1 Ruodhi 21 - MUMA MALER 2015

Ahab omayo Naboth puothe

¹ Naboth ja-Jezreel ne nigi puoth mzabibu thurgi, machiegni gi od Ahab ruodh Samaria.

² Ahab nowacho ni Naboth niya, “Miya puothi mar mzabibu, mondo aloke puoth alot, nikech ochiegni gi oda. Anyalo miyi puoth mzabibu maber moloye; kata kihero, to anachuli nengo moromo kode.”

³ To Naboth nodwoko Ahab niya, “Mano kuero! Ok anyal miyi mwandu kwerena.”

⁴ Kuom mano Ahab nodok dala ka iye owang’, motamore chiemo.

⁵ Jezebel chiege nodhi ire, mopenje niya, “Ang’o momiyo ikuyo, kendo idagi chiemo?”

⁶ Nodwoke niya, “Akuyo nikech nakwayo Naboth ja-Jezreel ni mondo ang’iew puothe mar mzabibu, to ka ok odwar pesa to mondo awilne gi puodho machielo. To nokwera ni ok onyal miya puothe.”

⁷ Jezebel chiege nowachone ni, “Donge inie ruodh Israel? A malo, ichiem kendo ibed mamor. Abiro miyi puoth mzabibu mar Naboth ja-Jezreel.”

⁸ Omiyo Jezebel nondiko barupe gi nying Ahab, modinogi gi alama mar ruoth; mi noorogi ni jodongo kod joma ogen modak e dala achiel gi Naboth.

⁹ Weche mane ondiko e barupego e magi: “Chikuru chieng’ ma ji onego tueye chiemo, kendo uket Naboth obed e nyim ji e kom moyiedhi.

¹⁰ Eka uket ji ariyo macheje obed momanyore kode mondo odonjne, ka giwacho ni oseyanyo Nyasaye kod ruoth bende. Eka ugole oko, ugoye gi kite nyaka otho.”

¹¹ Mi jodongo gi joma ogen mag dalano mane odak machiegni gi Naboth notimo kaka Jezebel nonyisogi e barupe mane ooronigi.

¹² Ne gichiko chieng’ ma ji onego otueye chiemo, kendo ne giketo Naboth e kom moyiedhi e nyim ji.

¹³ Ji ariyo macheje nodonjo, mobet momanyore kode. Eka ne gidonjo ni Naboth e nyim ji duto, ka giwacho niya, “Naboth noyanyo Nyasaye kod ruoth bende.” Omiyo ji nogole oko, kendo ne gigoye gi kite nyaka otho.

¹⁴ Bang’e ne gioro ni Jezebel wach niya, “Osego Naboth gi kite, kendo osetho.”

¹⁵ Kane Jezebel owinjo ni osego Naboth gi kite, kendo osetho, nowacho ni Ahab niya, “Dhiyo, ikaw puoth mzabibu mane Naboth ja-Jezreel odagi ng’iewo kodi, nikech koro osetho.”

¹⁶ Kane Ahab owinjo ni Naboth osetho, nodhi mondo okaw puotheno.

¹⁷ To wach Ruoth Nyasaye nobiro ni Elija ja-Tishbe niya,

¹⁸ “Dhi irom gi Ahab ruodh Israel modak Samaria, nikech enie puoth mzabibu mar Naboth, modhi kawo.

¹⁹ To wachne ni Ruoth Nyasaye owacho kama: ‘Kara iseneko kendo yeko?’ Eka imed nyise ni Ruoth Nyasaye owacho niya, ‘Kama nyocha guogi onang’oe remb Naboth, ema nonang’ie mari bende!’ ”

²⁰ Ahab nowacho ni Elija niya, “Yaye, jasika, kara isenwang’a?” Nodwoke ni “Ee, asenwang’i, nikech isechiwori mar timo gik ma Ruoth Nyasaye okwero.

²¹ Omiyo Ruoth Nyasaye owacho niya, ‘Abiro kelo masira kuomi. Abiro yweyi oko, kendo abiro tieko jodhoodi machwo duto, ma onge kata ng’at achiel ma nodong’ e Israel.

²² Anami dhoodi chal gi dhood Jeroboam wuod Nebat, kendo gi dhood Baasha wuod Ahija, nikech isemiya mirima, kendo nikech isemiyo jo-Israel obedo joricho.

²³ Jodhoodi mabiro tho e dala, guogi nocham, to mago mabiro tho oko, winy nocham.’ ”

²⁴ To kuom Jezebel, Ruoth Nyasaye nowacho niya, “Guogi nocham ringre e Jezreel.”

²⁵ Onge ng’at mane ochiwore mar timo gik ma Ruoth Nyasaye okwero kaka Ahab, mane Jezebel chiege chwalo.

²⁶ Notimo gik makuero chuth, kolamo gik maket kaka jo-Amor ne timo. Jo-Amorgo ema ne Ruoth Nyasaye oriembo mondo owe ni jo-Israel.

²⁷ Kane Ahab owinjo wechego, noyiecho lepe, morwako pien gugru e dende. Notueyo chiemo, monindo e pien gugru, kendo nodembore koboch.

²⁸ Mi wach Ruoth Nyasaye nobiro ni Elija ja-Tishbe niya,

²⁹ “Bende ineno kaka Ahab odembore e nyima? Ok abi kelo masira e ndalone, nikech osebedo modembore e nyima kamano, to abiro kelo masira e ode mana e ndalo wuode.”