प्रकास 7 - Dhimal NT

एस्राएलको ए लाख न्हे कुरि द्या हाजार द्याङगेलाइ

^1-2 कालाउ न्हुसो, का सुमिङको द्‍या कुन्हाता द्‍यामि स्वर्गदुतगेलाइहेङ जाअ्तेङ हिका तिङघा। परमेस्वर इङको स्वर्गदुतगेलाइहेङ माहामारिसो इदोइ सुमिङहेङ द्‍याङगेलाइको हान्ति पालि खाबारा पिहि, चाहे इङको समुन्द्रता ह्याको याते भोनोइता। ओबालाइ भेरमाहेङ सुमिङको गोताङ द्‍या कुन्हासो रोकिहि, कालाउकि समुन्द्रता कालाउ भोनोइता कालाउ झारता भेरमा दोलाइतेङ माह्याको। का भेनेङ स्वर्गदुतहेङ नुहे भारि देखाल जेङका तिङघा। वाको दोफा सिन्हुका परमेस्वरको दागाइका चिन्हा हिघाहि, उङको स्वर्गदुत उङको द्‍यामि स्वर्गदुतगेलाइहेङ बारका तिराराइका गालाहोइ काइतेङ वा दोअ्हि,

³ “केलाइ केलाइको परमेस्वरको बान्धाइतिगेलाइको कापालता मोहोर मालागाइपा धाउ माहामारि वासेहेङ हान्ति मापाको, इङको सोमोइसो प्रिथिबि, समुन्द्र माकुनु सिङगेलाइहेङ हाइ दोङ मानासापा।”

⁴ जेलाउ स्वर्गदुतगेलाइ मोहोर लागाइलि दोपातेङ, हासु बुङ कासेहेङ दोअ्हि कि उङको द्‍याङगेलाइको जाइको कापालता स्वर्गदुतगेलाइ परमेस्वरको दागाइका चिन्हा हिघाहि इम्बालाइको सङख्या ए-लाख न्हे कुरि द्‍या हाजार हिघाहि। उङको द्‍याङगेलाइ इस्राएलको गोताङ तेन्हे कुलसो लोका हिघाहि।

^5-7 गोताङ कुलसो तेन्हे हाजार द्‍याङगेलाइ ह्रुता स्वर्गदुत मोहोर लागाइहि: यहुदाको कुलसो तेन्हे हाजार द्‍याङगेलाइहेङ, रुबेनको कुलसो तेन्हे हाजार द्‍याङगेलाइहेङ, गादको कुलसो तेन्हे हाजार द्‍याङगेलाइहेङ, आसेरको कुलसो तेन्हे हाजार द्‍याङगेलाइहेङ, नाप्तालिको कुलसो तेन्हे हाजार द्‍याङगेलाइहेङ, मनस्सेको कुलसो तेन्हे हाजार द्‍याङगेलाइहेङ, सिमियोनको कुलसो तेन्हे हाजार द्‍याङगेलाइहेङ, लेबिको कुलसो तेन्हे हाजार द्‍याङगेलाइहेङ, इस्साखारको कुलसो तेन्हे हाजार द्‍याङगेलाइहेङ,

⁸ जाबुलुनको कुलसो तेन्हे हाजार द्‍याङगेलाइहेङ, योसेफको कुलसो तेन्हे हाजार द्‍याङगेलाइहेङ, कालाउ बेन्यामिनको कुलसो तेन्हे हाजार द्‍याङगेलाइहेङ।

जे:का धाबा होङकालाइको बारका जेर

⁹ कालाउ न्हुसो, का इन्ता वथे बार्का द्‍याङको जेर तिङघा कालाउ हासु बुङ इङको गोताङहेङ गान्दिलि मादोघाहि। इम्बालाइ सुमिङको गोताङ जाति कुल, रास्ट, कालाउ गोताङ भासासो लोका हिघाहि। इम्बालाइ सिङहासन कालाउ थुमाको आगाता जाअ्हि। इम्बालाइ जे:का धाबा लागाइका हिघाहि, कालाउ गोताङ द्‍याङगेलाइ ताइको खुरता लाब्रा सिङको डालेङ चाअ्का हिघाहि, जेदोङ इङको साम्मानको चिन्हाको रुपता हिघाहि।

¹⁰ इम्बालाइ तिराराइका बारका गालाहोइ ह्रिकाइहि, “सिङहासनता बिराजमान हिका केलाइको परमेस्वरहेङ बाखानाइ ज्याको कालाउ थुमाहेङ बाखानाइ ज्याको। नाअ् दोङ इम्बालाइ झाराङहेङ मुक्ति पिखेना।”

¹¹ गोताङ स्वर्गदुतगेलाइ सिङहासनको द्‍यापाहाङ कालाउ आगुवागेलाइ द्‍यापाहाङ कालाउ द्‍यालोङ हुसि हिका प्रानिगेलाइको द्‍यापाहाङ जाअ्तेङ हिघाहि। इम्बालाइ झाराङ सिङहासनको आगाता तुघुरतेङ कालाउ परमेस्वरको आराधाना पाहि। कालाउ इम्बालाइ दोअ्हि,

¹² “आमेन! केलाइ घोसाना पाङ कि केलाइको परमेस्वर माहान, सरबुङसाइका, महिमित, कालाउ ग्यानि हि केलाइ वाको बाखिन पाइने कालाउ वासेहेङ जेलाउलाउ बुङ को भाअ्सिङ धन्यबाद चढाइन्हाखे। आमेन!”

¹³ कालाउ वाको न्हुसो आगुवा मध्येसो एमि कासेहेङ हि:हि, “इदोइ जे:का धाबा लोखोन होङकालाइ हासु हि? कालाउ इम्बालाइ हिसो-हिसोसो लोका हि?”

¹⁴ कालाउ का वासेहेङ दोअ्घा, “कासेहेङ थाहा मान्थु भरु नेउ, नासेहेङ दोङ थाहा हि।” वा कासेहेङ दोअ्हि, “इदोइ द्‍याङगेलाइ हि जाइ दुख भोगिका हि। इम्बालाइ ताइको धाबा थुमाको हितिता झाअ्हि कालाउ जे:का जेङहि, याको मतलब हि कि इम्बालाइको पाप लाअ्पाका हि।

¹⁵ ओदोङ भाअ्सिङ इम्बालाइ परमेस्वरको सिङहासनको आगाता जाअ्खे, इम्बालाइ पुरा सोमोइ परमेस्वरको मुन्दिरता वाको सेवा पाखे, कालाउ सिङहासनता बिराजमान हिका इम्बालाइहेङ सामाराइखे हाइपालिपानु वा इम्बालाइ दोफा हिखे।

¹⁶ इम्बालाइ हेलाउ बुङ माम्हितुताङ कालाउ चि-आम्लि माकिताङ, इम्बालाइहेङ एलासो सान्हे माकुनु हिदोइ बुङ धाङका आमेनेहोइ हेलाउ बुङ मा-ओपाङ।

¹⁷ हाइपालिपानु सिङहासनको माझाता हिका थुमा, वा इम्बालाइहेङ सामाराइयाङ, जेसाङ लाखुरिया ताइको भेडाहेङ चापाखे-आम्पाखे। वा इम्बालाइहेङ ताजा चि आम्पालि चुम्पुखे जेदोङहोइ द्‍याङगेलाइहेङ जिबन प्यावा। कालाउ परमेस्वर इम्बालाइको मिसियाँको गोताङ मितिगेलाइ योप्यावा।”