1 Ruodhi 18 - MUMA MALER 2015

Elija odok ir Ahab

¹ Bang’ ndalo mang’eny, ka oro osebetie kuom higni adek, wach Ruoth Nyasaye nobiro ni Elija niya, “Wuogi mondo Ahab oneni nikech abiro kelo koth e piny.”

² Omiyo Elija nowuok mondo Ahab onene. Ndalogo kech ne duong’ e Samaria,

³ omiyo Ahab noluongo Obadia, ma jaduong’ ode. (Obadia ne en ng’at moluoro Ruoth Nyasaye ahinya,

⁴ kendo kane Jezebel nego jonabi mag Ruoth Nyasaye, to nopando jonabi mia achiel kuomgi. Piero abich nopando e rogo achiel, to piero abich opando e rogo machielo, momiyogi chiemo gi pi bende.)

⁵ Ahab nowacho ni Obadia niya, “Wawuoth e piny duto, e sokni kod aore duto, dipo ka wayudo lum ma dwaresgo farese gi kenje, mondo kik kech neggi duto.”

⁶ Omiyo ne gipogo piny e kindgi ji ariyo, mondo kik gimoro dong’ mak orangi. Ahab nochiko konchiel, to Obadia nochiko komachielo.

⁷ Kane Obadia dhi, nopo koromo gi Elija. Kane onene, nogoyo chonge piny, mokulorene, kowacho niya, “Jaduong’ Elija! Kara mana in?”

⁸ Nodwoke ni, “Ee, mana an. To koro dhi inyis ruodhu ni, an ka.”

⁹ To Obadia nopenje niya, “Ere gima aseketho, momiyo idwaro keta e lwet Ahab mondo onega?

¹⁰ Akuong’ora gi nying Ruoth Nyasaye ma Nyasachi ni onge oganda kata piny moro ma ruodha pok ooroe ji mondo odwari. To kane jopinjego okwer ni ionge kuno, to nyaka ne gikuong’re ni gikia kuma intie.

¹¹ Koro iora mondo adhi anyis ruodha ni, ‘Elija ni ka!’

¹² To kwasewere kodi, to Roho mar Ruoth Nyasaye biro teri kuma ok ang’eyo. Omiyo, ka adhi, ma anyiso Ahab ni in ka, mi obiro to ok onwang’i, enonega. To jaduong’, aseluoro Ruoth Nyasaye, chakre tinna.

¹³ Bende isewinjo gima natimo ka Jezebel ne nego jonabi mag Ruoth Nyasaye? Napando jonabi mia achiel. Piero abich napando e rogo achiel, to piero abich e rogo machielo, mamiyogi chiemo gi pi bende.

¹⁴ To pod iora mondo adhi anyis ruodha ni, ‘Elija ni ka!’ Donge ing’eyo ni obiro nega?”

¹⁵ To Elija nodwoke niya, “Gi nying Ruoth Nyasaye Manyalo Gik Moko Duto, ma Nyasacha ma atiyone, akuong’ora ni abiro nene kawuono.”

¹⁶ Eka Obadia nodhi dwaro Ahab, monyise wach. Mi Ahab nodhi neno Elija.

¹⁷ Kane Ahab oneno Elija, nowachone niya, “Kara mana in, jasand jo-Israel!”

¹⁸ Elija nodwoke ni, “An ok asand jo-Israel, to in gi jodhoodu ema usandogi, nikech useweyo chik Ruoth Nyasaye, kuluwo nyiseche manono miluongo ni Baal.

¹⁹ Emomiyo koro or wach mondo jo-Israel duto obi, wachokre e got Karmel, kaachiel gi jonabi mia ang’wen gi piero abich mag Baal, kod mag Ashera mia ang’wen, ma Jezebel opidho.”

Elija opiem gi jonabi mag Baal e got Karmel

²⁰ Kuom mano, Ahab noluongo jo-Israel duto, kendo nochoko jonabigo kanyakla e got Karmel.

²¹ Eka Elija nochung’ e nyim ji duto, mopenjogi niya, “Unuriwni e kind paro ariyo nyaka karang’o? Ka Ruoth Nyasaye en Nyasaye, to luweuru; to ka Baal e Nyasaye, to luwuru Baal.” To ji noling’ thi.

²² Eka Elija nowachonigi niya, “Eri an kende e janabi mar Ruoth Nyasaye modong’, to jonabi mag Baal gin mia ang’wen gi piero abich.

²³ Koro miwauru ruedhi ariyo. We giyier achiel mondo giyang’, kendo gikete ewi yien, to kik gimok mach. An bende abiro yang’o rwath machielo, kendo nakete ewi yien, to ok namok mach.

²⁴ Eka uluong nying nyasachu, to an abiro luongo nying Ruoth Nyasaye, kendo Nyasaye ma noor mach, e Nyasaye.” Ji duto nodwoko ni, “Wayie.”

²⁵ Elija nowacho ni jonabi mag Baal niya, “Yieruru rwath achiel, uyang’ mokwongo nikech ung’eny. Eka uluong nying nyasachu, to kik umok mach.”

²⁶ Omiyo ne gikawo rwath, mi giyang’o, kendo ne giluongo nying Baal, chakre okinyi nyaka odiechieng’, ka giwacho niya, “Baal, yie idwokwa!” To ne onge dwoko kata matin. To koro ne gichikore achika ka gilworo kendo-mar-liswa mane giseloso.

²⁷ Kane ochopo odiechieng’ tir, Elija nojarogi, ka ngeko nyiero, kowacho niya, “Koguru matek! Donge en nyasaye? Dipo ka wach moro pod ogale, kata odich, kata odhi wuoth. Kamoro onindo, chieweuru!”

²⁸ Omiyo ne gimedo kok matek, ka ging’olore gi pelni kod ligengni, kaka kit timgi nobet, nyaka rembgi nochuer.

²⁹ Odiechieng’ nokadho, to ne gimedo dhumore nyaka sa michiwoe misango mar odhiambo. To ne onge dwoko, kata ng’ama dewo ywakgi.

³⁰ Eka Elija nowacho ni ji duto niya, “Suduru ka.” Mi ji duto nosudo machiegni. Noloso kendo-mar-misango mar Ruoth Nyasaye ma nomukore.

³¹ Nokawo kite apar gariyo maromre gi kwan mar dhout yawuot Jakobo, jal mane wach Ruoth Nyasaye obirone niya, “Nyingi noluong ni Israel.”

³² Kitego nolosogo kendo-mar-misango ni Ruoth Nyasaye. Nokunyo bur molworo kendo-mar-misango. Burno dine rom ting’o migerni ariyo mag koth ngano.

³³ Nochano yien, kendo nopogo rwath lemo lemo, moketo ewi yien. Eka nowacho niya, “Keluru pi, depige ang’wen, uol kuom misango kendo kuom yien.” Mi ne gitimo kamano.

³⁴ Nowacho niya, “Meduru kendo.” Mi ne gitimo kamano. Nowacho kendo ni, “Timuru mar adek.” Mi ne gitimo,

³⁵ kendo pi noo piny, molworo kar misango, nyaka bur nopong’.

³⁶ Kane sa michiwoe misango mar odhiambo ochopo, Elija janabi nosudo machiegni, mowacho niya, “Ruoth Nyasaye ma Nyasach Ibrahim, gi Isaka, kod Israel, yie mondo ji ong’e kawuono ni in e Nyasach Israel, kendo ni an e jatichni, mosetimo magi duto kaka iwacho.

³⁷ Dwoka, Ruoth Nyasaye! Dwoka mondo jogi ong’e ni in e Nyasaye maloko chunygi iri.”

³⁸ Eka mach mar Ruoth Nyasaye nolwar, motieko misango kaachiel gi yien gi kite kod lowo, kendo nonywayo pi mane nie bur pep.

³⁹ Kane ji duto oneno gima otimore, ne gipodho piny auma, ka giwacho niya, “Ruoth Nyasaye e Nyasaye! Adier, Ruoth Nyasaye e Nyasaye!”

⁴⁰ Elija nokonogi niya, “Makuru jonabi mag Baal. Kik uwe kata achiel tony.” Ne gimakogi, mi Elija noterogi mwalo e aora Kishon, monegogi kuno.

Elija olemo ni koth

⁴¹ Koro Elija nowacho ni Ahab niya, “Dhi ichiem, kendo imethi, nikech awinjo ka koth mor matek.”

⁴² Ahab nodhi motimo kamano. To Elija nodhi moidho ewi got Karmel. Nogoyo chonge piny, koketo wiye e kind chongene.

⁴³ Nowacho ni jatichne ni, “Dhi ewi got, ing’i yo nam.” Jalo nodhi, mong’icho, mi nodwoke niya, “Ok aneno gimoro.” Elija nowachone ni, “Dog nyadibiriyo.”

⁴⁴ Kane oduogo e wuodhe mar abiriyo, nowacho niya, “Koro aneno bor polo matin ka lwet dhano ka wuok e nam.” Eka Elija nowachone ni, “Dhi inyis Ahab ni mondo oik geche, kendo olor mwalo, nimar dipo ka koth ogeng’e.”

⁴⁵ Bang’ sa matin, polo nodudo gi yamo, kendo koth nochue maduong’, mi Ahab noidho geche, modhi Jezreel.

⁴⁶ Teko mar Ruoth Nyasaye nolor kuom Elija, mi Elija nong’wano lepe, moringo nyim Ahab kateloe nyaka ranga Jezreel.