रोमि 6 - Dhimal NT

पापता सिका, ख्रिस्टता जिबन

¹ एला केलाइ हाइ दोअ्लि? परमेस्वर ताइको आनुग्रहसो केलाइको पाप स्यामा पापिखे। कालाउ केलाइ एसापा दोअ्लि माएल कि आनुग्रह हेन्जा ह्याको दोअ्तेङ केलाइ पाप पातेङ ह्याइने।

² एन्सा माज्याको! केलाइते पापको भाअ्सिङ सिलि दोनाहोइ, ओदोङ भाअ्सिङ केलाइ एला लागातार जिबनता पाप पालि माएल।

³ केलाइ गिनाखे कि, जेलाउ केलाइ येसु ख्रिस्टता बप्तिस्ता ह्रुनाहि केलाइ वाको दोफाङ सिन्हाहि।

⁴ ओदोङ भाअ्सिङ जेलाउ केलाइ बप्तिस्ता ह्रुन्हाहि, कालाउ केलाइ ख्रिस्ट दोफाङ सिन्हाहि कालाउ वाको दोफाङ लिन्हाहि। कालाउकि जेसाङ आबा परमेस्वर ताइको महिमा पाहासो ख्रिस्टहेङ सिकालाइसो सिन्हु पाहि, एन्साङ दोङ केलाइ बुङ नावा जिबन निङतेङ बान्चियाङ।

⁵ हाइपालिपानु जेसापा केलाइ वाको सिकाता वाको दोफा एनोङ दोङ जेङका हिनाहि पानु, वाको सिन्चालकाता बुङ निसित दोङ केलाइ वाको दोफा ए जेङतेङ ह्याङ।

⁶ केलाइ गिनाखे कि, केलाइको पापमय ब्यभार ख्रिस्ट दोफा क्रुस्टा तोइन्हाहि, कालाउकि केलाइको जिउको पापमय स्वाभाब नासाताको, कालाउ एलासो केलाइ ताइमिङ पापको बान्धाइति माजेनाइने।

⁷ हाइपालिपानु एला केलाइ ख्रिस्ट दोफा सिका हिनाहि, केलाइ पापको बन्धनसो मुक्त जेङका हिनाहि।

⁸ एला जेसापा केलाइ येसु ख्रिस्ट दोफाङ सिका हिनाहि पानु, केलाइ खाङधुरि पानाखे कि, केलाइ बुङ वाको दोफाङ बान्च्याङ।

⁹ हाइपालिपानु केलाइ गिनाखे कि, येसु ख्रिस्ट सिकालाइसो सिन्हुतेङ आरोङ हेलाउ बुङ मासियाङ, कालाउ वाको ह्रुता सिकाको एला हिदोइ बुङ खाबारा मान्थु।

¹⁰ हाइपालिपानु जेलाउ ख्रिस्ट सिहि, कालाउ वा झाराङ द्‍याङको पापको भाअ्सिङ एधामासिङ सिहि, कालाउ एला वा सिन्हुका हि, कालाउ परमेस्वरको सेवा पालि वा सिन्हुताङ।

¹¹ एन्साङ पातेङ नेलाइ बुङ ता-ताइमिहेङ पापको आधिनसो सिका, कालाउ ख्रिस्ट येसुता परमेस्वरको सेवाको भाअ्सिङ सिन्हुका दोअ्का थानिलि गोइखे।

¹² ओदोङ भाअ्सिङ नेलाइको जिउको पापि इच्छागेलाइहेङ नेलाइको जिबनहेङ काबुता पालि मापि, कालाउ ताइको पापमय इच्छा आन्सार काम मापा।

¹³ नाङको जिउको आङगगेलाइहेङ दुस्ट कामगेलाइ पालि आर्पन मापासु। भरु सिकासो जिबनता चुमाका द्‍याङगेलाइ भाइपा ताइको जिबन परमेस्वरता सुम्पिसु। कालाउ नाङको आङगगेलाइहेङ ठिक काम पालिको भाअ्सिङ परमेस्वरहेङ सुम्पिसु।

¹⁴ हाइपालिपानु पापहोइ नेलाइहेङ आधिनता पालि माद्वाङ, हाइपालिपानु नेलाइ मोसाको व्यवस्थाको आधिनता मान्थु सुन्हा, कालाउ परमेस्वरको आनुग्रहको आधिनता हिसुना।

धार्मिति बान्धाइति

¹⁵ हाइपालिपानु केलाइ व्यवस्थाको आधिनता मान्थुन्हाहि कालाउ परमेस्वरको आनुग्रहको आधिनता हिनाहि, ओदोङ भाअ्सिङ केलाइ पाप पालि माएल।

¹⁶ नेलाइ गिसुखेना कि, जेलाउ नाअ् ताइमिहेङ हासुको बुङ बान्धाइति जेङलि प्याना, कालाउ इङको द्‍याङ नाङको ग्रिहि जेङखे कालाउ वाको दोअ्का काथा नाअ् दोङ पालि गोयाना। कालाउ नाअ् पापको बुङ बान्धाइति जेङलि द्वाना जाइ नासेहेङ सिका भारि चुम्पुखे माकुनु नाअ् परमेस्वरको आग्या केम्लि बुङ दोसु, जाइ नासेहेङ धार्मिक जिबन भारि चुम्पुवावा।

¹⁷ नेलाइ लाम्फा पापको बान्धाइति हिघासुखेना, कालाउ एला नेलाइ निङका सिक्स्या किलि केम्का जेङका हिसुना। कालाउ का वाको भाअ्सिङ परमेस्वरहेङ ह्रदयसोङ धन्यबाद पिखा।

¹⁸ परमेस्वर नेलाइहेङ पापको सरबुङसो मुक्त पाहि, कालाउ नेलाइ ठिक काम पालिको भाअ्सिङ परमेस्वरको बान्धाइति जेङका हिसुना।

¹⁹ का केलाइको दिनाङको जिबनसो नेलाइहेङ रेम्फासो बुझिपालि दोअ्तेङ उधाहरन पितेङ दोअ्दोङखा, हाइपालिपानु जेसाङ नेलाइ एखेप ताइको जिउको आङगगेलाइहेङ आसुद्द कालाउ मारेम्का काम पालिको भाअ्सिङ सुम्पिसुन्हा, एला एन्साङ दोङ ताइको जिउको आङगगेलाइहेङ पबित्तरो कालाउ धार्मिक जिबन जियाइलिको भाअ्सिङ सुम्पिसु।

²⁰ जेलाउ नेलाइ जेलाउ बुङ पापको बान्धाइति हिघासुखेना, नेलाइ ठिक कामगेलाइ पालि मादोघासुखेना।

²¹ नेलाइ दुस्ट कामगेलाइ पासुन्हा, कालाउ इङको काथागेलाइको भाअ्सिङ एला नेलाइ लेदेरसुन्हा। एन्सा पातेङ नेलाइ इङको काथागेलाइहोइ हाइ प्रतिफल निङसुन्हा? इङको काथागेलाइहोइते सिका चुमाहि।

²² कालाउ एला नेलाइ पापसो मुक्त जेङतेङ परमेस्वरको बान्धाइति जेङका हिसुन्हा। कालाउ नेलाइ इङको काथा पासुखेना जाइ पबित्तरोता थोङखे, कालाउ इङको को आन्त चाहि आनान्त जिबन दोङ हि।

²³ हाइपालिपानु पापको परिनाम चाहि सिका दोङ, कालाउ परमेस्वरको पिका बरदान चाहि ख्रिस्ट येसु केलाइको प्रभुता आनान्त जिबन दोङ।