रोमि 8 - Dhimal NTपबित्तरो आत्मासो निङका जिबन 1 ओदोङ भाअ्सिङ, एला ख्रिस्ट येसु दोफा हिकालाइहेङ परमेस्वर मादुसिताङ। 2 हाइपालिपानु पबित्तरो आत्मा नासेहेङ जिबन प्याङ, जेदोङ येसु ख्रिस्टसो लोखे कालाउ नासेहेङ पाप कालाउ आत्मिक सिकासो लाअ्पाका हि। 3 हाइपालिपानु केलाइको पापमय स्वभाबको कारनहोइ जेदोङ काम मोसाको व्यवस्था बुङ पालि मादोहि, इङको ताइमिङ परमेस्वर दोङ पाहि। वा ताइको चानहेङ केलाइकोङ पापमय जिउको स्वरुपता भाइकाङ केलाइको पापको भाअ्सिङ भोग भाइपाङ दिङगिल्हि। कालाउ एसापा परमेस्वर ताइको चानको जिउपाहासो पापको सरबुङ नासा पाहि। 4 वा इसिका पाहि, कालाउकि व्यवस्थाता गोइका उचित काथा पुरा ज्याको, केलाइ जाइ केलाइको पाप स्वभाव आन्सार माको, भरु पबित्तरो आत्मा आन्सार काम पानाखे। 5 हाइपालिपानु पापमय स्वभाबको आधिनता हिकालाइ पापमय काथागेलाइको बारेता सोचिखे, कालाउ पबित्तरो आत्माको आधिनता हिकालाइ पबित्तरो आत्माहेङ खुसि बानाइका काथागेलाइ सोचिखे। 6 हाइपालिपानु पापमय स्वभाबको काथागेलाइको बारेता सोचिकालाइ आत्माता सिखे, कालाउ पबित्तरो आत्माको आधिनता हिकालाइ चाहि जिबन कालाउ सान्तिता हिखे। 7 हाइपालिपानु पापमय स्भाबको आधिनता हिका द्याङ चाहि परमेस्वरको सतुरु दोङ हि। हाइपालिपानु वा परमेस्वरको व्यवस्थाहेङ आग्या केम्का मान्थुखे, कालाउ ना ते वा आग्या केम्लि दोङ द्वावा। 8 पापमय स्भाबको आधिनता हिका द्याङगेलाइ परमेस्वरहेङ हिदिकाल बुङ खुसि पालि मादाङ। 9 जेसापा साचिकोङ नेलाइ दोफा पबित्तरो आत्मा हिखे पानु, नेलाइ ताइको पापमय स्वभाबको आधिनता माको, भरु पबित्तरो आत्माको आधिनता हिस्वाना। कालाउ हिदोइ बुङ द्याङता ख्रिस्टको आत्मा मान्थुहि पानुते वा ख्रिस्टको मिधुलाउ बुङ माको। 10 कालाउ जेसापा ख्रिस्ट नेलाइकोता हि पानु, पापको कारन नेलाइको जिउ सिका हिलाउ बुङ नेलाइको आत्मा धार्मिकताको कारन बान्चिखे। 11 कालाउ जेसापा येसुहेङ सिकासो सिन्हु पाकाको परमेस्वरको आत्मा नेलाइ दोफा हि पानु, येसु ख्रिस्टहेङ सिकासो सिन्हु पाका दोङ हि, नेलाइता हिका वाको आत्मासो नेलाइको सिलि तोम्का जिउहेङ बुङ जिबन प्याङ। 12 ओदोङ भाअ्सिङ खान्धुराइ ओनेगेलाइ, केलाइ परमेस्वरको आत्माहोइ दोअ्का आन्सार जियाइलि गोइखे, कालाउ केलाइहेङ केलाइको पापमय स्वभाबको इच्छा आन्सार जियाइलि मागोयाङ। 13 हाइपालिपानु जेसापा नेलाइ ताइको पापमय स्वभाबको आन्सार जियाइस्वाना पानु, नेलाइ आत्मिक रुपसो सिस्वाना, कालाउ जेसापा नेलाइ पबित्तरो आत्मासो जिउको पापमय स्वभाबहेङ नासा पास्वाना पानु, नेलाइ बान्चिस्वाना। 14 हाइपालिपानु झाराङ जाइ परमेस्वरको आत्माहोइ थोङका हिखे, इम्बालाइ दोङ साचिकोङ परमेस्वरको सानतानगेलाइ दोङ हि। 15 हाइपालिपानु आरोङ थिलि गोइका बान्धाइतिको आत्माता नेलाइ निङका मान्थुसुना, कालाउ केलाइ परमेस्वरको सान्तान जेङलि परमेस्वरको आत्मा निङका हिनाहि, ओदोङ भाअ्सिङ केलाइ परमेस्वरहेङ “आब्बा, आबा” दोअ्तेङ काइन्हाखे। 16 पबित्तरो आत्मा केलाइ परमेस्वरको सान्तान दोङ दोअ्तेङ केलाइको आत्मा दोफा साक्सि पिका हि। 17 कालाउ केलाइ परमेस्वरको सान्तान नुते उत्ताराधिकारि बुङ हिनाहि, परमेस्वरको उत्ताराधिकार कालाउ ख्रिस्ट दोफा साझा-उत्ताराधिकारि। कालाउ जेसापा केलाइ ख्रिस्ट भाइपाङ दुख पिडागेलाइ भोगिन्हाखे पानुते केलाइ बुङ ख्रिस्ट दोफाङ महिमित जेनाङ। न्हुसोको महिमा 18 का पाक्का हिघा, कि इङको महिमा जेदोङ परमेस्वर केलाइहेङ प्याङ, इङको केलाइ एला भोगेका कस्टगेलाइ खान्तेङ बार्का जेनाङ। 19 हाइपालिपानु गोताङ सिरजाइ, बार्का आसहोइ परमेस्वरको सान्तानको देखाल जेङका खाङलि ह्रुम्तेङ हि। 20 हाइपालिपानु परमेस्वर सिरजाइकाको गोताङ आनेमानेगेलाइ याको मुल्य राम्पाका हि, या ताइकोङ इच्छाहोइ माको, कालाउ परमेस्वर दोङ इसिका जेङलि पिहि। कालाउ बुङ आस हि। 21 सिरजाइ ताइमिङ बुङ ओदोङ दिनाको आसता हि, जेलाउ वा सिका कालाउ बिनाससो मुक्त जेङतेङ परमेस्वरको सान्तानको महिमा दोफा स्वभागि जेनावा। 22 केलाइ गिनाखे, आदम पाप पाकासोङ एला थेकापा, एमि बेबाल जामालहेङ जोलोम पिलि तोम्लाउ तुनिन्चानाङ भाइपा परमेस्वर सिरजाइका गोताङ आमेनेगेलाइ बुङ तु निन्चाका भाइपाङ कस्ट भोगिदोङखे। 23 इदोङ सिरजाइकाहोइ खिनिङ माको, कालाउ केलाइ जाइ दोफा पबित्तरो आत्मा भबिस्यता निङका महिमाको लाङ झलकको रुपता हि। कालाउ इङको दिनाको भाअ्सिङ एला लेङचातेङ ह्रुम्तेङ हिनाहि, जेलाउ परमेस्वर केलाइहेङ धर्म जामालाइको रुपता गोताङ खाबारा प्याङ, माकुनु केलाइहेङ नावा जिउ पितेङ पुर्ना जिउहेङ मुक्त पाप्याङ। 24-25 हाइपालिपानु जेलाउ केलाइ मुक्ति निङन्हाहि परमेस्वर केलाइहेङ या आस पिहि, केलाइ एला थेकापा परमेस्वरको दोअ्का गोताङ काथा निङका मान्थुन्हाहि, ओदोङ भाअ्सिङ केलाइ आझाइ बुङ इङको काथा निङलि आस पानाखे। कालाउ इदोइ सोमोइता केलाइ धैर्य पातेङ ह्रुम्तेङ हिनाखे जेलाउ थेकापा केलाइ इङको काथा मानिनाङ। 26 एन्साङ पातेङ पबित्तरो आत्मा जाइ खाङधुरिता हुइका हि वासेहेङ साघाइखे। हाइपालिपानु हेसा प्रार्थाना पालि गोइखे केलाइ हाइ दोङ मागिनाखे, कालाउ पबित्तरो आत्मा ताइमिङ हिदोइ बुङ द्याङ ब्यक्त पालि मादोका सब्दगेलाइसो केलाइको भाअ्सिङ प्रार्थाना पापिखे। 27 कालाउ द्याङगेलाइको ह्रदय गिका परमेस्वर पबित्तरो आत्माको बिचार हाइ हि इङको गिखे, हाइपालिपानु पबित्तरो आत्मा खान्धुराइगेलाइको भाअ्सिङ परमेस्वरको इच्छा आन्सार वाको दोफा प्रार्थाना पापिखे। 28 केलाइ गिनाखे, कि वासेहेङ प्रेम पाकालाइ कालाउ वाको उदेस्य आन्सार चुनिकालाइको भाअ्सिङ गोताङ काथाता परमेस्वर भलाइ दोङ पाखे। 29 हाइपालिपानु जाइ-जाइहेङ परमेस्वर लाम्फासोङ चुनिका हि, वा इम्बालाइहेङ ताइको चान भाइपा जेङलि लाम्फासोङ चुनिहि, कालाउकि वाको चान गोताङ ओनेगेलाइ खान्तेङ जेठा ज्याको। 30 जाइ-जाइहेङ वा लाम्फासोङ चुनिहि, इम्बालाइहेङ वा काइहि, कालाउ जाइ-जाइहेङ वा काइहि, इम्बालाइहेङ वा धर्मि बुङ बानाइहि, कालाउ जाइ-जाइहेङ वा धर्मि बानाइहि, इम्बालाइ दोफा ताइको महिमा बुङ बाखाराइहि। 31 इदोइ गोताङ काथागेलाइहेङ ध्यानता ताअ्तेङ केलाइ या निस्करसता पुगिलि द्वाङ, कि जेसापा परमेस्वर केलाइ दोफा हि पानु, हासु बुङ केलाइहेङ हारिपालि माद्वावा। 32 परमेस्वर ताइको चानहेङ बुङ ताइको भाअ्सिङ बाकि माअ्ताहि, कालाउ केलाइ झाराङको भाअ्सिङ वासेहेङ सतुरुगेलाइहेङ सुम्पिपिहि, ओदोङ भाअ्सिङ वा निसित दोङ केलाइहेङ प्रतिग्या पाका गोताङ आमेने एन्साङ प्याङ। 33 हाइ बुङ केलाइहेङ परमेस्वरको आगाता दुसुलि माद्वावा, हाइपालिपानु परमेस्वर दोङ केलाइहेङ धर्मि बानाइका हि। 34 हासु बुङ केलाइहेङ दुसिलि माद्वावा, हाइपालिपानु येसु ख्रिस्ट दोङ केलाइको भाअ्सिङ सिपिहि कालाउ सिकासो सिन्चाल्हि। कालाउ एला वा परमेस्वर दोफा हि, कालाउ केलाइको भाअ्सिङ मध्येस्ता बुङ पाखे। 35 केलाइहेङ हासु बुङ ख्रिस्टको प्रेमसो खेङलि माद्वाङ। ना ते सङकस्टहोइ, ना ते दुखहोइ, ना ते साताइकाहोइ, ना ते लालाइकाहोइ, ना ते दरिद्द्रताहोइ, ना ते खाताराहोइ, ना ते तरवारहोइ। इदोइ हिदोइ बुङ काथाहोइ केलाइहेङ ख्रिस्टको प्रेमसो खेङलि माद्वावा। 36 जेसाङ धर्मसास्तरता इसिका लेखेका हि, “नाङको भाअ्सिङ केलाइ लिपाङ सिनाखे, कालाउ केलाइ पाल्लि चुम्पुका भेडा भाइकाङ गान्धिन्हाका हिनाहि।” 37 कालाउ या गोताङ मारेम्का काथागेलाइ जेङलाउ बुङ, केलाइहेङ प्रेम पाका येसु ख्रिस्ट पाहासो केलाइ इदोइ गोताङ काथागेलाइ ह्रुता बार्का जित निङका हिनाहि। 38 हाइपालिपानु का या पाक्का गिखा, हिदोइ बुङ काथाहोइ केलाइहेङ येसु ख्रिस्टको प्रेमसो खेङलि माद्वावा। ना ते सिकाहोइ, ना ते जिबनहोइ, ना ते स्वर्गदुतगेलाइहोइ माकुनु प्राधानताहोइ, ना ते सुमिङको सरबुङहोइ, ना ते बर्तमानको काथागेलाइहोइ, ना ते न्हुसो लोका काथागेलाइहोइ, 39 ना ते आकासको झाउकाहोइ, ना ते समुन्द्रको वाङखाराकाहोइ, ना ते गोताङ सिरजाइकाता हिका काथागेलाइहोइ केलाइहेङ परमेस्वरको प्रेमसो खेङलि द्वावा, हाइपालिपानु परमेस्वर केलाइहेङ प्रभु येसु ख्रिस्ट पाहासो प्रेम पाका हि। |
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
Beyond Translation