1 Ruodhi 15 - MUMA MALER 2015

Loch Abija ruodh Juda

¹ E higa mar apar gaboro mar loch Jeroboam wuod Nebat, Abija nodoko ruodh Juda.

² Norito piny kuom higni adek, kodak Jerusalem. Min mare ne nyinge Maaka, nyar Abishalom.

³ Abija ne timo richo duto mane wuon mare otimo. Chunye ne ok long’o ni Ruoth Nyasaye kaka chuny Daudi kwar mare ne long’o.

⁴ To kata kamano, Ruoth Nyasaye ma Nyasache noketo wuode ruoth kare, mondo obedne ka taya maliel e Jerusalem mana nikech nying Daudi, kendo nomiyo Jerusalem ogurore,

⁵ nimar Daudi notimo gik malong’o ni Ruoth Nyasaye, kendo e ngimane duto ne ok oketho wach moro mane ochike, mak man wach Uria ja-Hiti.

⁶ Ne nitie lweny e kind Ahija gi Jeroboam ndalogi duto.

⁷ Weche moko mag Abija, gi timbene ondik e Kitap Weche mag Ndalo mag Ruodhi mag Juda.

⁸ Abija notho, mi noyike e dala Daudi, Asa wuode nodoko ruoth kare.

Loch Asa, ruodh Juda

⁹ E higa mar piero ariyo mar loch Jeroboam ruodh Israel, Asa nodoko ruodh Juda,

¹⁰ mi norito piny kuom higni piero ang’wen gachiel, kodak Jerusalem. Min mare ne nyinge Maaka nyar Abishalom.

¹¹ Timbe Asa ne long’o e nyim Ruoth Nyasaye, mana kaka timbe Daudi kwar mare.

¹² Noriembo joterruok mag kuonde lemo, kodarogi e pinye, kendo nogolo nyiseche manono mane kwerene oloso.

¹³ Bende nogolo Maaka e duong’ne mar bedo min ruoth, nikech noloso kido makuero, maket gi nyasaye madhako miluongo ni Ashera. Asa nomuko gima ketno, mowang’o e dho aora Kidron.

¹⁴ Hembko mane ni kuonde moting’ore ne ok okethi, to kata kamano chuny Asa ne long’o e nyim Ruoth Nyasaye e ndalone duto.

¹⁵ Nokawo fedha gi dhahabu kod gik lemo, mi oketo e od Ruoth Nyasaye, to moko en owuon ema nochiwo.

Asa otimo winjruok gi Benhadad ruodh Aram

¹⁶ Ne nitie lweny e kind Asa gi Baasha ndalo duto mag ngimagi.

¹⁷ Baasha ruodh Israel nodhi monjo jo-Juda, kendo nochielo Rama gi ohinga, moketoe jolweny mondo ogeng’ ni ji duto madhi ka Asa ruodh Juda, kata maa kuno.

¹⁸ Eka Asa nokawo fedha gi dhahabu duto ma nodong’ kuom mwandu mag Od Ruoth Nyasaye kod mag ode owuon, momiyo jotichne mondo okow ni Ben-hadad ruodh Aram, ma wuod Tabrimmon, wuod Hezion, ma nodak Damaski. Noorone wach niya,

¹⁹ “Winjruok mondo obed e kindwa kodi, kaka winjruok mane nie kind wuora gi wuoru. Ero aoroni chiwo mar fedha gi dhahabu; yie iketh winjruok manie kindu gi Baasha ruodh Israel, mondo owe kedo koda.”

²⁰ Ben-hadad noyie kwayo mar ruoth Asa, mi nooro jotend ogend lweny mondo omonj miech Israel. Noketho Ijon, gi Dan, gi Abel-beth-Maaka, gi paw Kineroth duto, kod piny Naftali.

²¹ Kane Baasha owinjo gima otimore, noweyo gero ohinga mar Rama, modok Tirza.

²² Eka ruoth Asa noluongo jo-Juda duto, maonge ng’ama odong’. Ne gigolo kite gi yien duto mane Baasha gerogo ohinga mar Rama, mi Ruoth Asa nochielogo Geba manie piny Benjamin, kod Mizpa.

²³ Weche moko mag Asa, gi tekone kod timbene duto, gi mier mane ogero, ondiki e Kitap Weche mag Ndalo mag Ruodhi mag Juda. Kane oseti, tuo moro nomako tiendene.

²⁴ Notho moyike e dala Daudi kwar mare. Jehoshafat wuode nodoko ruoth kare.

Loch Nadab, ruodh Israel

²⁵ E higa mar ariyo mar loch Asa ruodh Juda, Nadab wuod Jeroboam nodoko ruodh Israel. Nobedo ruoth kuom higni ariyo,

²⁶ to notimo gik ma Ruoth Nyasaye okwero, koluwo timbe wuon mare, ma nomiyogo jo-Israel obedo joketho.

²⁷ Baasha wuod Ahija, ja-Isakar, nojamo Nadab, monege Gibethon, dala jo-Filistia, kane oyudo Nadab gi jo-Israel lworo Gibethon mondo omonji.

²⁸ E higa mar adek mar loch Asa ruodh Juda ema Baasha nonegoe Nadab, mokawo lochne.

²⁹ Gikanyono kosedoko ruoth, nonego jood Jeroboam duto. Notieko od Jeroboam chuth, ma ok oweyo kata ng’at achiel kangima, mana kaka Ruoth Nyasaye nosemiyo Ahija ja-Shilo ma jatichne owacho.

³⁰ Mano notimore nikech Ruoth Nyasaye ma Nyasach Israel, nokecho gi richo mane Jeroboam otimo, kendo mane omiyo jo-Israel otimo.

³¹ Weche moko mag Nadab, kod timbene duto, ondiki e Kitap Weche mag Ndalo mag Ruodhi mag Israel.

³² Ne nitie lweny e kind Asa kod Baasha ruodh Israel e ndalo duto mag ngimagi.

Loch Baasha, ruodh Israel

³³ E higa mar adek mar loch Asa ruodh Juda, Baasha wuod Ahija nodoko ruodh Israel, morito piny kuom higni piero ariyo gang’wen, kodak Tirza.

³⁴ Notimo gik ma Ruoth Nyasaye okwero, koluwo timbe Jeroboam ma nomiyogo jo-Israel obedo joricho.