रोमि 15 - Dhimal NT

¹ केलाइ खाङधुरिता बल्लियाका हिकालाइ ताइमिहेङ खिनिङ खुसि बानाइलि माको भरु खाङधुरिता हुइका द्‍याङगेलाइहेङ बुङ साघाइलि गोइखे।

² केलाइ झाराङ ताइको खान्धुराइ ओनेगेलाइहेङ खाङधुरिता बल्लियाका जेनाको दोअ्तेङ इम्बालाइको भालाइको भाअ्सिङ इम्बालाइहेङ खुसि बानाइ याइने।

³ हाइपालिपानु ख्रिस्ट बुङ ताइमिहेङ खुसि माअ्ताहि। जेसाङ धर्मसास्तरता लेखेका हि, “नासेहेङ आपामान पाकालाइ काङको बुङ आपामान पाका हि।”

⁴ जेथे काथागेलाइ लाम्फासोङ धर्मसास्तरता लेखेका हिघाहि, इङको काथागेलाइ केलाइको सिक्स्याको भाअ्सिङ लेखेका हिघाहि, कालाउकि धर्मसास्तरसो लोका धर्यता कालाउ हाउसा सो केलाइ आस निङलि द्वाइने।

⁵ का प्रार्थाना पाखा कि परमेस्वर नेलाइहेङ धर्य कालाउ हाउसाइ प्याको कालाउकि नेलाइ येसु ख्रिस्टको आनुसरन पाकाताङ एमिसो-भेनेङ दोफा मिलितेङ जुलितेङ हिलि दोअ्सु।

⁶ कालाउकि, नेलाइ ए जुट जेङतेङ एनोङ दोङ गालाहोइ परमेस्वर, केलाइको प्रभु येसु ख्रिस्टको आबाको महिमा पालि दोअ्सु।

⁷ ओदोङ भाअ्सिङ ख्रिस्ट नेलाइहेङ ग्रहन पाका कोनिङ नेलाइ एमिसो भेनेङहेङ ग्रहन पासु, कालाउकि द्‍याङगेलाइ परमेस्वरको बाखानाइ पाको।

⁸ हाइपालिपानु का नेलाइहेङ दोअ्खा, केलाइको पुर्खागेलाइहेङ पिका प्रतिग्यागेलाइ पुरा पालि कालाउ परमेस्वर खाङधुरि योग्य हि दोअ्का तिङपालि ख्रिस्ट यहुदिगेलाइको सेवक जेङहि।

⁹ कालाउ गैर-यहुदिगेलाइ परमेस्वरको दायाको भाअ्सिङ वासेहेङ महिमा पाको। जिसिका धर्मसास्तरता लेखेका हि, “ओदोङ भाअ्सिङ गैर-यहुदिगेलाइको माझाता का नाङको बाखिन पाङका, कालाउ का नाङको मिङको स्तुतिको ले लेकाङका।”

¹⁰ कालाउ भेनेङ थामेता आरोङ इसिका बुङ लेखेका हि, “ओइ गैर-यहुदिगेलाइ परमेस्वरको प्रजा दोफा आनान्द मानिपासु।”

¹¹ कालाउ आरोङ धर्मसास्तरता इसिका लेखेका हि, “ओइ झाराङ गैर-यहुदिगेलाइ, प्रभुको बाखानाइ पाअ्सु, कालाउ गोताङ द्‍याङगेलाइ वाको बाखानाइ पाको।”

¹² कालाउ आरोङ यासाइया परमेस्वरको बक्ता धर्मसास्तरता एसापा लेखेका हि, “यिसैको हारागुटियासो एमि ल्वाङ, वा गैर-यहुदिगेलाइ ह्रुता सासन पावा, कालाउ वाको ह्रुता गैर-यहुदिगेलाइ ताइको आस ताअ्तावा।”

¹³ का प्रार्थाना पाखा कि आसको मुल परमेस्वर नेलाइको खाङधुरि पाहासो गोताङ आनान्द कालाउ सान्तिहोइ पोङघा पाप्यावाको, कालाउकि पबित्तरो आत्माको सरबुङहोइ नेलाइको आस झन हेन्जा बाढेयाको।

गैर-यहुदिगेलाइको सेवक पावल

¹⁴ खान्धुराइ ओनेगेलाइ, कासेहेङ निसित हि, कि नेलाइ ताइमि बुङ भलाइहोइ पोङघाका हिसुना, कालाउ नेलाइहेङ थाहा हि कि हाइ पालि गोइखे, कालाउ नेलाइ एमिसो-भेनेङहेङ सिक्स्या पिलि दोअ्स्वाना।

¹⁵ कालाउ परमेस्वर कासेहेङ पिका आनुग्रहको कारनहोइ नेलाइहेङ आरोङ आधे काथागेलाइ फोम पापालि का खुल्ला रुपहोइ लेखेका हिघा,

¹⁶ कि का गैर-यहुदिगेलाइको भाअ्सिङ येसु ख्रिस्टको सेवक जेङतेङ परमेस्वरसो लोका सुसमाचार प्राचार पालि पुजारि कोनिङ सेवा पाखा, कालाउकि गैर-यहुदिगेलाइहेङ पबित्तरो आत्मा पाहासो सुद्द जेङतेङ ग्रहन योग्य बलि जेङलि द्वाको।

¹⁷ एसा पासोङ परमेस्वरको भाअ्सिङ काङको सेवाता कासेहेङ ख्रिस्ट येसुता गर्ब पालि कारन हि।

¹⁸ हाइपालिपानु, बचन कालाउ कामहोइ गैर-यहुदिगेलाइ परमेस्वरको आग्या किका बानाइलि ख्रिस्ट काङकोसो जेदोङ पाका हि, ओदोङ काथाको बिसोइता खिनिङ का धुइलि आट पाङका।

¹⁹ इदोइ चिन्हागेलाइ कालाउ भारभुसाइका कामगेलाइ पबित्तरो आत्माको सरबुङ पाहासो दोङ का पाका हिघा। एसापा का यरुसेलेम सहरसो इल्लुरिकन प्रदेस थेकापाङ द्‍यापाहाङ दोअ्ताङका द्‍याङगेलाइहेङ ख्रिस्टको सुसमाचार पुर्न रुपहोइ प्राचार पाका हिघा।

²⁰ बो द्‍याङगेलाइ योम्पाका जग ह्रुता साअ् बानाइका द्‍याङ कोनिङ, का परमेस्वरको काम जेङतेङ हिका थामेता प्राचार पालि माचाहिखा, कालाउ ख्रिस्टको बारेता एला थेकापा हिङ दोङ बुङ माहिङका थामेता सुसमाचार प्राचार पालि लिताङ सोङ इच्छा का ताअ्का हिघा।

²¹ का इदोइ धर्मसास्तरता लेखेका काथा पालि भोखा, “वाको बिसोइता जाइहेङ हेलाउ बुङ दोअ्पिका मान्थु, इम्बालाइ वासेहेङ तिनाङ, कालाउ वाको बिसोइता जाइ हेलाउ बुङ हिङका मान्थु इम्बालाइ बुझियावा।”

²² एसापा दोङ हि, का नेलाइकोता लोलि हेन्जाङ पोल्ति मादोघा।

²³ कालाउ एला इदोइ प्रदेसगेलाइता का द्‍याङगेलाइहेङ सुसमाचार हिङपालि दोका हिघा, कालाउ हेन्जा बासारसोङ नेलाइकोता लोलि ओसारापाङ इच्छा पाका हिघा।

²⁴ का स्पेन सारभि हानिलाउ का नेलाइहेङ भेतिलि आस पाखा, कालाउ नेलाइ दोफा कोम्हा सोमोइ थेकापा सङगतिको आनान्द निङतेङ नेलाइ कासेहेङ आरोङ हानिलिको भाअ्सिङ दामाता साघाइस्वाना दोअ्का आस ताअ्खा।

²⁵ कालाउ एला पबित्तरो जनगेलाइहेङ साघाइका पिपुलि का यरुसेलेम सहर भारि हानिदोङखा।

²⁶ हाइपालिपानु यरुसेलेम सहरता हिका पबित्तरो जनगेलाइता जाइ गरिब हि, इम्बालाइको भाअ्सिङ म्यासिडोनिया प्रदेस कालाउ आखैया प्रदेसको मन्डलिगेलाइ भेति पिगिल्लि भोका हि।

²⁷ इदोइ भेति इम्बालाइ खुसिसोङ जोम्पाका हिघाहि, कालाउ साचिकोङ एबालाइ यरुसेलेम सहरको पबित्तरो जनगेलाइको रिनि बुङ हि। हाइपालिपानु यहुदिगेलाइ परमेस्वरसो निङका आसल काथागेलाइ गैर-यहुदिगेलाइ दोफा बाखाराइहि पानु, गैर-यहुदिगेलाइ बुङ इदोइ सुमिङको आसल काथागेलाइ यहुदिगेलाइ दोफा बाखाराइलि उचित हि।

²⁸ ओदोङ भाअ्सिङ लाम्फा यरुसेलेम सहर हानितेङ ओबालाइको भाअ्सिङ ल्होपाका भेति ओबालाइहेङ बुझाइ प्याङका। कालाउ न्हुसो का नेलाइहेङ रोमता भेतितेङ स्पेन सारभि हानाङका।

²⁹ कालाउ का गिखा कि, जेलाउ का नेलाइकोता ल्वाङका, ख्रिस्टको प्रसस्त आसिस नेलाइ दोफा बाखाराइ याङका।

³⁰ खान्धुराइ ओनेगेलाइ, केलाइको प्रभु येसु ख्रिस्ट कालाउ पबित्तरो आत्माको प्रेम पाहा काङको भाअ्सिङ परमेस्वर दोफा बारम्बार प्रार्थाना पालि का दोफा झ्वाइनासु, दोअ्तेङ का नेलाइहेङ सेउपाखा।

³¹ पार्थाना पासु कि परमेस्वर कासेहेङ यहुदिया जिल्लाता हिका खाङधुरि मापाकालाइसो बान्चिपालि कालाउ यरुसेलेम सहरता हिका पबित्तरो जनगेलाइ भेति साघाइ निङलाउ खुसि जेनाको।

³² कालाउ परमेस्वरको इच्छा जेङनु का आनान्दहोइ नेलाइकोता ल्वाङका कालाउ दोफाङ सङगति पातेङ आनान्द मानाइने।

³³ का प्रार्थाना पाङका, कि सान्ति पिका परमेस्वर नेलाइ झाराङ दोफा ह्याको। आमेन।