रोमि 16 - Dhimal NT

पावलको आभिबादन

¹ किङक्रिया इलाकाको मन्डलिता साघाइका केलाइको खान्धुराइ बेबाल ओने फिबिहेङ नेलाइ दोफा नाल्चा पादोङखा।

² का नेलाइहेङ निबेदन पाखा, कि ख्रिस्टको पबित्तरो जन कोनिङ वासेहेङ बुङ स्‍वागत पासु, जेसाङ परमेस्वरको द्‍याङगेलाइ एमिसो-भेनेङहेङ स्‍वागत पाखे। कालाउ वासेहेङ गोइका काथाता साघाइसु, हाइपालिपानु वा ताइमिङ हेन्जाहेङ कासेहेङ बुङ साघाइका हि।

³ प्रिस्किला ओने कालाउ वाको के आकिलास, जाइ येसु ख्रिस्टको काम का दोफा पाखे, इम्बालाइहेङ काङको सेउपाखा दोअ्पिसु।

⁴ इम्बालाइ काङको जिबन बान्चिपालि ताइको जिबन बुङ जोखिमता पाका हिघाहि, इम्बालाइहेङ का खिनिङ माको, भरु गैर-यहुदिगेलाइको गोताङ मन्डलिगेलाइ बुङ धन्यबाद पिखे।

⁵ कालाउ ओबालाइको साअ्ता जोम्का मन्डलिहेङ बुङ सेउपासु। काङको आनाउ इपेनिटियसहेङ जाइ ख्रिस्टता एसिया प्रदेसको लाङति खान्धुराइ दोङ हि, वासेहेङ बुङ सेउपासु।

⁶ मरियम जाइ नेलाइको माझाता ओसारापाङ मेहेनत पाहि, वासेहेङ बुङ सेउपासु।

⁷ का दोफाङ झ्यालखानाता हिका यहुदि सानाइतिगेलाइ कालाउ एन्द्रोनिक्स कालाउ युनियसहेङ, सेउपाखा दोअ्पिसु। इम्बालाइ साल्न्हाका चात्यागेलाइ मध्ये नामि हि, कालाउ का खान्तेङ लाम्फाङ ख्रिस्टता लोका हिघाहि।

⁸ एम्लिआतस, जाइ प्रभुता काङको आनाउ हि, वासेहेङ सेउपाखा दोअ्पिसु।

⁹ उरबानोस, ख्रिस्टता केलाइ दोफाङ काम पाका, कालाउ काङको आनाउ सानाइति स्ताखुसहेङ सेउपाखा दोअ्पिसु।

¹⁰ आपेल्लेसहेङ सेउपाखा दोअ्पिसु जाइको खाङधुरि ख्रिस्टता जाच न्हुसो बुङ लागातार हि। आरिस्तोबुलोस कालाउ वाको जाहानगेलाइहेङ बुङ सेउपाखा दोअ्पिसु।

¹¹ काङको यहुदि सानाइति हेरोदियानहेङ सेउपाखा दोअ्पिसु। प्रभुता खाङधुरि पाका नर्किसको जाहानगेलाइहेङ बुङ सेउपाखा दोअ्पिसु।

¹² प्रभुता परिस्रोम पाका बेबाल तरुफेना कालाउ तरोफोसहेङ सेउपाखा दोअ्पिसु। प्रभुता ओसारापाङ परिस्रोम पाका आनाउ बेजान ओने परसिसहेङ बुङ सेउपाखा दोअ्पिसु।

¹³ प्रभु येसुको चुनिका रुखोस कालाउ वाको आमाइ, जाइ काङको बुङ आमाइ भाइपा जेङका हिघाहि, वासेहेङ बुङ सेउपाखा दोअ्पिसु।

¹⁴ आसिङक्रिट्स, फ्लेगन, हर्मेस, पतरोबास, हर्मास, कालाउ ओबालाइ दोफा हिका खान्धुराइ ओनेगेलाइहेङ बुङ सेउपाखा दोअ्पिसु।

¹⁵ फिलेलोगस, युलिया, नेरियस कालाउ वाको बेजान ओने, कालाउ ओलिम्पासहेङ कालाउ ओबालाइ दोफा हिका झाराङ पबित्तरो जनगेलाइहेङ सेउपाखा दोअ्पिसु।

¹⁶ जेलाउ नेलाइ एमिसो भेनेङहेङ दुसुस्वाना कालाउ सत्ये प्रेमहोइ सेउपासु। ख्रिस्टको गोताङ मन्डलिगेलाइ नेलाइहेङ सेउपाखा पिगिल्का हि।

आम्तिम साल्लाहा

¹⁷ खान्धुराइ ओनेगेलाइ, का नेलाइहेङ सेउपाखा, कि नेलाइहेङ धिर्पाका सत्ये सिक्स्याको बिरोध पाका द्‍याङगेलाइसो जाइ खेङपाखे चङख हिसु कालाउ इम्बालाइसो दुरे हिसु।

¹⁸ हाइपालिपानु इन्सिकागेलाइ केलाइको प्रभु ख्रिस्टको माको, कालाउ ताइको जिउको इच्छागेलाइ पुरा पालि सेवा पाखे, कालाउ इम्बालाइ ताअ्का-ताअ्का कालाउ दिरबे देअ्का काथा पातेङ सोझाका द्‍याङगेलाइहेङ धोका पिखे।

¹⁹ नेलाइको आग्याकारिता झाराङ द्‍याङगेलाइ हिङका हि, कालाउ नेलाइको कारनहोइ का आनान्द पाखा। कालाउ का चाहिखा, कि नेलाइ जेदोङ आसल हि इङको को भाअ्सिङ बुद्दिमान जेङसु, कालाउ जेदोङ आखेका हि इन्तासो दुसिका माजेङसिङ हिसु।

²⁰ सान्तिको परमेस्वर मार्फाङ दोङ साइतानहेङ नासा पाङ कालाउ वासेहेङ नेलाइको आधिनता चुमावा, केलाइको प्रभु येसु ख्रिस्टको आनुग्रह नेलाइ दोफा हितेङ ह्याको।

²¹ तिमोथि का दोफा काम पाका सानाइति, कालाउ काङको यहुदि सानाइतिगेलाइ लुकियस, यासोन कालाउ सोसिपातरोस नेलाइहेङ सेउपाखा पिगिल्का हि।

²² का तरतियस पावलको भाअ्सिङ इदोइ पात्तारा लेखेदोङखा, का बुङ प्रभुता खाङधुरि पाका नेलाइहेङ सेउपाखा पिगिल्खा।

²³ गायस बुङ नेलाइहेङ सेउपाखा पिगिल्का हि। का वाको साअ्ता हिखा जेता सङगति बुङ जेङखे। सहरको कोस आध्यक्स्य इरासतस कालाउ केलाइको खान्धुराइ ओने क्वार्ट्स बुङ नेलाइहेङ सेउपाखा पिगिल्का हि।

²⁴ का प्रार्थाना पाखा, कि केलाइको प्रभु येसु ख्रिस्टको आनुग्रह नेलाइ दोफा हितेङ ह्याको। आमेन।

²⁵ एला वासेहेङ, जाइ नेलाइहेङ का हिङपाका सुसमाचार येसु ख्रिस्टको बिसोइता नेलाइहेङ खाङधुरिता बल्लियाका बानाइखे, इङको रहस्यको थाअ्साइका जेदोङ जुगौजुगसोङ म्होनाका हिघाहि।

²⁶ कालाउ एला आनान्तको परमेस्वरको आग्या आन्सार परमेस्वरको बक्तागेलाइ लेखेका काथा देखाल जेङका हि, कालाउकि गोताङ जातिगेलाइ खाङधुरि पाको कालाउ परमेस्वरको आग्या केमाको।

²⁷ एमि खिनिङ सर्बग्यानि परमेस्वरहेङ येसु ख्रिस्ट पाहासो जेलाउलाउ बुङ महिमा हितेङ ह्याको। आमेन।