mita ariyo gi nus, to lach mar udi ma diere ne mita adek, kendo lach mar udi mamalo ne mita adek gi nus, nikech ne gisweko kor ot mondo yiend arip kik pow.

⁷ Noger Hekalu gi kite mane opa kuma nikunyogie, mondo koko mar nyundo kata mar le kata mar gir tich moro mar nyinyo kik winji e Hekalu, kapod igere.

⁸ Dhoot midonjogo e udi mapiny ne nie bat korachwich mar Hekalu, to raidhi nochopo e udi madiere nyaka gorofa mar adek.

⁹ Kamano Solomon nogero Hekalu, motieko, kendo nochwade gi sida.

¹⁰ Eka nogero udi molworo Hekalu duto. Bepe mag sida ema noriwo kor udigo gi Hekalu, kendo bor modhi malo mar gorofa ka gorofa noromo mita ariyo gi nus.

¹¹ Wach Ruoth Nyasaye nofwenyore ni Solomon niya,

¹² “Kuom wach Hekalu migeroni, ka inirit chikena duto, kendo iluwgi maber, to anachop gima nawacho ni Daudi wuoru kuomi.

¹³ Anadag kod joga Israel, mak aweyogi ngang’.”

¹⁴ Kamano Solomon nogero Hekalu, motieko.

¹⁵ Nochwado kor ot gi yo ka iye gi bap sida, chakre tiend ot nyaka yiend tado, to noloso dier ot gi yiend saipras.

¹⁶ Mita apar ma iye nong’ado gi bap sida, chakre tiend ot nyaka yiend tado mondo obed ot maler maiye, miluongo ni Kama Ler Moloyo.

¹⁷ To bor mar ot modong’, mane nie nyim ot maler ma iye, moromo mita piero ariyo.

¹⁸ Bap sida mane nie Hekalu nopa machal gi budho kod thiepe. Ne en bap sida lilo, ma kata kidi moro ne ok nen.

¹⁹ Ei Hekalu nolosoe ot maler ma iye, mondo oketie Sandug Muma mar Ruoth Nyasaye.

²⁰ Ot ma iyeno, borne gi lachne kod borne modhi malo noromo mita apar, kendo Solomon nobawe gi dhahabu maler. To bende noloso kendo-mar-misango gi bap sida.

²¹ Nobawo ii Hekalu gi dhahabu maler, kendo noriwo thiwini mag dhahabu e nyim ot maler ma iye. Odno bende nobawo gi dhahabu.

²² Kamano nobawo ot duto gi dhahabu, kaachiel gi kendo-mar-misango mane nie ot ma iye.

²³ Ei ot maler maiye noketoe kido ariyo molos gi bap zeituni maket gi malaika miluongo ni kerubi, ma moro ka moro borne noromo mita abich.

²⁴ Buomb kerubi konchiel noromo mita ariyo gi nus, to komachielo bende kamano. Kamano bor buombe duto korie noromo mita abich.

²⁵ Pim mar kerubi machielo bende noromo mita abich. Duong’ kod kido mar kerubi ariyogo ne chalre chuth,

²⁶ kendo bor modhi malo mar moro ka moro noromo mita abich.

²⁷ Noketo kerubigo e dier ot maler maiye, ka buombegi oyarore. Buomb kerubi achiel nogik e kor ot koni, kendo buomb kerubi machielo nogik e kor ot kocha, to buombegi madiere noromo e dier ot tir.

²⁸ Solomon nobawo kerubigo bende gi dhahabu.

²⁹ Kor ot duto, ma iye gi maoko nopayoe kido mag kerubi gi mag yiend othidhe kod thiepe moyarore,

³⁰ kendo dier udi maiye gi maoko noumo gi dhahabu.

³¹ Dhoot midonjogo e ot maiye noloso gi bepe abich mag zeituni;

³² thikene ariyo nopayoe kido mag kerubi gi mag yiend othidhe kod thiepe moyarore, kendo thikego kaachiel gi kerubi kod yien-go nobawo gi dhahabu.

³³ Kamano bende noloso sich dhood Hekalu gi bepe ang’wen mag zeituni,

³⁴ to thikene ariyo noloso gi bap saipras, ma moro ka moro nibano diriyo kiyawo.

³⁵ Thikego bende nopayoe kido mag kerubi gi mag yiend othidhe kod thiepe moyarore, kendo nobawo gik mopago gi dhahabu maromre chuth.

³⁶ Laro maiye nochielo gi ohinga moger gi kite mopa, moluow didek, kaachiel gi laini achiel mar bap sida.

³⁷ Mise mar Od Ruoth Nyasaye noket e higa mar ang’wen mar loch Solomon, e due miluongo ni Zif.

³⁸ To e higa mar apar gachiel, e due mar aboro miluongo ni Bul, Hekalu norumo chuth, kaka nosechan ni onego gere. Kamano Solomon notieko higni abiriyo kagero Hekalu.