तितस 1 - Dhimal NT

सेउपाखा

¹ का पावल परमेस्वरको बान्धाइति कालाउ प्रभु येसु ख्रिस्ट पाहा छाल्न्हाका चात्या, इदोइ पात्तारा नासेहेङ लेखेदोङखा, परमेस्वर छाल्का द्‍याङगेलाइहेङ खाङधुरिको सन्‍देस हिङपालि कालाउ सत्येको ग्यान हाइ हि इङको धिरपालिको भाअ्सिङ कासेहेङ दिङगिल्का हि। कालाउकि इम्बालाइ परमेस्वरहेङ मन्दा ताअ्का जिबन जियाइलि द्वाको।

² एसापा इम्बालाइ परमेस्वर दोफा आनान्त जिबनको आस पाखे। हाइपालिपानु हेलाउ बुङ माधाताइका परमेस्वर, सुमिङ सिरजाइका खान्तेङ लाम्फा दोङ ताइको द्‍याङगेलाइहेङ आनान्त जिबन प्याङका दोअ्तेङ प्रतिग्या पाका हिघाहि।

³ कालाउ एला ठिक सोमोइता परमेस्वर दोङ कासेहेङ इदोइ सुसमाचार देखाल पिहि। कालाउ केलाइको मुक्ति दाता परमेस्वर कासेहेङ इदोइ सुसमाचार हिङपालि आग्या पिका हि।

⁴ का इदोइ पात्तारा तितसहेङ लेखेदोङखा, नाअ् काङको ताइकोङ चान भाइका हिना, हाइपालिपानु नाअ् बुङ येसु ख्रिस्टता खाङधुरि पाखेना। आबा परमेस्वर कालाउ केलाइहेङ मुक्ति पिका येसु ख्रिस्ट नासेहेङ आनुग्रह कालाउ सान्ति प्याको।

क्रेट टापुता तितसको काम

⁵ ओदोङ भाअ्सिङ का नासेहेङ क्रेट टापुता लाअ्धिघा, कालाउकि इन्ता हिका केलाइको बाकि काम पुरा पाअ्‌, कालाउ का नासेहेङ आराइका बोमोजिम गोताङ क्रेट टापुता हिका सहरगेलाइता आगुवागेलाइ चुने।

⁶ मन्डलिको आगुवाको एमि खिनिङ बे ह्याको, कालाउ मादुसिका हिलि गोइखे, कालाउ वाको जामाललाइ खान्धुराइ हिलि गोइखे, कालाउ इम्बालाइको मारेम्का बानि बेउरा कालाउ आग्या माकिका माह्याको।

⁷ हाइपालिपानु मन्डलिको आगुवा परमेस्वरको कामको जिम्मा ह्रुका हिखे, ओदोङ भाअ्सिङ वाकोता हिदोइ बुङ दुसिका हिलि माएल। वा ताइकोङ काथाता जिद्दि पाका, धेमाङ चेर ताम्पाका, गोरा चि आमका, बल दिका कालाउ ताकाको लोभ मापाका द्‍याङ हिलि गोइखे।

⁸ कालाउ मन्डलिको आगुवा ताइको साअ्ता लोका बान्सालाइहेङ सेवा सात्कार पाका, आरुको भलाइ पाका, ताइमिहेङ काबुता ताअ्का, आसाल काम पाका, परमेस्वर दोफा समरपित हिका कालाउ आनुसासनता हिका हिलि गोइखे।

⁹ वा केलाइसो येसु ख्रिस्टको बारेता धिरका सत्ये सन्देसहेङ पुर्न रितिहोइ खाङधुरि पाको। कालाउकि वा आरुहेङ इङको सहि सिक्स्या पिलि द्वाको कालाउ हासु बुङ इङको सत्ये सिक्स्याको बिरोध पाखे पानु, इम्बालाइहेङ सच्याइलि द्वाको।

¹⁰ का इदोइ काथा दोअ्ताङका, हाइपालिपानु हेन्जा द्‍याङगेलाइ ठिक सिक्स्याको बिरोध पावा, इम्बालाइ काम मालागेका काथागेलाइ धिरपाखे कालाउ आरुहेङ धोका पिखे। उङको द्‍याङगेलाइ इङको दलको हि, जाइ गोताङ खान्धुराइगेलाइ यहुदिगेलाइको व्यवस्था किताको दोअ्तेङ चाहिखे, बिसेस पातेङ खाताना पाका भोखे।

¹¹ इसिका धाताइका सिक्स्या द्‍याङगेलाइहेङ धिरपालि मापि। हाइपालिपानु इम्बालाइ धिरपालि मागोइका धिरपातेङ पुराङ साअ्को जाहानको खाङधुरिहेङ नासा पापिका हि। इम्बालाइ ताका कामाइलिको भाअ्सिङ इन्सिका पाखे।

¹² इम्बालाइ मध्ये क्रेट टापुको एमि ग्यानि द्‍याङ एसा दोअ्का हि, “क्रेट टापुको द्‍याङगेलाइ जेलाउ बुङ धाताइखे। कालाउ इम्बालाइ झारभारिको गुपुसगेलाइ भाइका ब्याभार पाखे, कालाउ इम्बालाइ कुरिया हिखे कालाउ मारेम्फाङ जिहुकागेलाइ हिखे।”

¹³ ग्यानि द्‍याङको इदोइ काथागेलाइ आझाइ बुङ क्रेट टापुको द्‍याङगेलाइको बिसोइता सत्ये हि। ओदोङ भाअ्सिङ इम्बालाइहेङ बेसरि हाप्काइ, कालाउकि इम्बालाइ येसु ख्रिस्टको सत्ये सिक्स्या साक्सि पिलि द्वाको।

¹⁴ कालाउ सत्येहेङ इन्कार पाका द्‍याङगेलाइको आग्या कालाउ यहुदि दन्ते काथाता ध्यान मापिसु।

¹⁵ जाहाँका हृदय हिकालाइको बिचार जाहाँका दोङ हिखे। कालाउ इङको दुस्ट द्‍याङगेलाइ जाइ येसुहेङ खाङधुरि मापाखे इम्बालाइको भाअ्सिङ हाइ दोङ काथा बुङ जाहाँका माजेङखे। हाइपालिपानु इम्बालाइको मन कालाउ बिबेक आसुद्द हिखे।

¹⁶ इङको धाताइका सिक्स्यकगेलाइ परमेस्वरहेङ नाल्का हिघा दोअ्तेङ दाबि पाखे, कालाउ इम्बालाइको कामहोइ इदोइ तिङपाखे कि इम्बालाइ परमेस्वरहेङ मानाल्खे। हाइपालिपानु इम्बालाइ सिकाका, आतेरि कालाउ हिदोइ बुङ रेम्का काम पालि सक्स्यम मान्थु।