1 Ruodhi 5 - MUMA MALER 2015

Solomon otimo winjruok gi Hiram ruodh Turo (2 Weche mag Ndalo 2.1-18)

¹ Kane Hiram ruodh Turo owinjo ni Solomon osewir, moket ruoth kar Daudi wuon mare, nooro joote ire, nikech yande ne ohero Daudi.

² Eka Solomon nooro ni Hiram wach niya,

³ “Ing’eyo ni Daudi wuora ne ok nyal gero Hekalu ni Ruoth Nyasaye ma Nyasache, nikech lwenje mane wasike olworego, nyaka Ruoth Nyasaye noketogi e bwo lochne.

⁴ To koro Ruoth Nyasaye ma Nyasacha osemiya kue kuonde duto, kendo aonge gi wasigu kata masira moro.

⁵ Emomiyo koro adwaro gero ni Ruoth Nyasaye ma Nyasacha, ka aluwo singruok mane omiyo Daudi wuora, kowacho niya, ‘Wuodi ma naket ruoth kari ema nogerna Hekalu.’

⁶ Omiyo koro yie ichik ji mondo otong’na yiend sida mag Lebanon. Jotichna nonywak tich kod jotichni, kendo anamiyi chudo mag jotichni kaka ichano, nikech onge ng’ato kuomwa mong’eyo tong’o yien machal gi jo-Sidon.”

⁷ Kane Hiram owinjo weche Solomon, nomor ahinya, mowacho niya, “Apako Ruoth Nyasaye tinendeni, mosemiyo Daudi wuowi man gi rieko mondo otel ni oganda maduong’ kamano.”

⁸ Nooro ni Solomon wach niya, “Asewinjo wach miorona, kendo aikora timo gik moko duto midwaro kuom wach yiend sida gi yiend saipras.

⁹ Jotichna nogolgi Lebanon, kendo notergi nyaka e dhonam, mi notuegi kanyakala, mondo okwang’gi e nam nyaka kuma idwaro. Joga nogony yien-go kanyono, kendo inikawgi. To kichiwo chiemo moromo jooda to inichop dwarona.”

¹⁰ Eka Hiram nomiyo Solomon yien duto modwaro,

¹¹ Kendo higa ka higa Solomon ne miyo Hiram gunde alufu piero ariyo mag cham mondo obed chiemb joode, kod mo ma dirom depe alufu piero ariyo gabich.

¹² Ruoth Nyasaye nomiyo Solomon rieko, kaka nosesingorene. Kue ne nitie e kind Hiram gi Solomon, kendo ne gitimo winjruok.

¹³ Solomon nochuno ji alufu piero adek kuom jo-Israel duto mondo oti gi thwon.

¹⁴ Due ka due nooro ji alufu apar kuomgi Lebanon. Ne gitiyo kuno kuom due achiel, to ne giyueyo dala kuom dueye ariyo. Adoram ne en jarit joma nichuno mondo oti gi thwon-go.

¹⁵ To bende Solomon ne nigi joting’ misike alufu piero abiriyo kod jopecho alufu piero aboro mane payo kite e gode,

¹⁶ kaachiel gi nyipeche alufu adek gi mia adek.

¹⁷ Ruoth noketonigi chik, mi ne gipayo kite madongo ma nengogi tek, mondo gilosgo mise mar Hekalu.

¹⁸ Kamano jogedo mag Solomon gi mag Hiram kod jo-Gebal ne payo kite kod bepe ka giko mondo ogergo Hekalu.