रोमि 1 - Dhimal NT

¹ का पावल येसु ख्रिस्टको दास हिघा, कालाउ परमेस्वर कासेहेङ ताइको साल्न्हाका चात्या जेङलि छाल्हि, कालाउ झाराङ द्‍याङगेलाइहेङ परमेस्वरको सुसमाचार प्राचार पालिको भाअ्सिङ खेङहि।

² जेदोङ सुसमाचार परमेस्वर हेन्जाङ लाम्फा ताइको बक्तागेलाइसो पबित्तरो धर्मसास्तरता प्रतिग्या पाका हिघाहि।

³ इदोइ सुसमाचार परमेस्वरको चान, केलाइको प्रभु येसु ख्रिस्टको बिसोइता हि। वा द्‍याङ जेङतेङ राजा दाउदको हारागुटियाता जोलोमहि।

⁴ कालाउ येसु ख्रिस्ट पबित्तरो आत्माको सरबुङसो सिकालाइसो सिन्चाल्हि। कालाउ एसापा परमेस्वर झालाफालापा तिङपाहि कि येसु दोङ परमेस्वरको चान हि।

⁵ कालाउ प्रभु येसु ख्रिस्टसो परमेस्वर कासेहेङ आनुग्रह पातेङ साल्न्हाका चात्याको काम पिहि, कालाउकि का ख्रिस्टको काम पालि द्वाको कालाउ गोताङ गैर-यहुदिगेलाइ येसु ख्रिस्टको मिङता खाङधुरि पाको कालाउ वाको आग्या किताको।

⁶ नेलाइ बुङ जाइ रोमता हिसुन्हा इदोइ द्‍याङगेलाइ दोफा येसु ख्रिस्टको जेङलि काइन्हाका हिसुना।

⁷ का या पात्तारा रोम सहरता हिका गोताङ खान्धुराइगेलाइहेङ लेखेदोङखा, जाइहेङ परमेस्वर प्रेम पाखे कालाउ ताइको पबित्तरो जन जेङलि काइका हि। नेलाइहेङ केलाइको आबा परमेस्वर कालाउ प्रभु येसु ख्रिस्ट आनुग्रह कालाउ सान्ति प्याको।

रोम हानिलि पावल खाङका

⁸ झाराङ खान्तेङ लाम्फा का काङको परमेस्वर येसु ख्रिस्ट पाहासो दोङ नेलाइ झाराङको भाअ्सिङ धन्यबाद पिखा, हाइपालिपानु नेलाइ येसु ख्रिस्टता खाङधुरि पाका काथा गोताङ थामेता द्‍याङगेलाइ काथा पातेङ हि।

⁹ का गोताङ हृदयहोइ वाको चानको सुसमाचारको बिसोइता द्‍याङगेलाइहेङ प्राचार पाखा, कालाउ परमेस्वर काङको साक्सि हि, कि का लागातार काङको प्रार्थानाता नेलाइहेङ फोम पाखा।

¹⁰ कालाउ परमेस्वरको इच्छा आन्सार एला नेलाइहेङ भेतिलि द्वाको दोअ्तेङ का परमेस्वर दोफा प्रार्थाना पाखा।

¹¹ का नेलाइहेङ भेतिलि मेनाङ इच्छा हि, हाइपालिपानु का नेलाइहेङ ख्रिस्टता बल्लियाका बानाइलि हाइ दोङ आत्मिक बरदान पिलि भोखा।

¹² का दोअ्लि खाङका हाइ पानु, नेलाइको खाङधुरिहोइ एमिसो-भेनेङहेङ हाउसाइपाको। माकुनु नेलाइको खाङधुरिहोइ कासेहेङ कालाउ काङको खाङधुरिहोइ नेलाइहेङ हाउसाइपाको।

¹³ खान्धुराइ ओनेगेलाइ, नेलाइहेङ थाहा जेनाको दोअ्तेङ का चाहिखा, कि का नेलाइहेङ कालाउ बाकि हिका गैर-यहुदिगेलाइहेङ बुङ आत्माता बारालि साघाइयाङका दोअ्तेङ नेलाइकोता लोलि हेन्जा पोल्ति भोघा, कालाउ बुङ का एला थेकापा लोलि दोका मान्थुघा।

¹⁴ हाइपालिपानु ग्रिक भाअ्सा कालाउ मुन्धुम गिकालाइ कालाउ मागिका द्‍याङगेलाइहेङ कालाउ पढेका-मापढेका झाराङहेङ सुसमाचार हिङपालि का रिनि हिघा।

¹⁵ ओदोङ भाअ्सिङ का दोका थेकापा नेलाइहेङ कालाउ रोम सहरता हिकालाइहेङ बुङ सुसमाचार प्राचार पालि इच्छा हि।

¹⁶ कालाउ का येसु ख्रिस्टको सुसमाचारता गर्ब पाङका। हाइपालिपानु खाङधुरि पाका झाराङको मुक्तिको भाअ्सिङ इदोइ परमेस्वरको सरबुङ हि, लाम्फा यहुदिगेलाइहेङ कालाउ गैर-यहुदिगेलाइको भाअ्सिङ बुङ हि।

¹⁷ हाइपालिपानु सुसमाचारहोइ द्‍याङगेलाइहेङ परमेस्वर ताइको आगाता ठिक हि दोअ्का तिङपाखे, कालाउ परमेस्वर दोफा ठिक थोहोराइका काथा खाङधुरिसो सुरु जेङखे कालाउ खाङधुरिसो दोङ पुरा जेङखे। जिसिका धर्मसास्तरता बुङ लेखेका हि, “जाइ खाङधुरिसो परमेस्वर दोफा ठिक थोहोरिखे, ओदोङ द्‍याङ दोङ जिबन निनाङ।”

द्याङगेलाइ ह्रुता परमेस्वरको चेर

¹⁸ परमेस्वरको चेर स्वर्गसो उङको द्‍याङगेलाइता देखाल जेङका हि जाइ वाको बिरोधता दुस्ट कालाउ मारेम्का कामगेलाइ पाका हि। इम्बालाइ ताइको दुस्ट काम पाहासो द्‍याङगेलाइहेङ परमेस्वरको बारेता सत्ये गिलि रोकिका हि।

¹⁹ झाराङ द्‍याङको भाअ्सिङ परमेस्वर हिसिका हि दोअ्तेङ झालाझालापा हि। हाइपालिपानु परमेस्वर नेलाइको इङको काथा तिङपा पिका हि।

²⁰ परमेस्वरको आनान्त सरबुङ कालाउ स्वभाव तिङलि मादोखे। कालाउ सुमिङ सिरजाइकाको सुरुसोङ, परमेस्वर ताइमि दोङ बानाइका इङको गोताङ हिसिका हि दोअ्तेङ तिङपाका हि। ओदोङ भाअ्सिङ उङको द्‍याङ दोफा हिदोइ बुङ बाहाना मान्थु।

²¹ हाइपालिपानु इम्बालाइ परमेस्वरहेङ नाल्तेङ बुङ परमेस्वरहेङ पालि गोइका आदार मापाहि, ना ते इम्बालाइ वासेहेङ धन्यबाद दोङ पिहि, कालाउ इम्बालाइको मुर्ख बिचारगेलाइ गोताङ गलत जेङहि, कालाउ इम्बालाइको मनता रेम्का बिचार मालोहि।

²² इम्बालाइ ताइमिहेङ बुद्दिमानि दोअ्तेङ दाबि पाहि, कालाउ बुङ इम्बालाइ मुर्ख जेङहि।

²³ इम्बालाइ महिमित परमेस्वरहेङ आराधाना पालि गोइकाता नासाका द्‍याङ, गुपुसगेलाइ, जिहाँ-जुइलेङगेलाइ कालाउ सेसालाइतेङ तेगिल्का जन्तुगेलाइको मुर्तिगेलाइहेङ पुजा पाहि जेदोङ जेलाउ बुङ सिन्हुतेङ माहिखे।

²⁴ ओदोङ भाअ्सिङ परमेस्वर इम्बालाइहेङ इम्बालाइकोङ मारेम्का बिचारता लाअ्पिहि, कालाउकि इम्बालाइ ता-ताइमिता ताइको जिउहोइ मारेम्का कामगेलाइ पातेङ ताइको जिउको आनादार पाको।

²⁵ हाइपालिपानु इम्बालाइ परमेस्वरको सत्येहेङ लाअ्हि कालाउ धातुवाहेङ साहि। कालाउ इम्बालाइ सिरजाइका परमेस्वरहेङ लाअ्तेङ कालाउ वा दोङ सिरजाइका आमेनेगेलाइहेङ आराधाना कालाउ सेवा पाहि। परमेस्वरहेङ दोङ जेलाउलाउ बुङ बाखानाइ ह्याको। आमेन।

²⁶ ओदोङ भाअ्सिङ परमेस्वर इम्बालाइहेङ इम्बालाइकोङ सिकाका कामबासाना पालि लाअ्पिहि। बेबालाइ ताइको के दोफा जिम्लि लाअ्तेङ बेबाल दोफाङ दोङ जिम्लि तेङहि।

²⁷ कालाउ एन्साङ दोङ वाबाल ताइको बे दोफा जिम्लि लाअ्तेङ वाबाल दोफा जिम्लि तेङहि। इम्बालाइ ता-ताइमिता सिकाका कामगेलाइ पाहि। ओदोङ भाअ्सिङ इम्बालाइ ताइको जिउसो पाका मारेम्का कामको भाअ्सिङ उचित दन्ड निङहि।

²⁸ कालाउ एसापा इम्बालाइ परमेस्वरको ग्यानहेङ आसुइकार पाहि, ओदोङ भाअ्सिङ परमेस्वर इम्बालाइहेङ मारेम्का पाको दोअ्तेङ इम्बालाइकोङ कुबिचारता लाअ्पिहि।

²⁹ इम्बालाइ गोताङ खाल्को पाप, खाराबि, दुस्ट, दिका, इख, मारा पाका, चेरसुका, धाताइका कालाउ एमिसो-भेनेङको काथा पोअ्खे।

³⁰ कालाउ इम्बालाइको निन्दा पाका, परमेस्वरहेङ मन्दामाताअ्खे, जिद्दि, आभिमानि, दुस्ट काथा पाखे, कालाउ ताइको आमाइ आबाको काथा मासाखे।

³¹ इम्बालाइ मुर्ख कालाउ ताइको भाकलगेलाइ पुरा मापाखे। कालाउ हासुहेङ बुङ दाया कालाउ मायारु मापाका हिखे।

³² इम्बालाइ परमेस्वरको धार्मिक बिधान गिखे, इन्सिकाङ द्‍याङगेलाइ सिलि गोयाङ दोअ्का परमेस्वरको नियम इम्बालाइ गिखे। कालाउ बुङ इम्बालाइ इन्सिका मारेम्का कामगेलाइ पातेङ हिखे, इङको झोको खिनिङ माको आझाइ उल्ताङ इन्सिका काम पाकालाइहेङ तोङपाखे।