रोमि 7 - Dhimal NT

बिहुको एनोङ उधारन

¹ खान्धुराइ ओनेगेलाइ, नेलाइ गिसुखेना कि, का मोसाको व्यवस्था बुझिकालाइ दोफा दोअ्दोङखा, द्‍याङगेलाइ बान्चिपा भरि खिनिङ व्यवस्था लागु हिखे।

² उधारनको भाअ्सिङ, एमि बेबाल ताइको के बान्चिपा भरि व्यवस्था बोमजिम वाको दोफाङ हिलि गोइखे। कालाउ जेसापा वाको के सिहि पानु वा बिहुको सामान्दासो मुक्त जेङखे।

³ कालाउ जेसापा उङको बेबाल ताइको के हिलाउ दोङ भेनेङ वाबाल दोफा बिहुपाहे पानु वा कासिबिरि जेङखे। कालाउ जेसापा वाको के सिहे पानु वा व्यवस्थाको बन्धनसो मुक्त जेङखे कालाउ ताइको के सिका न्हुसो वा भेनेङ वाबाल दोफा बिहुपाहे पानु वा कासिबिरि माजेङखे।

⁴ एसापा दोङ काङको खान्धुराइ ओनेगेलाइ, एला नेलाइ ख्रिस्ट दोफा सिसुन्हा, नेलाइ व्यवस्थाको भाअ्सिङ बुङ सिका हिसुना। कालाउ एला ख्रिस्टको हिसुना जाइ सिकासो सिन्चाल्का हि, कालाउकि नेलाइ परमेस्वरको भाअ्सिङ आसल जिबन जियाइलि दोसु।

⁵ हाइपालिपानु जेलाउ केलाइ पापमय स्वभाबको आधिनता हिघान्हाहि, व्यवस्थाहोइ केलाइहेङ पापमय कामगेलाइ पालि मन जागाइ पिहि। इदोइ पापमय स्वभाबहोइ केलाइको जिउको गोताङ आङगहेङ बान्धाइति बानाइहि जेदोङहोइ सिका चुमाखे।

⁶ एला केलाइ पुर्ना तरिकासो व्यवस्था केम्का भाइका माको, कालाउ परमेस्वरको आत्माको नावा तरिका आन्सार वाको सेवा पानाखे। हाइपालिपानु केलाइ ख्रिस्ट दोफा सिनाङ इदोइ व्यवस्थाको आधिनसो मुक्त जेङका हिनाहि।

पाप दोफा सङघरसो

⁷ केलाइ हाइ दोअ्लि कुनु? व्यवस्था दोङ पाप चुमाहि? मिधुलाउ बुङ माको! जेसापा व्यवस्था मान्थुनु का पाप हाइ वाला दोअ्तेङ थाहा मागिधाङका, हाइपालिपानु “नाअ् चिचा माजेङ” दोअ्तेङ व्यवस्था दोङ मादोअ्नु चिचा जेङलि माएल दोअ्तेङ थाहा मागिधाङका।

⁸ कालाउ पापहोइ आग्याहेङ प्रयोग पातेङ काङकोता गोताङ खाल्को लोभ पाका इच्छागेलाइ उब्जाइपाहि। हाइपालिपानु व्यवस्था माकोसिङते पाप सिका हि।

⁹ व्यवस्थाहेङ माबुझिसिङ हिलाउ एखेप का बान्चितेङ हिघाखा, कालाउ जेलाउ का व्यवस्थाहेङ बुझिघा, झन पाप पालि इच्छा जागिहि, कालाउ का चाहि आत्माता सिघा।

¹⁰ जिबन चुमालि गोइका व्यवस्थाते काङको भाअ्सिङ आत्मिक सिका कि चुमाहि।

¹¹ हाइपालिपानु पापहोइ आग्याहेङ प्रयोग पातेङ कासेहेङ धाताइहि, कालाउ ओदोङहोइ कासेहेङ आत्माता सेअ्हि।

¹² एन्सा पानु व्यवस्था पबित्तरो हि, कालाउ आग्या बुङ पबित्तरो हि, कालाउ न्याय बुङ आसल हि।

¹³ हाइ व्यवस्था जाइ आसल हि कासेहेङ आत्मिक सिका पिहि? मिधुलाउ बुङ माको! भरु पाप चाहि पापको रुपता तिनाको दोअ्तेङ इङको रेम्का काथासो पापहोइ काङकोता आत्मिक सिका उब्जाइपाहि, कालाउकि आग्याहोइ पापहेङ हेन्जा मारेम्का तिङपाको।

¹⁴ हाइपालिपानु केलाइ गिनाखे, कि व्यवस्था आत्मिक हि, कालाउ का चाहि जिउको स्वभाव आन्सार हिगिल्खा कालाउ का पापको बन्धनता हिघा।

¹⁵ का हाइ पाखा इङको मागिखा, हाइपालिपानु का जेदोङ सहि हि ओदोङ पालि भोखा, कालाउ इङको का मापाखा। भरु का ओदोङ पाखा जेदोङहेङ का सिकाका।

¹⁶ जेसापा का मारेम्का काम पाखा जेदोङ का पालि माभोखा पानु, का व्यवस्था रेम्का हि दोअ्तेङ मानियाङका।

¹⁷ ओदोङ भाअ्सिङ मारेम्का पाका का माको, भरु याते काङकोता हिका पापहोइ पाका हि।

¹⁸ हाइपालिपानु कासेहेङ थाहा हि, कि काङको पापमय स्वभाबता हाइ दोङ आसल काथा मान्थु, हाइपालिपानु जेदोङ रेम्का हि, इङको पालि इच्छा का दोफा हि, कालाउ का इङको पालि माद्वाङका।

¹⁹ हाइपालिपानु जेदोङ रेम्का काम पालि का खाङखा, इङको का मापाखा, कालाउ दुस्ट काम जेदोङ का पालि माखाङखा, ओदोङ का पाखा।

²⁰ एला का जेदोङ इच्छा मापाखा, ओदोङ काम पाखा पानु, इङको पाका का माको, भरु काङकोता हिका पापहोइ दोङ पाखे।

²¹ ओदोङ भाअ्सिङ का ताइमिङता एनोङ नियमहोइ काम पाका निङखा। का रेम्फा पालि खाङखा, कालाउ का मारेम्का काम कि पाखा।

²² हाइपालिपानु का काङको गोताङ ह्रदयहोइ परमेस्वरको व्यवस्थाता लेङचाका हिघा।

²³ कालाउ का चाहि काङको जिउको आङगगेलाइता जेङका भेनेङ नियमहोइ काङको मनता हिका नियम दोफा धुम पाखे, इङकोङ सरबुङहोइ कासेहेङ पापको बान्धाइति बानाइखे, जेदोङ पाप काङकोता एला थेकापा बुङ हि।

²⁴ हाय, का हेथे दुखि द्‍याङ हिघा, इदोइ आत्मिक सिकासो कासेहेङ हासु लाअ्पावा?

²⁵ ओदोङ भाअ्सिङ प्रभु येसु ख्रिस्ट पाहासो बान्चिपाका परमेस्वरहेङ का धन्यबाद प्याङका। काङको मनता का परमेस्वरको व्यवस्था केम्लि इच्छा पाखा कालाउ काङको पापमय स्वभाबको कारनहोइ का लागातार पाप पातेङ हिखा।