रोमि 3 - Dhimal NT

परमेस्वरको खाङधुरि योग्य

¹ हासु बुङ हिअ्लि द्वाङ, हाइ यहुदिगेलाइहेङ गैर-यहुदिगेलाइ खान्तेङ फाइदा हि? माकुनु हाइ खाताना जेङकाता फाइदा हि रो?

² एइ, यहुदि जेङलि हेन्जा फाइदा हि, झाराङ खान्तेङ लाम्फा परमेस्वरको बचन यहुदिगेलाइहेङ दोङ सुम्पिका हि।

³ जेसापा आधेमि यहुदिगेलाइ परमेस्वरको खाङधुरि योग्य माजेङकाता हाइ जेङहि रो? एन्सा पानु हाइ परमेस्वर ताइको बाचा इम्बालाइ दोफा पुरा पालि खाङधुरि योग्य माजेङहि?

⁴ मिधुलाउ बुङ माको, परमेस्वर जेलाउ बुङ सत्ये धुइखे कालाउ गोताङ द्‍याङगेलाइ धाताइखे। जेसाङ धर्मसास्तरता परमेस्वरको बारेता लेखेका हि, “नाअ् ताइको बचनता ठिक जेङपि, कालाउ न्याय जेङलाउ नाअ् जितिपि।”

⁵ कालाउ केलाइको दुस्ट कामहोइ परमेस्वरको धार्मिकताहेङ आझाइ रेम्फा तिङपाखे पानु, केलाइ हाइ दोअ्लि? हाइ परमेस्वर केलाइ दोफा चेरताङपालि कालाउ दन्ड पिलि गलत हि रो? या तेका द्‍याङको भाइपा धुइखा।

⁶ मिधुलाउ बुङ माको, जेसापा परमेस्वर केलाइ यहुदिगेलाइको न्याय ठिकसो मापानु, वा सुमिङको गैर-यहुदिगेलाइको न्याय पाक्का बुङ मापाङ।

⁷ कालाउ हासु बुङ दोअ्लि द्वाङ, जेसापा काङको धाताइकाहोइ परमेस्वरको सत्येता कालाउ नुगामारि महिमा तिङपाखे पानु हेसा परमेस्वर कासेहेङ पापिको रुपता न्याय पाङ, कालाउ दन्ड प्याङ कालाउ वासेहेङ हेन्जा महिमा जेङखे?

⁸ केलाइको दोअ्का इदोइ काथागेलाइसो आधिमि द्‍याङगेलाइ केलाइहेङ दुसिलि द्वाङ, “केलाइ मारेम्का काम पाङ कालाउकि इदोइ पाहासो आधे रेम्का जेङलि द्वाको।” जेदोङ द्‍याङगेलाइ काङको बारेता इसिका काथागेलाइ पाखे इम्बालाइ दन्ड निङलि योग्यको हि।

धर्मि हासु बुङ मान्थु

⁹ एन्सा पानु हाइ केलाइ यहुदिगेलाइ गैर-यहुदिगेलाइ खाङतेङ हेन्जा आसल हिनाहि कुनु? माको, मिधुलाउ बुङ मान्थुन्हाहि, हाइपालिपानु झाराङ द्‍याङ, यहुदिगेलाइ कालाउ गैर-यहुदिगेलाइ गोताङ इङकोङ पापको सरबुङको आधिनता हि दोअ्तेङ का दुसिका हिघा।

¹⁰ जेसाङ धर्मसास्तर लेखेका हि, “परमेस्वरको आगाता धर्मि हासु बुङ मान्थु, एमि बुङ मान्थु,

¹¹ इता बास्ताबता ठिक काथा बुझिका हासु बुङ द्‍याङ मान्थु, इता हासु बुङ परमेस्वरहेङ नाल्लि माभोखे।

¹² इम्बालाइ झाराङ परमेस्वरसो दुरे जेङका हि, इम्बालाइ परमेस्वरको भाअ्सिङ बेकामको जेङका हि। हासु बुङ रेम्फा मापाखे, रेम्फा पाका एमि बुङ मान्थु।”

¹³ “इम्बालाइको काथा ह्वाङह्वाङका तोमसो लोका मारेम्का आइका न्हाम्का भाइका हि, इम्बालाइको देतोङ धाताइकाहोइ पोङघाका हि। इम्बालाइको नुइ धुइका पुय्याँको बिस भाइका हि, जेदोङहोइ हान्ति कालाउ सिका चुमाखे।”

¹⁴ “इम्बालाइको काथा साराप कालाउ खाका काथागेलाइहोइ पोङघाका हि।”

¹⁵ “इम्बालाइ हान्ति पालि कालाउ सेअ्लिको भाअ्सिङ मार्फा हि।

¹⁶ जेसोङ हानिलाउ बुङ इम्बालाइ मारेम्का काथा कालाउ कस्टगेलाइ चुमाखे,

¹⁷ इम्बालाइहेङ थाहा मान्थु कि हेसा सान्तिहोइ जिबन जियाइलि हि।”

¹⁸ इम्बालाइ परमेस्वर दोफा माथिखे।

¹⁹ केलाइ गिनाखे, कि जेदोङ व्यवस्था दोङ दोअ्खे, इङको व्यवस्थाकोङ आधिनता हिकालाइहेङ दोअ्खे, कालाउकि द्‍याङगेलाइ बाहाना मापाको कालाउ सुमिङता हिका गोताङ द्‍याङगेलाइ परमेस्वरको न्यायको आधिनता ह्याको।

²⁰ ओदोङ भाअ्सिङ व्यवस्था केम्तेङ आधिमि द्‍याङ परमेस्वरको आगाता धर्मि जेङलि माद्वाङ, हाइपालिपानु मोसाको व्यवस्थाहोइ तिङपाखे कि केलाइ पापि हिनाहि।

खाङधुरि पाहासो धार्मिकता

²¹ कालाउ एला मोसाको व्यवस्थाको गोताङ नियमगेलाइ माकेम्नाङ बुङ परमेस्वर पाहासो लोका धार्मिकता देखाल जेङका हि। इदोइ मोसाको व्यवस्था कालाउ परमेस्वरको बक्तागेलाइको कितापता हेन्जा सोमोइ लाम्फा लेखेका हिघाहि कि केलाइ हेसा परमेस्वर पाहासो धर्मि जेनाङ।

²² एसापा परमेस्वर ताइको आगाता येसु ख्रिस्टता खाङधुरि पाका झाराङहेङ धर्मि बानाइका हि, हाइपालिपानु परमेस्वर झाराङ दोफा सामान ब्यभार पाखे।

²³ हाइपालिपानु झाराङ पाप पाका हि, कालाउ परमेस्वरको महिमा थेकापा थुकालि दोका मान्थु।

²⁴ कालाउ परमेस्वर ताइको आनुग्रह पाहासो केलाइहेङ केलाइको पापगेलाइको दन्डसो येसु ख्रिस्टको माध्यम पाहासो लाअ्पाका हि, कालाउ परमेस्वर केलाइहेङ एन्साङ दोङ धर्मि बानाइका हि।

²⁵ परमेस्वर येसु ख्रिस्टहेङ वाको हितिसो पाप स्यामाको भाअ्सिङ बलिदान भाइपाङ पिगिल्हि, कालाउकि येसु ख्रिस्ट ह्रुता खाङधुरि पाकालाइको पाप स्यामा जेनाको, इदोइ काम परमेस्वर ताइको धार्मिकता तिङपालि पाहि, हाइपालिपानु परमेस्वर हानिका सोमोइता ताइको धर्यता तिङपातेङ द्‍याङगेलाइहेङ इम्बालाइको पापको दन्ड मापिहि।

²⁶ परमेस्वर ताइमिङ बर्तमान सोमोइता धर्मि तिङपालि, जेलाउ वा येसुता खाङधुरि ताअ्कालाइहेङ धर्मि बानाइखे।

²⁷ एन्सा पानु केलाइ हाइको बारेता घमन्ड पालि? घमन्ड पालि काथाङ मान्थु। हाइ केलाइ व्यवस्था केमाङ दोअ्तेङ रो? आबस्य माको, याते येसु ख्रिस्टता जेङका केलाइको खाङधुरिको आधारता हि।

²⁸ ओदोङ भाअ्सिङ केलाइ गिनाखे कि मोसाको व्यवस्था केम्नाङ माको, भरु येसु ख्रिस्टता खाङधुरि पानाङ केलाइ परमेस्वरको आगाता धर्मि बानाइन्हाका हिनाहि।

²⁹ परमेस्वर यहुदिगेलाइको खिनिङ परमेस्वर माको, कालाउ वा गैर-यहुदिगेलाइको बुङ परमेस्वर हि।

³⁰ हाइपालिपानु परमेस्वर एमि खिनिङ हि, वा खाताना पाकालाइहेङ इम्बालाइको खाङधुरिको आधारता कालाउ खाताना मापाकालाइहेङ बुङ इम्बालाइकोङ खाङधुरि पाहासो परमेस्वर ताइको आगाता द्‍याङगेलाइहेङ धर्मि बानाइका हि।

³¹ हाइ केलाइ इदोङ खाङधुरिसो व्यवस्थाहेङ रद्द पानाखे रो? मिधुलाउ बुङ माको! भुरु केलाइते व्यवस्थाहेङ जोगिपातेङ ताअ्नाखे।