रोमि 11 - Dhimal NT

इस्राएलता बाकि हिकालाइ

¹ ओदोङ भाअ्सिङ का हिअ्दोङखा, “हाइ परमेस्वर ताइको द्‍याङगेलाइहेङ बाथालाइगिल्हि कुनु?” मिधुलाउ बुङ माको! हाइपालिपानु का बुङ आब्राहामको हारागुटियासो जोलोम जेङका बेन्यामिन कुलको एमि इस्राएललि दोङ हिघा।

² परमेस्वर लाम्फासोङ चुनिका ताइको द्‍याङगेलाइहेङ लाअ्का मान्थु। नेलाइ गिसुखेना, कि धर्मसास्तरता परमेस्वरको बक्ता एलियाको बिसोइता हाइ लेखेका हि, एलिया दोङ परमेस्वर दोफा इस्राएलको द्‍याङगेलाइको बिसोइता दुसिहि।

³ वा दोअ्हि, “हे प्रभु, इम्बालाइ नाङको बक्तागेलाइहेङ सेअ्हि, नाङको बेदिगेलाइ गोताङ ह्रापिहि, कालाउ का खिनिङ एमि द्‍याङ हिघा जाइ एला थेकापा खाङधुरि पातेङ हिघा कालाउ बान्चितेङ हिघा, कालाउ इम्बालाइ कासेहेङ बुङ सेअ्लि भोका हि।”

⁴ कालाउ परमेस्वर एलियाहेङ दोअ्हि, “धाताइका बाल दिरको आराधाना मापाका न्हिहाजार द्‍याङगेलाइ का ताइको भाअ्सिङ ताअ्का हिघा।”

⁵ कालाउ परमेस्वरको आनुग्रहहोइ एला बुङ यहुदिगेलाइको आतुइसा आङस हि, जाइहेङ परमेस्वर ताइको चुनिका द्‍याङगेलाइको रुपता साल्का हि।

⁶ या आसल काम पाकाको आधारता माको, कालाउ परमेस्वर ताइको आनुग्रहहोइ इम्बालाइहेङ साल्हि। जेसापा इङको कामको आदार सोनु ते आनुग्रह एला आनुग्रह दोङ माको।

⁷ ओदोङ भाअ्सिङ या एसापा जेङहि: इस्राएलको द्‍याङगेलाइ परमेस्वरको आगाता धर्मि जेङलि कोसिस पाहि कालाउ इम्बालाइ सफल जेङलि मादोहि, कालाउ परमेस्वर ताइमि साल्का द्‍याङगेलाइहेङ धर्मि बानाइहि। कालाउ बाकि हिका द्‍याङगेलाइको ह्रदय परमेस्वर थाङका बानाइ पिहि कालाउ इम्बालाइ परमेस्वरको काथा हिङलि माकिहि।

⁸ जेसाङ ध्रर्मसास्तरता यासाइया परमेस्वरको बक्ता लेखेका हि, “परमेस्वर इम्बालाइहेङ बोधालाका बुद्दि पिका हि। इम्बालाइहेङ इसिका मिसियाँ पिका हि जाइ मातिनाको कालाउ इसिका न्हातोङहोइ जाइ माहिनाको, कालाउ नानिको दिना थेकापा बुङ इम्बालाइ उसुकाङ हि।”

⁹ कालाउ राजा दाउद बुङ दोअ्खे, “लासाता देका सारोनिया माकुनु धोबेलेङता हुल्का गुपुस लासाता हिका भाइपा इम्बालाइ भोजता हिलाउ आचानाक रिम निन्चाको, कालाउकि इम्बालाइ उचित दन्ड निनाको।

¹⁰ इम्बालाइको मिसियाँ कान्हाँ ह्याको, कालाउकि इम्बालाइ तिङलि माद्वाको, कालाउ इम्बालाइ जेलाउ बुङ कस्टगेलाइता परियाको।”

कलमि जिङका डालेङ

¹¹ का आरोङ हिअ्दोङखा, “हाइ यहुदिगेलाइ थुनिङचातेङ जेलाउको भाअ्सिङ थोबिन्हाका कुनु?” मिधुलाउ बुङ माको! कालाउ यहुदिगेलाइ खाङधुरि मापाकानाङ गैर-यहुदिगेलाइ मुक्ति निङका हि। कालाउकि इस्राएललिगेलाइ बुङ या तिङतेङ डाहा पाको।

¹² एला जेसापा यहुदिगेलाइ खाङधुरि मापानाङ गैर-यहुदिगेलाइहेङ रेम्का जेङखे पानुते, जेलाउ यहुदिगेलाइ परमेस्वर भारि घुरियावा कालाउ गैर-याहुदिगेलाइको भाअ्सिङ झन हेन्जा रेम्का जेनावा।

¹³ एला नाअ् गैर-यहुदिगेलाइहेङ का दोअ्दोङखा, गैर-यहुदिगेलाइको भाअ्सिङ साल्का चात्या जेङनाङ का काङको सेवाता गर्ब पाखा।

¹⁴ का आस पाखा, कि काङको ताइकोङ यहुदि द्‍याङगेलाइहेङ डाहि बानाइलि द्वाको, कालाउ इम्बालाइ मध्ये आधिमिहेङ बान्चिपालि द्वाको।

¹⁵ हाइपालिपानु जेलाउ इस्राएललिगेलाइ परमेस्वरहेङ लाअ्हि कालाउ सुमिङको द्‍याङगेलाइको भाअ्सिङ या मिलाप जेङहि, जेलाउ इम्बालाइ येसुहेङ ख्रिस्ट दोअ्तेङ खाङधुरि पाहि, इदोइ चाहि सिका द्‍याङ आरोङ सिन्हुका भाइका जेनावा।

¹⁶ जेसापा सेले बानाइलि दोअ्तेङ एङका तोलेसो आधे भाग परमेस्वरहेङ भेतिको रुपता चढाइका हि पानु, गोताङ सेले परमेस्वरको दोङ हि। जेसापा सिङको जारिगेलाइ परमेस्वरकोनु दालेङगेलाइ बुङ परमेस्वरको दोङ हिखे।

¹⁷ इस्राएल सारभिको द्‍याङगेलाइ रेम्का जैतुन सिङको दालेङगेलाइ भाइका दोङ हि, कालाउ पुर्खा आब्राहाम, इसाहाक, कालाउ केलाइको पुर्खा याकुब इङको सिङको जारि भाइका दोङ हि। कालाउ जेसापा हिदोइ बुङ दालेङगेलाइ पोन्हाहे पानु कालाउ नेलाइ झारभारिको जैतुन जेङतेङ इम्बालाइ दोफा रेम्का जैतुनको सिङता कलमि जेङका हिसुना। यहुदि द्‍याङगेलाइसो नेलाइ फाइदा निङसुन्हा, जेसाङ झारभारिको जैतुनको दालेङहोइ रेम्का जैतुनको सिङता कलमि जेङतेङ इङको सिङसो फाइदा निङका हिसुना।

¹⁸ ओदोङ भाअ्सिङ नेलाइ इस्राएललिगेलाइहेङ मासिकासु, जाइगेलाइ चाहि थुर्का दालेङगेलाइ भाइकाङ हि कालाउ इम्बालाइ खान्तेङ ताइमिहेङ रेम्का मासोचे, हाइपालिपानु नेलाइ डालेङ खिनिङ हिसुन्हा, नेलाइ जारिहेङ थामिका मान्थु सुन्हा, कालाउ जारि दोङ नेलाइहेङ थामिका हि।

¹⁹ ताइको मनता इसिका मासोचिसु, कि परमेस्वर यहुदिगेलाइहेङ सिङको थुर्का दालेङ कोनिङ इन्कार पाहि, कालाउकि वा गैर-यहुदिगेलाइहेङ सुइकारलि द्वाको, जाइ सिङको डालेङ कोनिङ कलमि जिङन्हाका हि।

²⁰ इङको सत्ये दोङ हि, इम्बालाइ खाङधुरि मापानाङ दालेङगेलाइ कोनिङ थुर्तेङ हानिहि, कालाउ नेलाइ चाहि इम्बालाइको थामेता खाङधुरि पासुन्हा कालाउ कलमि जिङसुन्हा। ओदोङ भाअ्सिङ नेलाइ इदोइ काथाता घमन्ड मापासु कालाउ थिसु।

²¹ हाइपालिपानु जेसापा परमेस्वर मुलि दालेङगेलाइहेङ मादाया कानु, कालाउ नेलाइहेङ बुङ मादायाधाङ।

²² ओदोङ भाअ्सिङ परमेस्वर दायालु कालाउ थाङका बुङ हि, ध्यानता ताअ्सु, कालाउ परमेस्वर खाङधुरि मापाकालाइको भाअ्सिङ थाङका हि। कालाउ नेलाइ वाको दायाता हितेङ हिसुना पानु, नेलाइहेङ परमेस्वर जेलाउ बुङ दाया तिङपावा, माकुनुते नेलाइ बुङ डालेङ कोनिङ पोन्हास्वाना।

²³ जेसापा इस्राएललिगेलाइ बुङ खाङधुरि पालि तेङनु लाम्फा हिका थामेता डालेङ कोनिङ आरोङ कलमि जिनावा। हाइपालिपानु परमेस्वर आरोङ इम्बालाइहेङ कलमि जिङलि द्वाङ।

²⁴ हाइपालिपानु नेलाइ जाइ यहुदि माको, नेलाइ चाहि झारभारिको जैतुनको सिङसो पोन्हाका दालेङगेलाइ कोनिङ हिसुना, जाइ रेम्का जैतुनको सिङता कलमि जिङका हि। इस्राएललिगेलाइ चाहि बारिता हिका जैतुनको दालेङगेलाइ भाइका दोङ हि। ओदोङ भाअ्सिङ इम्बालाइहेङ आरोङ चुमातेङ कलमि पालि परमेस्वरको भाअ्सिङ झन सजिलो हि।

²⁵ खान्धुराइ ओनेगेलाइ, का नाअ् गैर-यहुदिगेलाइहेङ घमन्डि जेङका का माचाहिखा। ओदोङ भाअ्सिङ का इस्राएललिगेलाइहेङ हाइ जेङहि दोअ्का रहस्यको ब्याख्या पाङका, कालाउ इङको काथा नेलाइहेङ थाहा जेङहि पानु नेलाइ घमन्ड मापास्वाना। इदोइ रहस्य इसिका हि, गोताङ गैर-यहुदिगेलाइ ख्रिस्टता खाङधुरि मापाका धाउ इस्राएललिगेलाइको ह्रदय राङका जेनावा।

गोताङ इस्राएलको उद्दार

²⁶ एसापा सारा इस्राएलको द्‍याङगेलाइको उद्दार जेनावा, जेसाङ धर्मसास्तरता लेखेका हि, “उद्दार पिका यरुसेलेमसो ल्वाङ, कालाउ वा याकुबको हारागुटियाहेङ मारेम्का कामगेलाइ पाकासो लाअ्पाङ।”

²⁷ “कालाउ इम्बालाइ दोफा काङको बाचा इदोइ दोङ जेनावा, जेलाउ का ओबालाइको पाप स्यामा पाअ्प्याङका।”

²⁸ सुसमाचारता खाङधुरि मापानाङ इस्राएललिगेलाइ परमेस्वरको सतुरु जेङहि, एन्साङ दोङ नेलाइहेङ चाहि फाइदा जेङहि। कालाउ परमेस्वर इम्बालाइहेङ प्रेम पाखे, हाइपालिपानु परमेस्वर ताइमिङ दोङ इम्बालाइहेङ ताइको भाअ्सिङ साल्हि, इदोइ दोङ वा इम्बालाइको पुर्खागेलाइ दोफा प्रतिग्या पाहि।

²⁹ हाइपालिपानु परमेस्वर ताइमिङ पिका बरदानगेलाइ आरोङ माह्रुखे कालाउ काइलि दोकालाइहेङ हेलाउ बुङ मालाखे।

³⁰ हाइपालिपानु जेसाङ नेलाइ बुङ एखे परमेस्वरको आग्या माकिका हिघासुखेना, कालाउ एला इस्राएललिगेलाइ आग्या माकेम्नाङ परमेस्वरको दाया नेलाइ निङका हिसुना।

³¹ कालाउ नेलाइहेङ दाया पाकानाङ, इम्बालाइ बुङ दाया निनाको दोअ्तेङ इम्बालाइ एला आग्या केम्का मान्थु।

³² हाइपालिपानु परमेस्वर झाराङ द्‍याङगेलाइहेङ आना आग्याकारि जेङलि पिहि, कालाउकि वा झाराङ द्‍याङगेलाइहेङ ताइको दाया तिङपालि द्वाको।

बाखानाइको-ले

³³ आहा! परमेस्वरको बैभब कालाउ बुद्दि कालाउ वाको ग्यान हेथे माहान हि! वाको निर्नयगेलाइ हासु बुङ बयान पालि मादोखे, कालाउ हासु बुङ परमेस्वरको दामागेलाइ बुझिलि मादोखे!

³⁴ “परमेस्वरको मन हासु बुङ बुझिलि मादोखे, माकुनु वासेहेङ हासु बुङ साल्लाहा पिलि मादोअ्खे।”

³⁵ हासु बुङ परमेस्वरहेङ हेलाउ बुङ हाइ दोङ पिका मान्थु, जेदोङ परमेस्वर इम्बालाइहेङ तिरिलि गोयाङ।

³⁶ हाइपालिपानु गोताङ आमेने परमेस्वर पाहासो लोखे, कालाउ वा दोङ गोताङ आमेने बानाइका हि, कालाउ गोताङ आमेने वाकोङ भाअ्सिङ दोङ हि। वासेहेङ दोङ जेलाउलाउ बुङ महिमा ह्याको! आमेन।