रोमि 9 - Dhimal NT

इस्राएलको भाअ्सिङ पावलको सोक

¹ का ख्रिस्टहेङ साक्सि मानितेङ सत्ये काथा धुइतेङ हिघा, पबित्तरो आत्मा कालाउ काङको बुद्दिहोइ बुङ या साक्सि पिखे कि का धाताइका मान्थुघा।

² का काङको द्‍याङगेलाइको भाअ्सिङ ओसारापाङ दुखि हिघा, कालाउ काङको ह्रदयता इम्बालाइको भाअ्सिङ जेलाउ बुङ तुका मोहसुस पाखा।

³ का ते काङको यहुदि दादा-ओनेगेलाइ कालाउ बाइ-ओनेगेलाइको भाअ्सिङ जाइ काङको ताइकोङ जातिगेलाइ दोङ हि, इम्बालाइको भाअ्सिङ ताइमिङ परमेस्वरसो साराप निङतेङ ख्रिस्टसो खेङन्हालि गोइलाउ बुङ का याको भाअ्सिङ तियार हिघाखा।

⁴ इम्बालाइ का भाइकाङ इस्राएल सारभिको द्‍याङगेलाइ दोङ हि, कालाउ परमेस्वर इम्बालाइहेङ ताइको धर्म जामालको रुपता छाल्हि। कालाउ वा ताइको महिमा इम्बालाइहेङ देखाल पापिहि। एबालाइ दोफा दोङ कारार धेउहि, व्यवस्था पिहि, ताइको आराधाना पालि माउका पिहि, कालाउ वाको प्रतिग्यागेलाइ इम्बालाइ निङहि।

⁵ आब्राहाम, इसाहाक कालाउ याकुब इम्बालाइको पुर्खागेलाइ दोङ हि, कालाउ ख्रिस्ट बुङ जिउ आन्सार इम्बालाइकोङ हारागुटिया पाहासो हि। परमेस्वर जाइ झाराङ ह्रुता सासन पाखे, वाको बाखानाइ जेलाउलाउको भाअ्सिङ ज्याको। आमेन।

⁶ कालाउ परमेस्वर ताइको बचन पुरा पालि आसफल जेङका मान्थु। हाइपालिपानु इस्राएलको हारागुटियासो जोलोम जेङका झाराङ बास्ताबता परमेस्वरको द्‍याङ माको।

⁷ कालाउ आब्राहामको हारागुटियासो जोलोम जेङका गोताङ सान्तानगेलाइ परमेस्वरको सान्तान जेङलि माद्वाङ। हाइपालिपानु परमेस्वर आब्राहाम दोफा दोअ्हि, “इसाहाकको हारागुटियासो जोलोम जेङका सान्तान दोङ नाङको हारागुटियाता दोअ्न्हावा।”

⁸ याको माने, आब्राहामको गोताङ सान्तान परमेस्वरको सान्तान माको, भरु परमेस्वर प्याङका दोअ्का प्रतिग्या पाका दोङ आब्राहामको सान्तान दोङ हि।

⁹ हाइपालिपानु परमेस्वर एसापा प्रतिग्या पाका हिघाहि, “लोका बासार इदोङ सोमोइता का घुरितेङ लोलाउ नाङको बे साराको एनोङ चान ह्यावा।”

¹⁰ इदोङ झोको खिनिङ माको, रेबिका बुङ केलाइको पुर्खा इसाहाकसो जाउथ्या चानगेलाइहेङ जोलोम पिहि।

^11-12 कालाउ जाउथ्या जामाललाइ जोलोमलि खान्तेङ लाम्फासोङ, इम्बालाइ हिदोइ बुङ रेम्का कालाउ मारेम्का काम पालि खान्तेङ लाम्फा दोङ, परमेस्वर जाउथ्यागेलाइ मध्ये एमिहेङ चुनितेङ रेबिकाहेङ दोअ्हि, “जेठा चाहि कान्छाको सेवा पावा।” एसापा परमेस्वरको चुनिका काम द्‍याङगेलाइको काम खाङतेङ माको, भरु वाको ताइकोङ इच्छा आन्सार जेनाङ वा पाक्का पाहि।

¹³ जेसा धर्मसास्तरता लेखेका हि, “याकुबहेङ का प्रेम पाघा, कालाउ एसाबहेङ मन्दा माताघा।”

¹⁴ एला केलाइ हाइ दोअ्लि कुनु? हाइ ताइमि साल्लि भोका द्‍याङहेङ छाल्तेङ परमेस्वर आन्याय पाखे? मिधुलाउ बुङ माको!

¹⁵ हाइपालिपानु परमेस्वर मोसाहेङ दोअ्हि, “जाइ ह्रुता का क्रिपा पालि भोखा, वासेहेङ का क्रिपा पाङका, कालाउ जाइहेङ दायालि भोखा, वासेहेङ का दायाताङका।”

¹⁶ ओदोङ भाअ्सिङ द्‍याङको इच्छा माकुनु कोसिसहोइ माको, कालाउ जाइहेङ परमेस्वर क्रिपा पालि भोखे कालाउ वासेहेङ चुनिखे।

¹⁷ हाइपालिपानु परमेस्वर मिस्रो सारभिको राजा फारोहेङ दोअ्हि, “का नासेहेङ राजा बानाइघा कालाउकि का ताइको सरबुङ तिङपालि द्वाको जाइ पाहासो गोताङ सुमिङको द्‍याङगेलाइ कासेहेङ नालाको।”

¹⁸ ओदोङ भाअ्सिङ परमेस्वर इच्छा पाकालाइहेङ वा क्रिपा पाखे, कालाउ जाइहेङ वा राङका बानाइलि चाहिखे, वाको हृदयहेङ राङका बानाइ पिखे।

¹⁹ कालाउ हासु बुङ कासेहेङ एसा दोअ्तावा, “जेसापा एन्सा जेङनु हाइ पालि परमेस्वर केलाइहेङ गलत हिसुना दोअ्खे? हाइपालिपानु हासु बुङ परमेस्वरहेङ ताइमिहेङ गोइका काम पालिसो रोकिलि माद्वावा।

²⁰ कालाउ नाअ् द्‍याङ जेङतेङ परमेस्वर दोफा नुइ-नुइ लागेका नाअ् हासु? हाइ भोनोइको भान्डा ताइमिहेङ बानाइकाहेङ कासेहेङ हाइ पालि इसिका बानाइन्हा दोअ्खे रो?”

²¹ हाइ एनोङ दोङ भोनोइको भुकुन्दिसो एनोङ महत्व पुर्न भान्डा, कालाउ भेनेङ चाहि साधारन कामको भाअ्सिङ भान्डा बानाइलि कुमालेको खाबारा मान्थु रो?

²² एन्साङ पातेङ परमेस्वरहेङ बुङ ताइमिङ दोङ बानाइका द्‍याङगेलाइ दोफा ताइको इच्छा आन्सार पालि खाबारा हि। परमेस्वर ताइको चेरचुङ तिङपालि कालाउ नासा पालि झाराङको बिरोधता ताइको सरबुङ देखाल पालि भोखे, कालाउ वा धर्य दोफा इम्बालाइहेङ सहि पिहि।

²³ परमेस्वर एसा पाहि, हाइपालिपानु वा ताइमिङ छाल्का द्‍याङगेलाइहेङ दाया पातेङ ताइको गेनेगेल्का महिमा इम्बालाइ दोफा बाखाराइलि भोघाखे।

²⁴ यहुदि ह्याको चाहे गैर-यहुदि ज्याको, केलाइते वाको चुनिका द्‍याङगेलाइ हिनाहि।

²⁵ गैर-यहुदिगेलाइको बिसोइता परमेस्वर ताइको बक्ता होसेको कितापता दोअ्का हि, “जेदोङ काङको द्‍याङगेलाइ मान्थुघाहि, इम्बालाइहेङ का काङको द्‍याङगेलाइ बानाइ याङका। कालाउ जाइहेङ का प्रेम पाका मान्थुघाखा, उङकोहेङ का काङको प्रिय द्वाङका।

²⁶ कालाउ जेता परमेस्वर नेलाइ काङको द्‍याङ माको, दोअ्तेङ इम्बालाइहेङ दोअ्का हिघाहि, ओदोङ बान्चिका परमेस्वर इम्बालाइहेङ ताइको सान्तान दोअ्तेङ काइयाङ।”

²⁷ कालाउ परमेस्वरको बक्ता यासाइया इस्राएलको द्‍याङगेलाइको बारेता एसा दोअ्खे, “इस्राएलको सान्तानको सङख्या समुन्द्रको बाला झोकोङ हेन्जा हिलाउ बुङ, इम्बालाइ मध्ये आधिमि खिनिङ मुक्ति निनावा।

²⁸ हाइपालिपानु प्रभु धेमाङ दोङ सुमिङको गोताङ द्‍याङगेलाइहेङ न्याय पाङ।”

²⁹ जेसाङ परमेस्वरको बक्ता यासाइया लाम्फा बुङ दोअ्का हि, “सेनागेलाइको प्रभु केलाइको भाअ्सिङ आधे हारागुटिया माअ्लाधि कानु, केलाइ सोदोम कालाउ गमोरा सहरको द्‍याङगेलाइ भाइपा जेङधाङ, जाइहेङ परमेस्वर पुर्न रुपता नासा पाहि।”

इस्राएलको खाङधुरि मापाका

³⁰ का दोअ्लि खाङका काथा इदोइ दोङ हि, इङको गैर-यहुदिगेलाइ ताइमिहेङ परमेस्वरको आगाता धर्मि बानाइलि कोसिस मापाहि, कालाउ इम्बालाइकोङ खाङधुरिको कारनहोइ परमेस्वर इम्बालाइहेङ धर्मि बानाइहि।

³¹ कालाउ इस्राएलको द्‍याङगेलाइ मोसाको व्यवस्था केम्तेङ परमेस्वर पाहासो धर्मि जेङलि कोसिस पाहि कालाउ बुङ इम्बालाइ इङको धार्मिकता मानिङहि।

³² या हेसा सम्भब हि? हाइपालिपानु खाङधुरि पाहासो माको कालाउ आसल कामगेलाइ पातेङ इम्बालाइ परमेस्वरसो धर्मि जेङलि कोसिस पाहि कालाउ धर्मि जेङलि मादोहि। ओदोङ भाअ्सिङ इम्बालाइको भाअ्सिङ ख्रिस्ट चाहि ठुनिन्चातेङ थोबिन्हाका उन्ठुइ भाइका जेङहि।

³³ जेसाङ धर्मसास्तरता लेखेका हि, “खाङसु, का यरुसेलेमता एनोङ उन्ठुइ ताअ्ताङका, जेदोङता द्‍याङगेलाइ ठुनिन्चातेङ थोबिन्हावा, कालाउ एनोङ चट्टान जाइता इम्बालाइ लोनावा, कालाउ वाकोता भोरोसा ताअ्का हासु बुङ लेदेरलि मागोइयाङ।”