1 Ruodhi 3 - MUMA MALER 2015

Solomon okendo nyar Farao

¹ Solomon nokendo nyar Farao, ruodh Misri, kokelogo winjruok e pinjegi, kendo nokele e dala Daudi gi Od Ruoth Nyasaye, kod ohinga molworo Jerusalem.

² Ji pod ne timo misango e hembko mane ni kuonde moting’ore, nikech ot moger ni Ruoth Nyasaye ne pod onge ndalogo.

³ Solomon nohero Ruoth Nyasaye, koluwo chik Daudi wuon mare, mak mana ni notimo misango, kendo nowang’o ubani, e hembko mane ni kuonde moting’ore.

Solomon okwayo Nyasaye rieko

⁴ Ruoth Solomon ne jadhi Gibeon mondo otim misango, nikech ne en hembko mong’ere moloyo, kendo nothoro timo misengni miwang’o pep alufu achiel e kar misangono.

⁵ Kane Solomon odhi dalano, Ruoth Nyasaye nofwenyorene e lek gotieno, mowachone ni, “Kwa gima idwaro mondo amiyi.”

⁶ Solomon nodwoke niya, “Ninyiso hera mosiko ni Daudi wuora ma jatichni, mane wuotho e nyimi gi adiera, kendo kuom dimbruok gi chuny makare. Bende pod inyise hera mosikono nyaka chil kawuono, nimar isemiyo wuode obedo ruoth kare.

⁷ Koroni, A Ruoth Nyasaye ma Nyasacha, iseketa ruoth kar Daudi wuora, to pod an rawera mayot, kendo akia kaka onego awuoth e nyim ji.

⁸ Iseketa e kind jogi miseyiero, ma gin ji mathoth mokadho akwana.

⁹ Emomiyo yie imiya chuny mariek, manyalo yango gima ber gi gima rach, mondo ang’adgo ni jogi bura, nikech ere ng’ama dinyal ng’ado bura ni jogi mang’enygi?”

¹⁰ Ruoth Nyasaye ne mor nikech Solomon nokwayo kamano,

¹¹ omiyo nodwoke niya, “Nikech ikwayo wachni, to ok ikwayo ni mondo idag aming’a, kata mondo iyud mwandu, kata mondo iketh ngima wasiki, to ikwayo mana rieko mar ng’ado bura kare,

¹² koro atimoni kaka isekwayo. Amiyi chuny mar rieko kod mar ng’eyo. Pok onywolie ng’at machal kodi, bende ok nonywol moro bang’i.

¹³ Mago mane ok ikwayo bende amedi, gin mwandu kod duong’, ma onge ruoth moro amora ma dibed marom kodi ka pod ingima.

¹⁴ Bende kiluwo yorena, kendo imako chikena gi buchena, kaka Daudi wuoru notimo, to namedni ndalo.”

¹⁵ Eka Solomon nochiew, moyudo ni kara en mana lek. Nodok Jerusalem, mochung’ e nyim Sandug Muma mar Ruoth Nyasaye, kotimo misengni miwang’o pep kod mag sawo, kendo noloso ni jotichne duto sawo maduong’.

Solomon ong’ado bura gi rieko

¹⁶ Chieng’ moro, mon ariyo ma jochode nobiro ir ruoth, mi ochung’ e nyime.

¹⁷ Dhako achiel nowacho niya, “Yaye ruodha, wadak gi dhani e ot achiel, kendo nanywolo nyathi ka wan kode e odno.

¹⁸ Bang’ ndalo adek, dhani bende nonywol. Ne wan kendwa e ot; ne onge ng’at moro machielo mak mana wan ji ariyo.

¹⁹ To nyathi dhani notho gotieno, nikech nonindo kuome.

²⁰ Eka noa malo dier otieno, mokawo wuoda buta ka nindo otera, mi opielo e kore, to wuode motho nopielo e kora.

²¹ Kane achiew mondo adhodh nyathina, nayudo kosetho, to kane anone maber gokinyi, nayudo ni ok en nyathi manywolo.”

²² Eka dhako machielo nowacho niya, “Ooyo, nyathi mangima e mara, to motho e mari.” Dhako mokwongo nodwoko ni, “Ooyo, nyathi motho e mari, to mangima e mara.” Kamano e kaka ne gimino wach e nyim ruoth.

²³ Eka Ruoth nowacho niya, “Dhako achiel wacho niya, ‘Nyathi mangima e wuoda, to motho e wuodi.’ To machielo wacho ni, ‘Ooyo, in ema wuodi otho, to wuoda ema ngima.’ ”

²⁴ Kane ruoth osewacho kamano, nokwayo mondo okelne ligangla, kendo kane gisekelonego,

²⁵ nowacho niya, “Poguru nyathi mangima diere, mondo umi dhako achiel konchiel, to komachielo umi dhako machielo.”

²⁶ To dhako mane nyathine ngima nohero wuode ahinya, omiyo nosayo ruoth, kowacho niya, “Yaye ruoth, mi dhani nyathi mangima, to kik inege ngang’!” To dhako machielo nowacho ni, “Ok enobed mara kata mari. Poge apoga!”

²⁷ Eka ruoth nodwoko ni, “Miuru dhako mokwongono nyathi mangima, kik unege ngang’, nikech en e min mare.”

²⁸ Jo-Israel duto nowinjo bura mane ruoth ong’ado, mi ne giluore, nikech ne gineno ni rieko Nyasaye ni kuome, ka konye ng’ado bura makare.