1 Ruodhi 13 - MUMA MALER 2015

Janabi moa Juda okwero ruoth Jeroboam

¹ To Ruoth Nyasaye nosewacho ni jatichne moro mondo oa Juda odhi Bethlehem, mi jalo nodhi moyudo Jeroboam kochung’ e dho kendo-mar-misango kawang’o misango.

² Ng’at Nyasayeno nokuong’o kendo-mar-misango kaka Ruoth Nyasaye nochike, koywage niya, “Yaye, kendo-mar-misango! Yaye, kendo-mar-misango! Ruoth Nyasaye owacho kama: Enonywol wuowi e dhood Daudi, ma nochak nyinge ni Josia. Enoneg jodolo mag hembko man kuonde moting’ore, ma wang’o ubani kuomi, kendo enowang’ choke ji kuomi.”

³ Eka nokor wach chieng’ono, kowacho niya, “Ranyisi ma Ruoth Nyasaye osewacho ni biro timore ema: Kendo-mar-misangoni nobarre, kendo buru manie wiye nopukre.”

⁴ Kane ruoth Jeroboam owinjo wach mane ng’at Nyasaye okuong’ogo kendo-mar-misango man Bethel, nogolo bade e misango, mosiemo ng’atno, kowacho niya, “Makeuru!” To bede mane osiemogo ng’atno notal, mi ne ok onyal dole kendo.

⁵ Kendo-mar-misango bende nobarore, mi buru manie wiye nopukore. Mano noluwore gi ranyisi mane ng’at Nyasaye nokoro, mana kaka Ruoth Nyasaye nochiko.

⁶ Eka ruoth nowacho ni ng’at Nyasaye niya, “Kwana Ruoth Nyasaye ma Nyasachi mondo bada ochangi.” Eka ng’at Nyasaye notimo kamano, mi bade notugore.

⁷ Ruoth nowacho ni ng’at Nyasaye niya, “Wadog oda mondo iyue, eka abiro miyi gimoro.”

⁸ To ng’at Nyasaye nodwoko ruoth niya, “Kata da bed ni imiya mana nus mwanduni, to ok nadonj e odi. Ok nachiem, kata madho gimoro ok namadh ka,

⁹ nikech wach Ruoth Nyasaye nobirona ni kik achiem kata kik amadh gimoro, bende kik adog gi yo mane abirogo.”

¹⁰ Omiyo noluwo yo machielo, ka ok odok gi yo ma nodhigo Bethel.

¹¹ To ne nitie janabi moro moti ma nodak Bethel. Yawuote nobiro ire, monyise gik moko duto mane ng’at Nyasaye otimo Bethel chieng’ono. Ne gihulone weche duto mane ng’atno owacho ni ruoth.

¹² Wuon-gi nopenjogi yo mane oluwo, mi ginyise.

¹³ Eka nowachonigi ni, “Gawnauru kanyna.” Mi ne gigawone, moidho.

¹⁴ Noluwo ng’at Nyasaye moyude kobet piny e tiend yath moro. Nopenje niya, “In e ng’at Nyasaye mane oa Juda koso?” Ng’atno nodwoke niya, “Ee an”

¹⁵ Eka nowachone ni, “Wadog dala, idhi ichiem.”

¹⁶ To nodwoke ni, “Ok anyal dok kodi, kata donjo e odi ok anyal donjo. Bende ok nachiem kata madho gimoro ok namadhi,

¹⁷ nikech wach Ruoth Nyasaye nobirona ni kik achiem kata kik amadh gimoro, kendo kik adog gi yo mane abirogo.”

¹⁸ Janabi motino nowuonde, kawachone niya, “An bende an janabi kaka in, kendo malaika osekelona wach Ruoth Nyasaye ni mondo abi aomi, wadhi e oda, ichiem.”

¹⁹ Omiyo nodok kode, mochiemo e ode.

²⁰ To kane pod gichiemo, wach Ruoth Nyasaye nobiro ni janabi mane oomeno,

²¹ mi nowacho ni ng’at Nyasaye mane oa Juda niya, “Ruoth Nyasaye owacho kama: Isedagi winjo wach Ruoth Nyasaye ma Nyasachi ochiki,

²² to iseduogo michiemo kama nokweri ni kik ichiemie kata kik imethie. Emomiyo ringri ok noyik gi kwereni.”

²³ Kane gisechiemo, janabi moti mane odwokeno nogawone kanyna,

²⁴ kendo kane jalo osewuok dhiyo, noromo gi sibuor e yo, mi sibuor nonege. Ringre noriere e yo, to kanyna gi sibuor nochung’ bute.

²⁵ Ji mane kadho kanyo noneno ringre koriere e yo, kod sibuor kochung’ bute, mi ne gitero wach e dala janabi moti cha.

²⁶ Kane janabino owinjo wachno, nowacho niya, “Nyaka bed ni en ng’at Nyasaye mane ok orito wach Ruoth Nyasaye cha. Emomiyo Ruoth Nyasaye osechiwe ni sibuor, ma koro osenege mokidhe, mana kaka Ruoth Nyasaye nowachone.”

²⁷ Eka noko ni yawuote ni, “Gawnauru kanyna.” Mi ne gitimo kamano.

²⁸ Nodhi moyudo ringre ng’atno koriere e yo, ka kanyna kod sibuor ochung’ bute. To sibuor ne ok ochamo ringre ng’atno, kata timo gimoro ni kanyna ne ok otimo.

²⁹ Janabino noketo ringre e ng’e kanyna, modwoko Bethel, mondo oywage kendo oyike.

³⁰ Noyiko ringre ng’atno e bure owuon, mi ne giywage, ka giwacho niya, “Yaye owadwa!”

³¹ Kane oseyike, nowacho ni yawuote niya, “An katho, to uyika e liel moyikie ng’at Nyasayeni, kuketo chokena but chokene,

³² nimar wach Ruth Nyasaye nochopo kare, kaka jali nowacho kokuong’o kendo-mar-misango man Bethel, kod ut lemo manie hembko mag miech Samaria.”

³³ To kata kamano, Jeroboam ne ok oweyo yorene maricho, to nomedo keto jomoko nono mondo obed jodolo ma rito hembko man kuonde moting’ore, kopwodho ng’ato ang’ata ma ne dwaro bedo jadolo.

³⁴ Timni nomiyo dhood Jeroboam obedo joketho, mi notiekgi chuth, ma onge modong’ e piny.