रोमि 14 - Dhimal NT

हुइका कालाउ बलवान

¹ खाङधुरिता हुइका हिका द्‍याङगेलाइहेङ सुइकार पासु, कालाउ वा हाइ पालि गोइका या मापालि गोइका काथागेलाइता काथा पोसुलि माको।

² आधिमि गोताङ आमेने चालि एल दोअ्तेङ खाङधुरि पाखे, कालाउ खाङधुरिता कमजोरि हिकालाइ चाहि सारसिङगेलाइ खिनिङ चाखे।

³ बिहा चाकालाइ सारसिङ चाकालाइहेङ तुच्स माथान्याको, कालाउ सारसिङ चाकालाइ बिहा चाकालाइहेङ मादुसियाको। हाइपालिपानु परमेस्वर न्हेमिहेङ दोङ सुइकार पाका हि।

⁴ नाअ् हासुको बुङ सेवकहेङ न्याय पालि माएल, हाइपालिपानु ग्रिहि दोङ वा ठिक पाका हि या मान्थु दोअ्तेङ फाइसाला पावा। प्रभु दोङ हुइका सेवकहेङ ठिक काम पालि साघाइयावा, हाइपालिपानु प्रभु दोफा वासेहेङ साघाइलि सरबुङ हि।

⁵ एन्साङ पातेङ हिदोइ बुङ द्‍याङ एनोङ दिनाहेङ भेनेङ दिना खान्तेङ हेन्जा महत्वको मानिखे, कालाउ भेनेङ द्‍याङ गोताङ दिनाहेङ ओदोङ झोको थानिखे। गोताङ द्‍याङ ताइमि सोचिका काथा निस्चित दोङ ठिक हि दोअ्तेङ खाङधुरि पालि गोइखे।

⁶ जेदोङ द्‍याङ हिदोइ बुङ दिनागेलाइहेङ बिसेस रुपता मानिखे, वा प्रभुको आदरको भाअ्सिङ मानिखे। जेदोङ द्‍याङ बिहा चाखे, वा प्रभुको भाअ्सिङ चाखे, हाइपालिपानु वा परमेस्वरहेङ धन्यबाद पिखे। जेदोङ द्‍याङ बिहा माचाखे, वा परमेस्वरको आदरको भाअ्सिङ माचाखे कालाउ परमेस्वरहेङ धन्यबाद पिखे।

⁷ केलाइ झाराङ प्रभुको हिनाहि ओदोङ भाअ्सिङ केलाइ मध्ये हासु बुङ ताइको भाअ्सिङ खिनिङ माबान्चियाइने, कालाउ जेसापा केलाइ मध्ये हासु बुङ सिहे पानु, वा ताइको भाअ्सिङ खिनिङ मासिखे।

⁸ हाइपालिपानु जेसापा केलाइ बान्चिलि गोइनु प्रभुको भाअ्सिङ बान्च्याङ, कालाउ सिनु प्रभुकोङ भाअ्सिङ सियाङ। चाहे केलाइ बान्च्याङ, चाहे केलाइ स्याङ, केलाइ प्रभुकोङ दोङ।

⁹ इदोइ कोङ भाअ्सिङ ख्रिस्ट प्रभु सिहि कालाउ आरोङ सिन्चाल्हि, कालाउ वा सिकालाइको कालाउ बान्चिकालाइको न्हेमिकोङ प्रभु दोङ।

¹⁰ कालाउ नेलाइ हाइ पालि ताइको खान्धुराइ ओनेको न्याय पासुखेना? माकुनु नेलाइ हाइ पालि ताइको खान्धुराइ ओनेहेङ तुस्स थानिसुखेना? फोम पासु केलाइ झाराङको न्याय परमेस्वर दोङ पावा।

¹¹ धर्मसास्तरता लेखेका हि, “प्रभु दोअ्खे, जेसाङ का बान्चिका हिघा, गोताङ तिरु काङको आगाता थोलि गोयावा, कालाउ गोताङ परमेस्वरको बाखिनाइ पावा।”

¹² एन्सा पानु केलाइ झाराङ परमेस्वरहेङ ताइको कामको लेखा पिलि गोयाङ।

¹³ ओदोङ भाअ्सिङ केलाइ एमिसो-भेनेङहेङ एला उसो न्याय मापाइने। कालाउ इसिका काथा मापासु जेदोङहोइ नाङको खान्धुराइ ओनेगेलाइ परमेस्वरता खाङधुरि पालि लाअ्ताको माकुनु पापता पारिका काथा मापाइने।

¹⁴ का गिखा, कालाउ प्रभु येसुता कासेहेङ निस्चित हि, कि हिदोइ बुङ चाका आमेने ताइमिङता आसुद्द माजेङखे, भरु जाइ इङको आसुद्द थानिखे वाको भाअ्सिङ इङको आसुद्ददोङ जेङखे।

¹⁵ जेसापा नाअ् जेदोङ चाखेना ओदोङ काथाहोइ नाङको खान्धुराइ ओनेगेलाइ खाङधुरिहेङ चोट पापाखे पानु नाअ् वासेहेङ मायारु मापाखेना। हाइपालिपानु जेदोङ खान्धुराइ ओनेको भाअ्सिङ ख्रिस्ट सिपिहि, नाङको चाका आमेनेहोइ वाको खाङधुरिहेङ हान्ति माज्याको।

¹⁶ ओदोङ भाअ्सिङ नेलाइहेङ जेदोङ रेम्का जेङखे इङकोहेङ आरुगेलाइ आखेका दोअ्लि मापिसु।

¹⁷ हाइपालिपानु परमेस्वरको सासनता चालि कालाउ आम्लि महत्व पुर्न माको, कालाउ महत्व पुर्न काथा चाहि धार्मिकता, सान्ति कालाउ आनान्द हि जाइ पबित्तरो आत्मा पिखे।

¹⁸ जाइ इदोइ खाल्होइ येसु ख्रिस्टको सेवा पाखे वा दोफा परमेस्वर खुसि हिखे कालाउ द्‍याङगेलाइ वाको बारेता बाखिनखे।

¹⁹ ओदोङ भाअ्सिङ केलाइ ओदोङ कामगेलाइ पाइने जाइहोइ चाहि सान्ति चुमाखे, कालाउ एमिसो-भेनेङहेङ खाङधुरिता बल्लियाका बानाइखे।

²⁰ हाइपालिपानु चालि-आम्लिको भाअ्सिङ परमेस्वरको कामहेङ मानासापासु। साचिकोङ इङको गोताङ आमेने सुद्द हिखे, कालाउ ताइमि चाका आमेनेहोइ आरुगेलाइहेङ पाप पालि लागाइनु इङको चालि चाहि खाराब हि।

²¹ उचित ते या जेङखे, कि बिहा माचालि, म्हाका आमेने माआम्लि, कालाउ इसिका हिदोइ बुङ मापालि जेदोङहोइ नाङको खान्धुराइ ओने पापता मापरियाको।

²² इङको काथाको बिसोइता नेलाइ जेदोङ खाङधुरि पासुखेना इङको काथा परमेस्वर कालाउ नाङको माझाता ताअ्। धन्य उङको द्‍याङ, जाइ ताइमिङ सहि थोहोराइका काथाको कारनहोइ ताइमिहेङ दुसिलि मागोइखे।

²³ कालाउ हासु बुङ खाङधुरि माकोसिङ साङखा पातेङ हाइ दोङ चानु उङको दुसिका थोरिखे, हाइपालिपानु खाङधुरि माकोसिङ पाका जेदोङ बुङ काथा केलाइको भाअ्सिङ पाप हि।