प्रकास 3 - Dhimal NT

सार्दिसको मन्डलिगेलाइहेङ सन्‍देस

¹ येसु कासेहेङ एसा बुङ दोअ्हि, सार्दिस सहरको मन्डलिको स्वर्गदुतहेङ या सन्‍देस लेखे: का वाआङ हिघा, जाइ ताइको खुरता न्हि लोङ फुरुगेलाइ चाअ्तेङ ताअ्का हि। कालाउ जाइ परमेस्वरको न्हि लोङ आत्मागेलाइहेङ दिङगिल्पिहि। कासेहेङ नाङको काम थाहा हि कि, नेलाइ का दोफा खाङधुरि योग्य खान्धुराइगेलाइ भाइका तिङसुखेना। कालाउ बास्तबता नेलाइ एला कासेहेङ मापिताइस्वाना।

² ओदोङ भाअ्सिङ, जागितेङ हिसु। काङकोता नाङको खाङधुरिहेङ बलियो पासु जेलाउ थेकापा नाङको आधे खाङधुरि बाकि हि, कालाउकि या गोताङ पुर्न रुपता मान्हाङ। का गिखा कि नेलाइ सिद्द मान्थु सुन्हा, हाइपालिपानु नाअ् जेदोङ पादोङखेना इङकोसो परमेस्वर खुसि मान्थु।

³ नाअ् लाम्फा हिङका कालाउ खाङधुरि पाका सिक्स्याहेङ फोम पाअ्‌, नाअ् जेदोङ धिरपाका हिघाखेना इङको को आनुसरन पाअ्‌, पाप पालि लाअ् कालाउ परमेस्वर भारि घुरे। जेसापा नेलाइ मारेम्का काम पालि मालाअ्सुन्हा पानु, नाअ् इङको सोमोइ थाहा मानिनाना जेलाउ का नासेहेङ साजाइ पिलि ल्वाङका, हाइपालिपानु का चोर भाइपा आचानाक ल्वाङका।

⁴ कालाउ नेलाइको माझाता सार्दिस सहरता आधिमि द्‍याङगेलाइ हि, जाइ पापगेलाइसो आसुद्द जेङका मान्थु। इम्बालाइ का दोफा जे:का धाबा होङतेङ हिगिल्लावा हाइपालिपानु इम्बालाइ योग्यको हि।

⁵ जाइ दुस्टको सरबुङहेङ हारिपावा, वासेहेङ जे:का लोखोन धाबा होम्पावा। कालाउ का उङको द्‍याङको मिङ जिबनको कितापसो मामेति प्याङका जेदोङता इम्बालाइको मिङ लेखेका हि जाइ आनान्त जिबन निङका हि। कालाउ का काङको आबा कालाउ वाको सेवा पाका स्वर्गदुतगेलाइको आगाता जाअ्ताङका, कालाउ का घोसाना पाङका कि इम्बालाइ काङको हि।

⁶ जाइ काङको या काथा हिङदोङखे, वा इङको काथाहेङ ध्यान पितेङ हिनाको, परमेस्वरको आत्मा मन्डलिगेलाइहेङ हाइ दोअ्खे।

फिलाडेलफियाको मन्डलिगेलाइहेङ सन्‍देस

⁷ येसु कासेहेङ एसा बुङ दोअ्हि, फिलाडेलफिया सहरको मन्डलिको स्वर्गदुतहेङ या सन्‍देस लेखे: का वाआङ हिघा, जाइ पबित्तरो कालाउ सत्ये हि, जाइ दोफा राजा दाउदको ताल्चा हि, जेलाउ का इङको ताल्चाहोइ फिनु हेअ्खा, हासु बुङ इङकोहेङ गि:लि माद्वाङ, कालाउ जेलाउ का इङको ताल्चाहोइ फिनु गि:ताङका हासु बुङ इङकोहेङ हेअ्लि माद्वाङ। जेदोङ नेलाइहेङ दोअ्खा वासेहेङ हिङसु।

⁸ कासेहेङ नेलाइको कामगेलाइ थाहा हि। का गिखा कि नेलाइ खाङधुरिता हेन्जा बल्लियाका मान्थु सुन्हा। कालाउ जेदोङ का नेलाइहेङ दोअ्घा नेलाइ इङको केम्सुन्हा। कालाउ नेलाइ काङकोता खाङधुरि पातेङ हिसुना। ओदोङ भाअ्सिङ का नाङको भाअ्सिङ फिनु हेअ्का हिघा जेदोङहेङ हासु बुङ गि:लि माद्वाङ।

⁹ उङको द्‍याङगेलाइ जाइ साइतानको एनोङ समुहको सदस्यगेलाइ दोङ हि इम्बालाइ दाबि पाखे कि ओबालाइ यहुदिगेलाइ हि, कालाउ इम्बालाइ जातिङको यहुदि माको कालाउ इम्बालाइ धाताइखे। का इम्बालाइहेङ चुमाङका कालाउ नेलाइको खोकोइता सेउपालि लागाइयाङका कालाउ का नेलाइहेङ मायारु पाखा दोअ्का इम्बालाइ थाहा निनाको।

¹⁰ कस्ट भोगिलाउ नाअ् धर्य ताअ्तेङ काङको सन्देसहेङ आनुसरन पाअ्‌, ओदोङ भाअ्सिङ का नासेहेङ जाचिकाको सोमोइसोङ नासेहेङ बान्चि पाङका। इदोइ जाचिकाको सोमोइ इदोइ सुमिङको गोताङ द्‍याङगेलाइता ल्वाङ।

¹¹ का धेमाङ लोदोङखा, कालाउ नाअ् बल्लियाका खाङधुरि ताअ्तेङ ताअ्लि गोइयाना, कालाउकि हासु बुङ नाङको बिजोइको इनाम घिङलि माद्वाको।

¹² जाइ दुस्टको सरबुङहेङ हारिपाखे, इङको द्‍याङगेलाइ परमेस्वरको मुन्दिरको खाम्बा भाइपाङ हिखे, जाइको का सेवा पाङका कालाउ इम्बालाइ बुङ जेलाउलाउको भाअ्सिङ परमेस्वरको मुन्दिरता ह्याङ। का इम्बालाइको जिउता काङको परमेस्वरको मिङ कालाउ काङको परमेस्वरको सहरको मिङ लेख्याङका, जेदोङ चाहि नावा यरुसेलेम हि। इङको सहर काङको परमेस्वरको स्वर्गसो लेता ल्वाङ। कालाउ काङको परमेस्वरसो का इम्बालाइको जिउता काङको नावा मिङ बुङ लेख्याङका।

¹³ जाइ काङको या काथा हिङदोङखे, वा इङको काथाहेङ ध्यान पितेङ हिनाको, परमेस्वरको आत्मा मन्डलिगेलाइहेङ हाइ दोअ्खे।

लाउडिकियाको मन्डलिगेलाइहेङ सन्‍देस

¹⁴ कालाउ येसु कासेहेङ एसा बुङ दोअ्हि, लाउडिकिया सहरको मन्डलिको स्वर्गदुतहेङ या सन्‍देस लेखे: का वाआङ हिघा, जाइहेङ आमेन दोअ्खे, हाइपालिपानु का भोरोसा यग्यो हिघा कालाउ का परमेस्वरको बारेता जेदोङ दोअ्घा गोताङ सत्ये हि। वा सिर्जाइहि गोताङ थोकको का स्रोत हिघा। जेदोङ का नेलाइहेङ दोअ्खा वासेहेङ हिङसु।

¹⁵ कासेहेङ नेलाइको कामगेलाइ थाहा हि कि, ना ते नाअ् खाङधुरिहेङ इन्कार पादोङखेना ना ते कासेहेङ गोताङ ह्रदयहोइ प्रेम पाखेना। का भोखा कि, याते नाअ् कासेहेङ इन्कार पाअ्‌ याते गोताङ ह्रदयहोइ कासेहेङ प्रेम पाअ्‌।

¹⁶ हाइपालिपानु नेलाइहेङ कासेहेङ पुर्न ह्रदयहोइ खाङधुरि मापास्वाना, ओदोङ भाअ्सिङ का नासेहेङ आसुइकार पालि तियार हिघा।

¹⁷ नेलाइ दोअ्सुखेना कि, “का धनि हिघा कालाउ का दोफा हेन्जा सम्पति हि, कालाउ हाइ दोङ माचाहिखा।” कालाउ सत्ये या कि नाअ् कान्हाँ भाइका हिना, नाअ् बास्ताबता हिसिका हिघाखेना दोअ्का काथा नासेहेङ थाहा मान्थु। नासेहेङ दायाको खाचो हि, हाइपालिपानु नाअ् गरिब हिना, याको मतलब नाङको खाङधुरि आतुइसा हि। नाअ् बुङ इसिका द्‍याङगेलाइ भाइका हिना जाइ दोफा लोखोन धाबा मान्थु।

¹⁸ इदोङ कारनहोइ पानाङ, का नासेहेङ साल्लाहा प्याङका कि मेसो सुद्द बानाइका सोना काङकोसो चोल कालाउकि नाअ् जातिङकोङ धनि जेङ। नाअ् ताइमिङ होङलि जे:का लोखोन बुङ चोल्लि गोइयाना जेदोङहोइ द्‍याङगेलाइ नासेहेङ नाङघाङ तिङका इङको लेदेरकासो बान्चिलि दोसु। नाङको मिसियाँता लागाइलिको भाअ्सिङ आधे मलम बुङ चोल्लि गोइखे कालाउकि नाअ् तिङलि द्वाना।

¹⁹ जाइहेङ का प्रेम पाखा, का इम्बालाइहेङ धिरपाङका कालाउ साजाइ प्याङका कालाउकि इम्बालाइ आसल जेनाको। कालाउ रेम्का कामगेलाइ पालि उत्सुक जेनाको कालाउ पाप पालि लाअ्ताको कालाउ परमेस्वर भारि घुरियाको।

²⁰ हिङसु, नाङको ह्रदय लिता दुल्लिको भाअ्सिङ, का साअ्को बाहार जाअ्तेङ हिका फिनु ढकढककाइतेङ हिका द्‍याङ भाइका हिघा। जेसापा नाअ् काङको गाला हिङना कालाउ काङको भाअ्सिङ ताइको ह्रदय हेअ्ना पानु, का लिता ल्वाङका कालाउ केलाइ दोफाङ सङगति पाङका।

²¹ जाइ दुस्टको सरबुङहेङ हारिपावा वा का दोफा काङको सिङहासनता योमावा, जेसाङ का जितितेङ काङको आबा दोफा वाको सिङहासनता योम्का हिघा।

²² जाइ काङको या काथा हिङदोङखे, वा इङको काथाहेङ ध्यान पितेङ हिनाको, परमेस्वरको आत्मा मन्डलिगेलाइहेङ हाइ दोअ्खे।