1 Ruodhi 20 - MUMA MALER 2015

Ahab oloyo jo-Aram

¹ Ben-hadad ruodh Aram nochoko ogandane mar lweny, kaachiel gi ruodhi piero adek gariyo gi farese kod geche lweny. Nodhi molworo Samaria, kendo nokedo kode mondo okawe.

² Eka nooro joote dalano mondo owach ni Ahab niya, “Ben-hadad owacho kama:

³ ‘Fethi gi dhahapi, gin maga, to mondi kod nyithindi ema inyalo dong’go.’ ”

⁴ Ruodh Israel nodwoke niya, “Ruodha, ok adagi gima iwacho. An mari, kaachiel gi giga duto.”

⁵ To bang’e jootego noduogo ire, mowacho niya, “Koro Ben-hadad owacho ni mondo imiye fethi gi dhahapi, kaachiel gi mondi kod nyithindi.

⁶ Kiny kar sa makama, noor jotichne mondo omany odi, kod ut jogi, kendo ginikaw gimoro amora ma gihero.”

⁷ Eka ruodh Israel noluongo jodongo duto mag piny, mowachonigi niya, “Koro neuru kaka ng’atni dwaro kelona masira. Ne ok atamora chiwo fetha gi dhahapa, to koro odwaro mondo amiye monda gi nyithinda bende!”

⁸ Jodongo kod ji duto nodwoke ni, “Kik idewe, kendo kik iyiene.”

⁹ Omiyo nodwoko joote Ben-hadad niya, “Dhi unyis ruodha ni duto ma nokwongo kwaya, anatim, to gima koro okwaya sani ok anyal timo.” Mi joote nodwoko ni ruodhgi wach.

¹⁰ Ben-hadad noorone wach kendo niya, “Nyiseche mondo okweda ka ok aduwo Samaria ma kata mana buru modong’ie ok nyal romo joga duto jowo!”

¹¹ Ruodh Israel nodwoko ni, “Wachneuru niya, ‘Ng’ama rwako gilweny kik pakre ka ng’ama oselonyogi!’ ”

¹² Ben-hadad nowinjo wachni kometho gi ruodhi kande e hembegi, mi nowacho ni joge niya, “Chanreuru ni lweny.” Mi ne giikore monjo dala Samaria.

¹³ Eka janabi moro nobiro ir Ahab ruodh Israel, mowachone niya, “Ruoth Nyasaye owacho kama: ‘Donge ineno oganda maduong’ni? Kawuono eka abiro chiwogi e lweti, mi ining’e ni an e Ruoth Nyasaye.’ ”

¹⁴ Ahab nopenje ni, “Ruoth Nyasaye biro chiwonwagi e lwet ng’a gini?” Janabi nodwoke ni, “Mana in.”

¹⁵ Eka Ahab nochano yawuowigo, moromo ji mia achiel gi piero adek gariyo. Achien nochano jolweny duto mag Israel, ma dirom ji alufu abiriyo.

¹⁶ Ne giwuok odiechieng’,

¹⁷ ka yawuowi ma lang jodong gwenge otelo nyime. To noyudo ka Ben-hadad mer e hembe, kaachiel gi ruodhi piero adek mane konye. Nokel ni Ben-hadad wach niya, “Jomoko wuok Samaria.”

¹⁸ Nodwoko ni, “Makgiuru ka gingima, bed ni gibiro gi kue, kata gibiro kedo kodwa.”

¹⁹ Yawuowi ma lang jodong gwenge nowuok e dala Samaria, kendo oganda lweny noluwo bang’gi.

²⁰ Ng’ato ka ng’ato nonego ng’ate, mi jo-Aram noringo, ka jo-Israel lawogi. To Ben-hadad ruodh Aram noidho faras motony kaachiel gi joidh faresene moko.

²¹ Eka ruodh Israel nowuok momako farese gi geche, kendo nonego jo-Aram oyokre.

²² Janabi cha nodhi ir ruodh Israel, mowachone niya, “Koro jiwri, ine gima onego itim, nikech e ndalo oro, ruodh Aram biro monji.”

²³ Jodong Aram nowacho ni ruodhgi niya, “Nyasach jogo en nyasach gode; mano emomiyo ne giloyowa. Koro onego waked kodgi e pap, eka wanalogi adier.

²⁴ To tim kama: gol ruodhi kande e tichgi, iket jotend lweny kargi.

²⁵ Eka ichok oganda lweny moromo gi oganda ma nolalni, kiketo faras ka faras, kendo gari ka gari. Wanaked kodgi e pap, mi wanalogi adier.” Ben-hadad nowinjo wachgi motimo kamano.

²⁶ E ndalo oro, Ben-hadad nochoko jo-Aram, mi nodhi Afek mondo omonj jo-Israel.

²⁷ Jo-Israel bende nochokore koseikgi ni lweny, mi ne giwuok mondo giked gi wasikgigo. Jo-Israel nojot momanyore gi jo-Aram. Jo-Aram nopong’o piny, to jo-Israel ne chalo kweth matindo ariyo mag diek.

²⁸ Ng’at Nyasaye moro nodhi ir ruodh Israel, mowacho ne niya, “Ruoth Nyasaye owacho kama: ‘Jo-Aram osewacho ni Ruoth Nyasaye en nyasach gode, to ok en nyasach holni. Omiyo abiro chiwo oganda maduong’ni duto e lweti, eka unung’e ni an e Ruoth Nyasaye.’ ”

²⁹ Ne gijot ka gimanyore kamano kuom ndalo abiriyo. Chieng’ mar abiriyo ne girado ni lweny, kendo odiechieng’no jo-Israel nonego jo-Aram alufu mia achiel.

³⁰ Joma nodong’ noringo modonjo e dala Afek, to ohinga mar dala nopodho, monego ji alufu piero ariyo gabiriyo kuomgi. Ben-hadad bende noringo, modonjo e dalano, kendo nopondo ei ot moro maiye.

³¹ Jodonge nodhi ire, mowachone niya, “Wasewinjo ni ruodhi mag Israel ng’won. We mondo watue piende gugru e nungowa, kod tonde e ng’utwa, wadhi ir ruodh Israel, dipo koreso ngimani.”

³² Kuom mano, ne gitueyo piende gugru e nungogi, kod tonde e ng’utgi, mi gidhi ir ruodh Israel. Ne giwachone niya, “Ben-hadad jatichni osayi ni kik inege.” Ahab nopenjogi niya, “Kara, pod ongima? En owadwa.”

³³ Noyudo ka jogo rito gima dinyisgi parone, omiyo ne giyiene mapiyo niya, “Adier, Ben-hadad en owadu.” Nowachonigi ni, “Dhiuru ukele ka.” Ben-hadad nodhi ir Ahab, mi Ahab noluonge mondo giidh kode gache.

³⁴ Ben-hadad nowachone ni, “Abiro dwoko mier mane wuora omayo wuoru, kendo iniyud thuolo mar yawo kuonde ohala Damaski, kaka wuora notimo e dala Samaria.” Ahab nodwoke niya, “Abiro gonyi kiyie timo kamano.” Mi notimo kode winjruok, mogonye.

³⁵ Wach Ruoth Nyasaye nobiro ni ng’at achiel kuom oganda jonabi, mowacho ni wadgi ni, “Yie igoya!” To jalo nodagi goye.

³⁶ Eka nowachone ni, “Isedagi winjo wach Ruoth Nyasaye, omiyo sibuor biro negi kiwuok kuoma ka.” Gikanyono mane owuokie, noromo gi sibuor monege.

³⁷ Janabino noyudo ng’at machielo, mi owachone niya, “Yie igoya.” Ng’atno nogoye mohinye.

³⁸ Eka janabino nodhi morito ruoth Ahab e yo, koumo wang’e gi nanga mondo kik ong’eye.

³⁹ Kane ruoth kadho, jalo nokok kawachone ni, “Ruoth, ka nadonjo e chuny lweny, naromo gi jalweny moro mokelona ng’at motue, kowachona niya, ‘Rit ng’atni, to kapo ni olalni, to initho, kata in ichul kilo piero adek mag fedha.’

⁴⁰ To kane oyudo adich koni gi koni, napo ka ng’atno olalna.” Ruodh Israel nodwoke ni, “Iseng’ado buchi iwuon! Kamano e kaka nobedi.”

⁴¹ Eka janabino noelo nanga e wang’e piyopiyo, mi ruodh Israel nong’eyo ni en achiel kuom jonabi.

⁴² Nowacho ni ruoth niya, “Ruoth Nyasaye owacho kama: ‘Ng’at ma nyocha adwaro ni mondo otho, iseweyo odhi, omiyo ibiro tho kare, kendo jogi biro tho kar joge.’ ”

⁴³ Mi ruodh Israel nodok Samaria ka chunye lit.