रोमि 4 - Dhimal NT

आब्राहामहेङ खाङधुरि पाहा धर्मि बानाइका

¹ एन्सा पानु, केलाइ यहुदिगेलाइ केलाइको पुर्खा आब्राहामको बारेता हाइ दोअ्लि? वा हेसा धर्मि जेङहि?

² जेसापा आब्राहाम ताइको रेम्का कामसो परमेस्वर पाहासो धर्मि जेङका नु, वासेहेङ घमन्ड पालि हिदोइ बुङ थामे हिधावा। कालाउ बुङ परमेस्वरको आगाता आब्राहाम ताइको रेम्का काम पाकाता घमन्ड पाका थामे मान्थु।

³ धर्मसास्तर हाइ दोअ्खे? “आब्राहाम परमेस्वरको काथाता खाङधुरि पानाङ परमेस्वर वासेहेङ धर्मि बानाइहि।”

⁴ एला काम पाका जेदोङ ज्याला निङखे इङको दान माको भरु इङको वाको निङका होक हि।

⁵ कालाउ जाइ परमेस्वरको आनुग्रह निङलिको भाअ्सिङ काम मापाखे, कालाउ दुस्ट द्‍याङगेलाइहेङ ताइको आगाता धर्मि बानाइका परमेस्वर ह्रुता भरोसा ताअ्खे, इन्सिका द्‍याङगेलाइको खाङधुरिको कारन इम्बालाइ धर्मि गान्डिन्हाखे।

⁶ एसाङ पातेङ, राजा दाउद बुङ लेखेका हि, कि परमेस्वर जाइहेङ काम बिना दोङ धर्मि बानाइहि वासेहेङ परमेस्वर आसिस पिखे:

⁷ “इम्बालाइ धन्यको हि, जाइको आपाराधगेलाइ स्यामा जेङका हि, कालाउ जाइको पापगेलाइ निल्पिका हि।

⁸ उङको द्‍याङ धन्य हि, जाइको पापको लेखा परमेस्वर माह्रुकाङ।”

⁹ हाइ या आसिस खातानागेलाइको भाअ्सिङ खिनिङ हि, कि या खाताना मापाकालाइको भाअ्सिङ बुङ हि? हाइपालिपानु केलाइ धर्मसास्तरता दोअ्का काथा दोअ्काताङ लोका हिनाहि, कि आब्राहाम परमेस्वरको काथाता खाङधुरि पानाङ परमेस्वर वासेहेङ ताइको आगाता धर्मि बानाइहि।

¹⁰ या हेसा जेङहि? हाइ परमेस्वर आब्राहामहेङ वा खाताना जेङलि खाङतेङ लाम्फा ताइको आगाता धर्मि बानाइहि? माको, कालाउ परमेस्वर वासेहेङ खाताना पालि लाम्फा दोङ ताइको आगाता धर्मि बानाइहि।

¹¹ परमेस्वर आब्राहामहेङ वाको खाङधुरि पाहासो दोङ खाताना मापालाउ बुङ वाको आगाता धर्मि बानाइहि। कालाउ खातानाको चिना चाहि सुइकारका छाप दोङ हि। ओदोङ भाअ्सिङ आब्राहाम खाताना मापाका कालाउ परमेस्वरहेङ खाङधुरि पाका झाराङको आत्मिक आबा जेङका हि। कालाउ इम्बालाइको खाङधुरिको कारनहोइ धर्मि बानाइका हि।

¹² कालाउ आब्राहाम इङको खाताना पाकालाइको बुङ आबा पुर्खा जेङहि। कालाउ इम्बालाइको खातानाहोइ खिनिङ आब्राहाम ओबालाइको पुर्खा जेङका माको। कालाउ ओबालाइ बुङ आब्राहाम भाइपाङ खाङधुरिको आनुसरन पाकानाङ आब्राहाम उङको द्‍याङगेलाइको बुङ आबा पुर्खा जेङहि।

¹³ आब्राहाम मोसाको व्यवस्था केम्नाङ माको, भरु वाको खाङधुरि पाहासो परमेस्वर वासेहेङ धर्मि बानाइहि। कालाउ परमेस्वर वासेहेङ कालाउ वाको हारागुटियाहेङ सुमिङको उत्ताराधिकारि बानाइलि प्रतिग्या पाहि।

¹⁴ जेसापा व्यवस्था केम्कालाइ खिनिङ सुमिङको उत्ताराधिकार जेङखे पानुते खाङधुरि रद्द कालाउ प्रतिग्या बुङ ब्यर्थ जेनाङ।

¹⁵ हाइपालिपानु व्यवस्था गोताङ रुपहोइ माकेम्का द्‍याङगेलाइहेङ परमेस्वर दन्ड प्याङ, कालाउ जेता व्यवस्था मान्थु इन्ता आनाग्या कारि बुङ माजेनाङ।

¹⁶ ओदोङ भाअ्सिङ प्रतिग्या परमेस्वर ह्रुताको खाङधुरिता निर्भर पाखे, कालाउकि परमेस्वरको प्रतिग्या वाको आनुग्रहता पाक्का ह्याको। या प्रतिग्या आब्राहामको हारागुटियागेलाइहेङ खिनिङ माको, जाइ दोफा व्यवस्था हि। कालाउ आब्राहामको भाइका खाङधुरि पाका झाराङको भाअ्सिङ दोङ हि, हाइपालिपानु आब्राहाम केलाइ झाराङको आबा पुर्खा दोङ हि।

¹⁷ जेसाङ धर्मसास्तरता लेखेका हि, परमेस्वर आब्राहामहेङ दोअ्का हि कि, “का नासेहेङ हेन्जा जातिको आबा पुर्खा बानाइका हिघा।” जेदोङ परमेस्वर ह्रुता आब्राहाम खाङधुरि पाहि, उङको परमेस्वरको नजरता आब्राहाम केलाइ झाराङको आबा दोङ हि। आब्राहाम उङको परमेस्वरता खाङधुरि पाहि, जाइ सिकालाइहेङ बुङ सिन्हुपाखे कालाउ इङको आमेनेगेलाइहेङ बुङ आस्तित्वता चुमावा जाइको आस्तित्व दोङ मान्थु।

^18-19 परमेस्वर आब्राहामहेङ दोअ्का हिघाहि, कि नाङको हेन्जा हारागुटियागेलाइ जेनाङ, कालाउ आब्राहाम हेन्जा वाराङ जेङका हिघाहि कालाउ सान्तान जेङलि हिदोइ बुङ आस मान्थुघाहि। हाइपालिपानु आब्राहाम लगभग एसाइ बासार उमेर पुगिका हिघाहि, कालाउ साराको बुङ सान्तान जोलोम पालि उमेर हानिलि दोका हिघाहि। इदोइ गोताङ काथागेलाइहोइ तिङपाहि कि वा हेन्जा द्‍याङगेलाइको आबा जेङलि माद्वाङ, कालाउ बुङ वाको खाङधुरि आतुइसा माजेङहि। कालाउ वा लागातार खाङधुरि पातेङ हि कालाउ वा ताइको आस पालि मालाअ्हि।

²⁰ परमेस्वरको पाका प्रतिग्याहोइ काम पावा दोअ्का काथाता आब्राहाम हेलाउ बुङ साङखा मापाहि। भरु वाको खाङधुरि झन बल्लियाका जेङहि कालाउ वा परमेस्वरको महिमा पाहि।

²¹ प्रतिग्या पाका काथा परमेस्वर पालि द्वाङ दोअ्का आब्राहामहेङ पुरा निसित हिघाहि।

²² ओदोङ भाअ्सिङ, आब्राहामको खाङधुरि तिङतेङ परमेस्वर वासेहेङ ताइको आगाता धर्मि बानाइहि।

²³ “वा धर्मि बानाइका” दोअ्का बचन आब्राहामको भाअ्सिङ खिनिङ लेखेका माको,

²⁴ कालाउ केलाइको भाअ्सिङ बुङ हि, परमेस्वर केलाइहेङ बुङ धर्मि बानाइयाङ, जेसापा केलाइ परमेस्वरता खाङधुरि पानाखे, जाइ केलाइको प्रभु येसुहेङ सिकासो सिन्हु पाहि।

²⁵ येसु केलाइको पापगेलाइको भाअ्सिङ सिपिहि, कालाउ परमेस्वर केलाइहेङ वाको दोफा धर्मि बानाइलि येसुहेङ आरोङ सिन्हु पाहि।