प्रकास 9 - Dhimal NT

सरबुङसाइका चाकागेलाइ

¹ कालाउ जेलाउ नातेङ स्वर्गदुत ताइको सानाइ म्होहि, का एनोङ फुरु तिङघा जेदोङ स्वर्गसो प्रिथिबि ह्रुता हुल्का हिघाहि। इङको फुरुहेङ खारा खोलेलि ताल्चा पिहि। जेदोङको वाङखाराकाको हिदोइ बुङ आन्ता मान्थु।

² कालाउ इङको फुरु वाङखाराका खारा खोलेहि, कालाउ इङको वाङखाराका खारासो बारका मेको धुवा भाइका ओल्लेहि कालाउ इङको धुवाको कारानहोइ सान्हे कालाउ बातावरन दोङ कितिकितिहि।

³ इङको धुवासो प्रिथिबिता चाकागेलाइ लोहि। कालाउ इम्बालाइ चिम्ताङगेलाइ भाइकाङ प्रिथिबिको द्‍याङगेलाइहेङ चुका सरबुङ निङहि।

^4-5 जेसाङ द्‍याङगेलाइहेङ चिम्ताङको चुकाहोइ तुखे, एन्साङ दोङ इङको चाकागेलाइहेङ कस्ट पिलि खाबारा पिहि कालाउ सेअ्लिको भाअ्सिङ माको कि ना माइना थेकापा इङको द्‍याङगेलाइहेङ कस्ट पिहि जाइको कापालता परमेस्वरको मोहर मान्थु। कालाउ इम्बालाइहेङ प्रिथिबिको घासि, हिदोइ बुङ झारगेलाइ, कालाउ हिदोइ बुङ सिङसोङको, हान्ति पालि खाबारा मान्थुघाहि।

⁶ इङको ना माइनाता द्‍याङगेलाइ सिलिको भाअ्सिङ दामागेलाइ भोगिल्लावा, कालाउ इम्बालाइ सिलि माद्वाङ। इम्बालाइ सिलि भोकावा कालाउ बुङ इम्बालाइ सिलि मानिनावा।

⁷ या चाकागेलाइ धुम पालिको भाअ्सिङ तियार पाका ओह्याँगेलाइ भाइका तिङघाखे। इम्बालाइ ताइको पुरिङता सोनाको मुकुट भाइका लागाइका हिघाहि। इम्बालाइको ह्राइ द्‍याङगेलाइको ह्राइ भाइका तिङघाखे।

⁸ बेजानको भाइकाङ इम्बालाइको ह्रिङका पुसुङ हिघाहि। इम्बालाइको तासिङगेलाइ खुवाँगेलाइको तासिङगेलाइ भाइका बल्लियाका हिघाहि।

⁹ कालाउ इम्बालाइको तुम्ताता फालामको बानाइका कावाज लागाइका हिघाहि। जेलाउ इम्बालाइ उराइघाखे ओबालाइ इसिका गालागेलाइ ओल्लेपाघाहि जेसाङ कि हेन्जा ओह्याँगेलाइ कालाउ रथगेलाइता धुम पालि धाअ्पुघाहि।

¹⁰ इम्बालाइको मेथोङ कालाउ वाको चुका चिम्ताङगेलाइको भाइकाङ हिघाखे। जेदोङ चुका मेथोङता हिघाहि, वाको दोफा इम्बालाइ ना माइना थेकापा द्‍याङगेलाइहेङ कस्ट पिलि दोघाखे।

¹¹ एमि राजा हि, जाइ वाको नियन्तरोनता ताअ्खे। वा इङको दुत हि जाइ वाङखाराका खारा खोलेका हिघाहि। कालाउ हिब्रु भासाता वाको मिङ आबाडोन हि, कालाउ ग्रिक भासाता आपोल्लियोन हि। इदोइ मिङको मतलप “जाइहेङ वा नासा पाखे।”

¹² कालाउ ना माइना न्हुसो इदोइ बिपति दोकाङ। कालाउ इदोइको न्हुसो न्हेनोङ बिपतिगेलाइ आरोङ लोलि तोम्का हि।

¹³ कालाउ न्हुसो, तुतेङ स्वर्गदुत ताइको सानाइ म्होहि। जेलाउ वा सानाइ म्होहि, कालाउ का सोनाको स्वर्गको बेदिसो द्‍या कुन्हासो एनोङ गाला हिङघा। इदोइ सोनाको बेदि परमेस्वरको आगाता धुमाना जोलाइलिको भाअ्सिङ प्रयोग पाखे।

¹⁴ कालाउ गालाहोइ तुतेङ स्वर्गदुतसो जाइ ताइको खुरता सानाइ चुम्का हिघाहि वाकोसो दोअ्हि, “कालाउ एला इङको द्‍यामि दुतगेलाइहेङ लाअ्पि जाइहेङ बारका झोराको काम्भेता धेउका हिघाहि, जाइको मिङ युफ्रितिस हि।”

¹⁵ कालाउ इङको जेदोङ द्‍यामि दुतगेलाइहेङ लाअ्पिहि। कालाउ इम्बालाइ लाम्फा दोङ तियार जेङका हिघाहि। इम्बालाइसो दोअ्हि कि इदोइ बेला, इदोइ दिना, इदोइ माइना कालाउ इदोइ बासारको भाअ्सिङ ह्रुम्सु कालाउ एला इङको सोमोइ लोलि दोका हि। इम्बालाइ सुमिङको ए भाग तिहाइ द्‍याङगेलाइहेङ सेअ्लि गोइखे।

¹⁶ इम्बालाइ धुमको भाअ्सिङ ओह्याँ धाअ्पाका सिपालाइको बारका फोउज जोम्पाहि। का हिङघा कि इम्बालाइको गनाना ए कुरि करोड हिघाहि।

¹⁷ इङको ओह्याँको कालाउ इम्बालाइको सवारगेलाइ जाइहेङ का ताइको दर्सनता तिङका हिघाखा, इम्बालाइहेङ इसिका तिङघाखे: वाको तुम्ताता रक्स्या पालि कवच हिघाहि, वाको रङग मेको भाइका इ:का, नेल्पा कालाउ गन्धकको भाइका याउका हिघाहि। इङको ओह्याँको पुरिङगेलाइ खुवाँको पुरिङगेलाइ भाइकाङ तिङघाखे। कालाउ इम्बालाइको नुइसो मे, धुवा कालाउ गन्धक बाहार ओल्लितेङ हिघाहि।

¹⁸ मे, धुवाँ कालाउ गन्धक इदोइ सुमलोङ बिपतिगेलाइ हिघाहि, जेदोङ ओह्याँगेलाइको नुइसो ओल्लेतेङ हिघाहि। इदोइ बिपतिहोइ सुमिङता हिका ए तिहाइ भाग द्‍याङगेलाइहेङ सेअ्हि।

¹⁹ इदोइ ओह्याँगेलाइको मेथोङगेलाइता, चोका भाइका पुय्याँगेलाइको पुरिङगेलाइ भाइका आमेनेगेलाइ हिघाहि। ओबालाइको ताइको मेथोङहोइ द्‍याङ जातिहेङ याताना पिघाहि। एसापा, इदोइ ओह्याँगेलाइ ताइको नुइसो कालाउ ताइको मेथोङगेलाइहोइ मानिमुइ जातिगेलाइहेङ याताना पिहि कालाउ वासेहेङ सेअ्हि।

^20-21 कालाउ बाकि द्‍याङगेलाइ जाइ लाम्फाको लोका बिपतिगेलाइसो जाइहेङ मारा मापाहि, इम्बालाइ आझाइ बुङ ताइको दुस्ट काम पालि मालाअ्हि। इम्बालाइ मारा पाका, जादु-टुनामुना, कासिबिरि, कालाउ खुका काम पाका भाइका पापको काम पालि मालाहि कालाउ इम्बालाइ परमेस्वर भारि माघुरिहि। इम्बालाइ भुत-आत्मागेलाइहेङ पुजा पालि कालाउ सोना, चान्दि, कासा, कालाउ फालाहोइ ताइको खुरहोइ बानाइका मुर्तिगेलाइको पुजा पालि बुङ मालाअ्हि। इङको मुर्तिगेलाइ, इङको मातिङखे, इङको हिङलि मादोखे, इङको तेलि मातेखे।