प्रकास 20 - Dhimal NTए-हाजार बासार 1 कालाउ न्हुसो, का एनोङ स्वर्गदुतहेङ स्वर्गसो लेता खुतेङ लोका का तिङघा। वाको दोफा चिल वाङवाङका खाराको ताल्चा हिघाहि कालाउ वा एनोङ बारका ताल्चा खुरता चुम्का हिघाहि। 2 वा बारका आजिङगरहेङ रिम्हि कालाउ झिन्झिरिहोइ ए-हाजार बासारको भाअ्सिङ जिङतेङ राहि, इङको बारका आजिङगर ओदोङ हि जाइ हेन्जा सोमोइ लाम्फा पुह्याँको रुपता देखाल जेङहि। वाको मिङ साइतान हि। 3 स्वर्गदुत वासेहेङ चिल वाङवाङका खाराता थाइगिल्पिहि, कालाउ चिल वाङवाङका खाराको नुइ गि:पिहि कालाउ इङको ह्रुता आलाकात्तरा तेपापिहि कालाउकि, इङको ए-हाजार बासार थेकापा साइतान सुमिङको द्याङगेलाइहेङ धोका माप्याको। कालाउ न्हुसो, या जरुरि हि कि वासेहेङ आतुइसा सोमोइको भाअ्सिङ लाअ्पिलि गोयाङ। 4 कालाउ न्हुसो, का आधे सिङहासनगेलाइ तिङघा, वाको दोफा योम्तेङ हिका द्याङगेलाइ दोफा सासन पालि खाबारा पिहि। का इम्बालाइको आत्माहेङ बुङ तिङघा जाइको पुरिङ पाल्पाहि हाइपालिपानु इम्बालाइ येसु दोङ प्रभु दोअ्तेङ सुइकार पाहि कालाउ इम्बालाइ परमेस्वरको बचनहेङ खाङधुरि पाहि। जेदोङ उङको द्याङगेलाइ इङको राक्सेसको माकुनु वाको मुर्तिको पुजा मापाहि, कालाउ इम्बालाइ ताइको कापालता माकुनु खुरता राक्सेसको दागाइका चिन्हा मालागाइहि। इदोइ द्याङगेलाइ आरोङ सिन्हुहि कालाउ ए-हाजार बासारको भाअ्सिङ ख्रिस्ट दोफा सासन पाहि। 5-6 इदोइ द्याङगेलाइ लाङगेलाइ हि जाइ आरोङ सिन्चालका हि कालाउ इम्बालाइ धन्य हि कालाउ पबित्तरो हि। ओबालाइ ह्रुता न्हेतेङ सिकाको हिदोइ बुङ खाबारा मान्थु। इम्बालाइ बुङ परमेस्वर कालाउ ख्रिस्टको भाअ्सिङ पुजारि भाइपा जेनावा कालाउ इम्बालाइ दोफा ए-हाजार बासार थेकापा सासन पावा। ए-हाजार बासार दोका थेकापा, हासु बुङ आरोङ मासिन्चाल्याङ। साइतानको आम्तिम नासाका 7 ए-हाजार बासार थुकातेङ न्हुसो, साइतानहेङ थुनासो लाअ्प्याङ। 8 इङको सोमोइ, स्वर्गदुत साइतानहेङ जेता जिङका हिघाहि इन्तासो लाअ्प्याङ, कालाउ वा बाहार ओल्यावा कालाउ प्रिथिबि भरिको गोताङ जातिगेलाइको द्याङगेलाइहेङ दोका प्यावा। इङको जातिगेलाइको द्याङगेलाइहेङ गोग कालाउ मागोग दोअ्खे। साइतान इम्बालाइ झाराङहेङ ए-दोफाङ इङको थामेता जोम्पावा जेता इम्बालाइ धुम पावा। इङको द्याङगेलाइको गान्दिका समुन्द्रको काम्भेता बाला भाइपा ओसारापा बारका जेनावा जाइहेङ हासु बुङ गान्दिलि मादोअ्खे। 9 वा बाहार ओल्लेतेङ प्रिथिबिको गोताङ थामेता हानिहि। इम्बालाइ परमेस्वर दोङ प्रेम पाका सहरहेङ खोराइयावा जेता परमेस्वरको द्याङगेलाइ हिघाखे। कालाउ मे स्वर्गसो परमेस्वर पाहासो लोहि कालाउ गोताङ सिपालाइहेङ ओपाहि। 10 कालाउ न्हुसो साइतानहेङ रिमाङ, जाइ प्रिथिबिता हिका द्याङगेलाइहेङ धोका पिका हिघाहि। साइतानहेङ गन्धकको मेता थाइगिल्प्याङ, इङको मे जेदोङ ताल भाइका बारका ह्याङ। राक्सेस कालाउ धातुवा आगमबक्तागेलाइहेङ लाम्फाङ दोङ थाइगिल्पिका हिघाहि। कालाउ इन्ता नितिम न्हिसिन जेलाउलाउ बुङ इम्बालाइ मेता कस्ट भोगियावा। जे:का रङको सिङहासन कालाउ आम्तिम न्याय 11 आरोङ का एनोङ बारका जे:का सिङहासन तिङघा, जेता परमेस्वर योम्तेङ हिघाहि। जेता वा योम्का हिघाहि इङको थामेसो प्रिथिबि, आकास कालाउ गोताङ माअ्हि, कालाउ हासु बुङ इम्बालाइहेङ आरोङ हेलाउ बुङ मातिङहि। 12-13 कालाउ का सिङहासनको आगाता सिका द्याङगेलाइहेङ तिङघा, जाइ, महत्व पुर्न कालाउ महत्वहिन हि। जाइ समुन्द्रता दुबेतेङ सिका द्याङ हिघाहि, तोमगेलाइता हिका झाराङ सिका द्याङगेलाइ, जाइ सिकालाइको थामेता हिघाहि, इम्बालाइ झाराङ सिङहासनको आगाता जाअ्हि। कालाउ गोताङ किताप खोलेहि, कालाउ जिबनको किताप बुङ खोलेहि। सिका द्याङगेलाइ जेदोङ गोताङ काम पाहि इङको कितापता लेखेका हिघाहि कालाउ इङको कामगेलाइ आन्सार इम्बालाइ झाराङहेङ न्याय पिहि। 14-15 झाराङ द्याङगेलाइको जाइको मिङ जिबनको कितापता लेखेका मान्थु, इङको झाराङहेङ ताल भाइका बारका मेता थाइगिल्हि। कालाउ न्हुसो एला सिका आरोङ माजेनाङ, सिका द्याङगेलाइको थामे बुङ आरोङ माह्याङ, हाइपालिपानु गोताङ द्याङगेलाइ जाइको मिङ जिबनको कितापता लेखेका मान्थु, इम्बालाइ झाराङहेङ ताल भाइका बारका मेता थाइगिल्पिहि। मेको ताल्ता निङका इदोइ साजाइहेङ न्हेतेङ सिका दोअ्खे। |
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
Beyond Translation