1 Ruodhi 19 - MUMA MALER 2015

Elija oringo odhi Horeb

¹ Ahab nonyiso Jezebel gik moko duto mane Elija otimo, kendo kaka nonego jonabi duto.

² Mi Jezebel nooro jaote ir Elija, kowacho niya, “Ka kiny ochopo sa makama, ka pok anegi kaka isenego jonabigo, to nyiseche mondo onega!”

³ Elija noluor, mi noringo mondo otony. Kane ochopo Beer-sheba, dala mar Juda, noweyo jatichne kuno.

⁴ To en owuon, nodhi e thim moromo wuodh ndalo achiel. Eka nobet e tiend yath moro, mokwayo Ruoth Nyasaye ni mondo otho, kowacho niya, “Oromo! Yaye Ruoth Nyasaye, kaw ngimana, nikech ok aber moloyo kwerena.”

⁵ Noriere e tiend yadhno, monindo. Eka malaika nomule, ka wachone niya, “A malo, ichiem.”

⁶ Kane oting’o wang’e, nopo koneno makati kod puga mar pi yo ka wiye. Nochiemo kendo nomodho, eka nochako oriere piny.

⁷ To malaika mar Ruoth Nyasaye noduogo, momule, ka wacho niya, “A malo, ichiem, nono to wuoth biro hingi.”

⁸ Eka noa malo mochiemo kendo omodho. Chiemono nomede teko, mowuotho ndalo piero ang’wen, odiechieng’ gotieno, mochopo Horeb, god Nyasaye.

⁹ Nodonjo e rogo moro, mobworoe. Eka wach Ruoth Nyasaye nobirone niya, “Elija, itimo ang’o ka?”

¹⁰ Nodwoko niya, “A Ruoth Nyasaye Manyalo Gik Moko Duto, asetiyoni gi kinda nikech hera maduong’ maherigo, to jo-Israel ok oserito singruok mane itimo kodgi. Gisemuko kendeni mag misango, kendo gisenego jonabi magi, mak mana an ema adong’, to koro gidwaro nega.”

¹¹ Ruoth Nyasaye nowachone niya, “Wuogi, idhi ichung’ nyima ewi got nikech abiro kadho kanyo.” Mokwongo yamo nokudho, momuko gode, kendo obaro lwendni e nyim Ruoth Nyasaye; to Ruoth Nyasaye ok ne nie yamo

¹² Bang’e ka piny oseyiengni, ne nitie mach; to Ruoth Nyasaye ok ne nie mach. To bang’ mach, piny noling’ thi.

¹³ Kane Elija owinjo kamano, nogeng’o wang’e gi lawe mar abola, kendo nowuok, mochung’ e dho rogo. Eka nowinjo dwol kapenje niya, “Elija, itimo ang’o ka?”

¹⁴ Nodwoko ni, “A Ruoth Nyasaye Manyalo Gik Moko Duto, asetiyoni gi kinda, to jo-Israel ok oserito singruok mane itimo kodgi. Gisemuko kendeni mag misango, kendo gisenego jonabi magi; mak mana an ema odong’, to koro gidwaro nega.”

¹⁵ Eka Ruoth Nyasaye nowachone niya “Dog gi yor thim mane ibirogo, idhi Damaski, to kisechopo, iwir Hazael gi mo mondo obed ruodh Aram.

¹⁶ Jehu wuod Nimshi bende iwir mondo obed ruodh Israel; to Elisha wuod Shafat ja-Abel-mehola ema mondo iwir obed janabi kari.

¹⁷ Ng’at ma Hazael ok onego, Jehu noneg; to ng’at ma Jehu ok onego, Elisha noneg.

¹⁸ To abiro weyo ji alufu abiriyo kangima, mana jogo duto ma pok ogoyo chongegi piny ni Baal, kendo ma pok onyodhe.”

Oluong Elisha obed janabi

¹⁹ Elija nowuok kanyo, modhi oyudo Elisha wuod Shafat ka puro. Ji ne puro gi dhok piero ariyo gang’wen; dhok ariyo ne ywayo kwer achiel, to Elisha ema ne puro gi dhok ariyo mogik. Elija nochopo bute, mobolo kuome lawe mar abola.

²⁰ Eka Elisha noweyo dhok, moringo olawo Elija, kendo owachone niya, “Dogi, to kik wiyi wil gi gima asetimoni.”

²¹ Mi Elisha noweyo lawe, modok okawo dhok ariyogo. Noyang’ogi motedogi gi yiend kwer, mi nomiyo joge mondo ocham. Eka nowuok moluwo Elija, kendo nodoko jatichne.