1 Ruodhi 14 - MUMA MALER 2015

Ahija okoro wach marach kuom Jeroboam

¹ E ndalogo Abija wuod Jeroboam ne tuo.

² Jeroboam nowacho ni chiege niya, “Lok kiti, mondo kik ng’ato ng’e ni in chiega, kendo idhi Shilo ir Ahija janabi ma nokoro ni an ema nabed ruodh pinyni.

³ Kaw makati apar, gi kek moko kod puga mar mor kich, iterne; enonyisi gima biro timore kuom nyathi.”

⁴ Chi Jeroboam notimo kamano; nodhi Shilo mochopo e od Ahija. To koro Ahija ne ok nyal neno; wengene nosechor, nikech hike noniang’.

⁵ Ruoth Nyasaye nowacho ni Ahija niya, “Ng’e ni chi Jeroboam biro iri mondo openji wach wuode, nikech wuode tuo.” Eka Ruoth Nyasaye nonyiso Ahija kaka onego owuo kod dhakono. Kane chi Jeroboam ochopo, nowuondore ni en dhako moro nono.

⁶ To kane Ahija owinjo tiende e dhoot, nowacho niya, “Donji chi Jeroboam; ang’o momiyo iriasori ni in ng’at moro nono? An gi wach marach monego anyisi.

⁷ Dhi iwach ni Jeroboam ni Ruoth Nyasaye ma Nyasach Israel owacho kama: ‘Ne ayieri e kind ji mondo amiyi duong’. Ne aketi jatend joga Israel,

⁸ kendo nagolo loch kuom dhood Daudi, mamiyi. To kata kamano ok isebet ka Daudi jatichna ma norito chikena, kendo noluwa gi chunye duto, katimo mana gik malong’o e nyima,

⁹ to in iseketho moloyo joma nokwongoni; iseloso nyisecheni iwuon mag chuma, kimiyago mirima, kendo iselokona ng’eyi.

¹⁰ Emomiyo abiro keloni masira ni dhoodi, kendo abiro tieko joodi machwo duto koda ka wasumbni, ma onge ng’ati ma nodong’ e Israel, kendo abiro yweyo jodhoodi oko pep, mana kaka ng’ama wang’o owuoyo marum chuth.

¹¹ Jadhood Jeroboam moro ma notho e dala, guogi nocham, to mago ma notho oko, winy nocham, nikech Ruoth Nyasaye osewacho kamano.’

¹² Koro dog dala, to e sa asaya ma tiendeni onyonoe dala ni i, to nyathi notho.

¹³ Jo-Israel duto biro ywage kendo yike, to en ng’at achiel kende kuom jodhood Jeroboam ma noyik e liel, nimar kuome kende ema Ruoth Nyasaye ma Nyasach Israel onwang’oe gima long’one.

¹⁴ Bende Ruoth Nyasaye noyier ng’at moro obed ruodh Israel, ma biro tieko dhood Jeroboam. Chakre kawuono,

¹⁵ Ruoth Nyasaye biro goyo jo-Israel, mi ginikirni kaka odundu ma pi yiengo, kendo nogol jo-Israel oko e piny maber ma nomiyo kweregini, mi nokegi koterogi loka aora Yufrate nikech gisemiyo Ruoth Nyasaye mirima, ka gichungo sirni milamo miluongo ni Ashera.

¹⁶ Enojwang’ jo-Israel nikech richo Jeroboam, mane omiyo jo-Isarel bende otimo.”

¹⁷ Chi Jeroboam nodok Tirza dalagi, to kane ochopo e dhoot, nyathi cha notho.

¹⁸ Jo-Israel duto noyike, kendo noywage, mana kaka Ruoth Nyasaye nomiyo Ahija janabi ma jatichne owacho.

¹⁹ Weche moko mag Jeroboam, kod lwenjene, kendo kaka norito piny, ondiki e Kitap Weche mag Ndalo mag Ruodhi mag Israel.

²⁰ Jeroboam norito piny kuom higni piero ariyo gariyo. Notho moyike, eka Nadab wuode nodoko ruoth kare.

Loch Rehoboam, ruodh Juda

²¹ Rehoboam wuod Solomon, ma min mare niluongo ni Naama, nyar Amon, nodoko ruodh Juda. Nochako tich ka en jahigni piero ang’wen gachiel, kendo norito piny kuom higni apar gabiriyo, kodak Jerusalem, dala mane Ruoth Nyasaye oyiero kuom dhout Israel duto mondo nyinge obedie.

²² Jo-Juda notimo gik ma Ruoth Nyasaye okwero, mi richogi nomiyo Ruoth Nyasaye ojok kodgi moloyo kweregi duto.

²³ Ne giloso ut lemo e hembko mane ni kuonde moting’ore, kendo ne gichungo sirni milamo mag kite gi mag yath, e gode maboyo duto, kendo e tiend yien moro amora motimo otiep.

²⁴ Bende ne giketo ji kuonde lemo mondo jolemo oterrego, kaka kit lemo margi nobet. Jo-Juda ne timo timbe makuero duto mag ogendini mane Ruoth Nyasaye oriembo mondo owe ni jo-Israel thuolo.

²⁵ E higa mar abich mar loch Rehoboam, Shishak ruodh Misri nomonjo Jerusalem.

²⁶ Nokawo mwandu duto mag Hekalu mar Ruoth Nyasaye, gi mag od ruoth. Bende nokawo kuodi duto mag dhahabu mane Solomon oloso,

²⁷ mi ruoth Rehoboam noloso kuodi mag mula kar mago, momiyo jotend jorit ranga dalane.

²⁸ Kane ruoth dhi e Hekalu mar Ruoth Nyasaye, jorit ne ting’o kuodigo, eka bang’e ne gidwokogi ka od jorit.

²⁹ Koro weche moko mag Rehoboam, gi timbene duto, ondiki e Kitap Weche mag Ndalo mag Ruodhi mag Juda.

³⁰ Ne nitie lweny e kind Rehoboam gi Jeroboam ndalo duto.

³¹ Rehoboam notho, moyike but kwerene e dala Daudi. Min mare ne nyinge Naama nyar Amon. Abija wuod Rehoboam nodoko ruoth kare.