प्रकास 22 - Dhimal NT

¹ आरोङ स्वर्गदुत कासेहेङ जिबन पिका चि हिका एनोङ झोरा तिङपाहि। इङको चि झाला-झालाका सिसा भाइका चिल्कातेङ हिघाहि। इङको परमेस्वर कालाउ थुमाको सिङहासनसो झोतेङ हिघाहि।

² इङको झोरा परमेस्वर थुमाको सिङहासनको लितासो बाहार झोघाहि, कालाउ सहरको फाराका सडकको माझासो पातेङ झोघाहि। झोराको न्हेपाहाङ जिबन पिका सिङगेलाइ लागाइका हिघाहि, जेदोङ ए-बासारता तेन्हे खेप फल सेपाखे, कालाउकि गोताङ माइना किपाङ एखे। सुमिङता हिका द्‍याङगेलाइ इङको सिङगेलाइको ल्हाफागेलाइ ताइको मिसागेलाइ एल्पालिको भाअ्सिङ लागाइघाखे।

³ जेदोङ परमेस्वरसो स्राप पिका हिघाहि इङको सहरता माह्याङ। कालाउ परमेस्वर कालाउ थुमाको सिङहासन इङको सहरता ह्यावा, कालाउ परमेस्वरको सेवकगेलाइ वाको आराधाना पावा।

⁴ इम्बालाइ परमेस्वरहेङ ताइको आगा-आगाता तिनावा, कालाउ वाको मिङ इम्बालाइको कापालता लेखेका ह्यावा।

⁵ इन्ता आरोङ हेलाउ बुङ माबेलातावा, इङको सहरता हिका गोताङ द्‍याङगेलाइहेङ ताइको दामा तिङपालिको भाअ्सिङ गेसा जोलाइलि आवस्यकता मागोइयाङ। ना ते इम्बालाइहेङ प्राकास पिलि सान्हे गोइखे। हाइपालिपानु परमेस्वर एमि हि जाइ गोताङ द्‍याङगेलाइहेङ फाइसालामका पिखे। कालाउ इन्ता हिका द्‍याङगेलाइ जेलाउलाउ बुङ सासन पावा।

येसु धेमाङ लोदोङखे

⁶ इङको न्हुसो, स्वर्गदुत कासेहेङ दोअ्हि, “इदोइ गोताङ काथा जेदोङ नासेहेङ दोअ्का हि या सत्ये हि कालाउ भोरोसा पालि योग्य हि। हाइपालिपानु परमप्रभु परमेस्वर जाइ ताइको आत्मा गोताङ बक्तागेलाइहेङ पिहि, वा दोङ जाइ ताइको स्वर्गदुतहेङ आदेस पिहि कि वा इता लोतेङ कालाउ ताइको सेवाकगेलाइको इङको काथा तिङपाको जेदोङ धेमाङ पुरा जेनाङ।”

⁷ येसु दोअ्खे, “हिङसु, का धेमाङ लोदोङखा। इङको द्‍याङगेलाइ धन्य हि जाइ इदोइ कितापता लेखेका आगमबानिको काथाहेङ केम्खे।”

⁸ काङको मिङ युहान्‍ना, कालाउ का ओदोङ हिघा जाइ इदोइ गोताङ काथागेलाइ हिङघा कालाउ तिङधा। जेलाउ का इदोइ काथागेलाइ हिङघा कालाउ तिङघा, जेदोङ स्वर्गदुत कासेहेङ तिङपाहि का वाको आगाता तुघुरघा, हाइपालिपानु का वाको आराधाना पालि हानिदोङघाखा।

⁹ कालाउ वा कासेहेङ दोअ्हि, “कासेहेङ आराधाना मापासु, खिनिङ परमेस्वरको आराधाना पासु! का बुङ नाअ् भाइकाङ कालाउ नाङको सानाइति खान्धुराइ ओनेगेलाइ भाइपाङ परमेस्वरको एमि सेवक हिघा, जाइ आगामबानि पाखे। कालाउ का इम्बालाइ झाराङ भाइपा हिघा जाइ इदोइ कितापता लेखेका आगमबानिको काथागेलाइ किखे।”

¹⁰ आरोङ वा कासेहेङ दोअ्हि, “इदोइ कितापता लेखेका आगमबानिको काथागेलाइ म्होतेङ माअ्ता। हाइपालिपानु इदोइ काथागेलाइ पुरा जेङलि हेन्जा सोमोइ मालागियाङ।

¹¹ जाइ द्‍याङगेलाइ दुस्ट काम पाखे, वा दुस्ट काम पातेङ ह्याको। जेदोङ द्‍याङगेलाइ आसलिल काम पाखे, वा आसलिल काम पातेङ ह्याको। कालाउ जाइ द्‍याङगेलाइ रेम्का पाखे, वा रेम्का काम पातेङ हिलि गोइखे, जाइ झाराङ द्‍याङगेलाइ पबित्तरो हि वा लागातार पबित्तरो ह्याको।”

¹² आरोङ प्रभु येसु दोअ्हि, “का धेमाङ लोदोङखा। गोताङ द्‍याङगेलाइ जेदोङ पाहि इङको को आन्सार वासेहेङ इनाम माकुनु दन्ड पिलिको भाअ्सिङ, का ल्वाङका।

¹³ का दोङ आल्फा कालाउ ओमेगा हिघा। का दोङ सुरु कालाउ आन्त्य हिघा।”

¹⁴ धन्य हि इम्बालाइ जाइ ताइको धाबा थुमाको हितिहोइ झाहि, हाइपालिपानु इम्बालाइहेङ फिनुगेलाइसो दुल्तेङ सहर हानिलिको भाअ्सिङ कालाउ जिबन पिका सिङको फल चाअ्लि खाबारा प्यावा।

¹⁵ कालाउ जाइको कामगेलाइ चाहि लेदेर लुका हि, जाइ जादु-तुना पाखे, कासिबिरि पाखे, मारा पाखे, मुर्ति पुजा पाखे, कालाउ जाइ धाताइखे, एबालाइ झाराङ हेलाउ बुङ इङको सहरता दुल्लि मानिनाङ।

¹⁶ “का येसु दोङ हिघा, कालाउ का काङको स्वर्गदुत इदोइ भाअ्सिङ दिङगिल्घा कि वा नेलाइ मन्डलिको झाराङ द्‍याङगेलाइहेङ इदोइ गोताङ काथागेलाइ दोअ्लि द्वाको। का राजा दाउदको हारागुटियासो हिघा, का वाआङ हिघा जाइ फुरु भाइका हि जेदोङ ह्रिमाको सान्हे लोलाउ देखाल जेङखे।”

¹⁷ परमेस्वरको आत्मा कालाउ थुमाको दारवाइनि येसुहेङ दोअ्खे, “नाअ् लोलिङ गोइयाना।” जाइ झाराङ इदोइ हिङखे वा बुङ एसा दोअ्ताको, “लोसु!” जाइ चि आम्लि किका हि वा इता लोलिङ गोयाङ। जिबन पिका चि आम, जाइ झाराङहेङ ए पाइसा माकोसिङ पिखे।

¹⁸ का युहान्‍ना, का गोताङ द्‍याङगेलाइहेङ चेताउनि पिदोङखा जाइ एला जेङतेङ हिका काथागेलाइ कालाउ भबिस्यता जेङका काथागेलाइको सन्‍देस हिङखे। या काथगेलाइ का इदोइ कितापता लेखेका हिघा। जेसापा हासु बुङ इदोइ सन्देसता हिदोइ बुङ थपिनु, परमेस्वर नाङको साजाइता थोपिप्याङ। जेदोङ का इदोइ कितापता बिपतिगेलाइको बारेता लेखेका हिघा, वाको दोफा परमेस्वर नेलाइहेङ साजाइ प्याङ।

¹⁹ जेसापा नाअ् इदोइ कितापता लेखेका हिदोइ बुङ आगमबानिको सन्‍देस ओल्ला पानु, परमेस्वर नासेहेङ बुङ इदोइ कितापता लेखेका आसिसगेलाइ माप्याङ। ओदोङ भाअ्सिङ, परमेस्वर नासेहेङ जिबन पिका सिङको फल चाअ्का खाबारा कालाउ पबित्तरो सहरता जियाइका खाबारा माप्याङ।

²⁰ इदोइ कितापता लेखेका काथागेलाइको साक्सि येसु दोङ हि। वा दोअ्हि, “निस्चय, का धेमाङ लोदोङखा।” का, युहान्‍ना वासेहेङ जोबाफ पिघा, “आमेन! प्रभु येसु लौउ।”

²¹ केलाइको प्रभु येसु ख्रिस्टको आनुग्रह परमेस्वरको गोताङ द्‍याङगेलाइ दोफा ह्याको। आमेन!