प्रकास 2 - Dhimal NT

एफिसस सहरको मन्डलिगेलाइहेङ सन्‍देस

¹ येसु कासेहेङ एसा बुङ दोअ्हि, एफिसस सहरको मन्डलिको स्वर्गदुतहेङ या सन्‍देस लेखे: का वाआङ हिघा जाइ न्हि लोङ फुरुहेङ काङको दाम्पाहा खुरता ताअ्ताङका कालाउ न्हि लोङ सोनाको चेरादानिगेलाइको माझाता ताअ्खे। जेदोङ का नेलाइहेङ दोअ्खा वासेहेङ हिङसु।

² कासेहेङ नेलाइको काम थाहा हि कि, हेसा नाअ् कथिन परिस्रोम पाखेना कालाउ हारेस माचाखेना। कालाउ कासेहेङ थाहा हि कि नेलाइ दुस्ट द्‍याङगेलाइहेङ सुइकार मापा सुखेना। नाअ् उङको द्‍याङगेलाइहेङ जाचिन्हा, जाइ छाल्न्हाका चात्या दोङ दोअ्तेङ धाताइका दाबि पाहि, कालाउ बास्तबता माको, कालाउ नाअ् फेला पान्हा कि इम्बालाइ धाताइका हिघाहि।

³ का गिखा, हाइपालिपानु नेलाइ का ह्रुता खाङधुरि पासुना नेलाइ धैर्य पातेङ सहिका हिसुना, कालाउ का ह्रुता नाङको भोरोसा बल्लियाका हि।

⁴ कालाउ नेलाइको बिरोधता कासेहेङ या गुनासो हि: नेलाइ एला कासेहेङ इन्सिका प्रेम मापा सुखेना जेसाङ नेलाइ लाम्फा प्रेम पाघासुखेना जेलाउ नेलाइ कासेहेङ खाङधुरि पासुना।

⁵ फोम पासु लाम्फा नेलाइ हेसा कासेहेङ प्रेम पाघासुखेना, कालाउ एला नेलाइ कासेहेङ इन्सिका प्रेम मापा सुखेना। नेलाइ पाप पालि लाअ्सु कालाउ परमेस्वर भारि घुरिसु कालाउ लाम्फा भाइपाङ कासेहेङ प्रेम पासु। जेसापा नेलाइ पाप पालि मालाअ्सुन्हा कालाउ परमेस्वर भारि मन मापिस्वाना पानु, का नेलाइकोता ल्वाङका कालाउ का नेलाइको चेरादानि जेता हि इन्तासो हातिपातेङ नेलाइहेङ दन्ड प्याङका।

⁶ कालाउ का नेलाइसो हेन्जा खुसि जेङका हिघा, हाइपालिपानु नेलाइ निकोलाइटसको मारेम्का कामगेलाइहेङ सिकाका भाइपाङ का बुङ इम्बालाइको कामगेलाइहेङ सिकाताङका।

⁷ जाइ काङको या काथा हिङदोङखे, वा इङको काथाहेङ ध्यान पितेङ हिनाको, परमेस्वरको आत्मा मन्डलिगेलाइहेङ हाइ दोअ्खे। दुस्टको सरबुङहेङ हारिपाका द्‍याङगेलाइहेङ का इङको सिङसो फल चाअ्का आनुमति प्याङका, जेदोङ सिङ जिबन पिखे, जेदोङ परमेस्वरको स्वर्गको बागाइचाता हि।

स्मुर्नाको मन्डलिगेलाइहेङ सन्‍देस

⁸ येसु कासेहेङ एसा बुङ दोअ्हि, स्मुरना सहरको मन्डलिको स्वर्गदुतहेङ या सन्‍देस लेखे: का वाआङ हिघा जाइ गोताङ आमेने सुरु पाहि, कालाउ का आवाङ हिघा जाइ गोताङ आमेने आन्त्य बुङ पाहि। का सिका हिघाखा, कालाउ एला सिन्हुका हिघा कालाउ जेलाउलाउको बुङ भाअ्सिङ सिन्हुतेङ ह्याङका। जेदोङ का नेलाइहेङ दोअ्खा वासेहेङ हिङसु।

⁹ कासेहेङ थाहा हि कि, नासेहेङ साताइका हि कालाउ नाअ् गरिब हिना। कालाउ आत्मिक काथाता ना बास्ताबिक धनि हिना। का इम्बालाइको बारेता गिखा जाइ दाबि पाखे कि इम्बालाइ परमेस्वरको चुनिका यहुदिगेलाइ हि। इम्बालाइ नेलाइको बारेता निन्दाको काथागेलाइ दोअ्खे, कालाउ इम्बालाइ बास्ताबता एनोङ समुहको सदस्यगेलाइ दोङ हि, जेदोङ साइतानको हि।

¹⁰ नाअ् भोगिलि तोम्का कस्टसो माअ्थि। साइतान नेलाइ मध्ये हेथेहेङ द्‍याङगेलाइसो रिम्पाखे कालाउ नेलाइहेङ जाचिलिको भाअ्सिङ झ्यालखानाता पिगिल्खे। नाअ् ते दिनाको भाअ्सिङ बार्का समस्याको आनुभब पान्हा। कालाउ नेलाइहेङ सेअ्लाउ बुङ नेलाइ हेलाउ बुङ हारेस माचासु काङकोता खाङधुरि पासु, हाइपालिपानु का नेलाइहेङ आनान्त जिबन प्याङका, इङको चाहि नाङको जिति का को इनाम जेनाङ।

¹¹ जाइ काङको या काथा हिङदोङखे, वा इङको काथाहेङ ध्यान पितेङ हिनाको, परमेस्वरको आत्मा मन्डलिगेलाइहेङ हाइ दोअ्खे। जाइ दुस्टको सरबुङहेङ हारिपाखे, वा दन्ड मानिनाङ, जेदोङ चाहि न्हेतेङ सिका हि।

पर्गाममको मन्डलि

¹² येसु कासेहेङ एसा बुङ दोअ्हि, पर्गाममको सहरको मन्डलिको स्वर्गदुतहेङ या सन्‍देस लेखे: का वाआङ हिघा जाइ दोफा धार हिका न्हेधारे कात्ति हि, जेदोङ का नेलाइहेङ दोअ्खा वासेहेङ हिङसु।

¹³ कासेहेङ थाहा हि, नेलाइको सहर साइतानको कब्जाता हि, कालाउ इङको को बाबजुद बुङ नेलाइ काङको ह्रुता नाङको खाङधुरिहेङ रिम्तेङ ताअ्का हिसुना। कालाउ नेलाइ काङको सिक्स्याहेङ लाअ्का मान्थु सुन्हा। इङको बेला बुङ नेलाइ का ह्रुता खाङधुरि पालि मालासुन्हा जेलाउ हेन्जा लाम्फा एन्टिपास सेअ्न्हाहि। वा काङको सन्‍देस प्राचार पालि खाङधुरि योग्य हिघाहि, कालाउ बुङ वा नेलाइको सहरता सेअ्नाहि जेदोङ साइतानको कब्जाता हि।

¹⁴ कालाउ कासेहेङ नेलाइको बारेता हाइ दोङ गुनासो हि, हाइपालिपानु धाताइका सिक्स्या पिकालाइहेङ नेलाइ बिरोध मापास्वाना जिसिका परमेस्वरको बक्ता बालाम लाम्फाको सोमोइता जेदोङ धिरपाहि। बालाम बालाक राजाहेङ धिरपाहि कि इस्राएललिको द्‍याङगेलाइहेङ हेसा लोभता फासेपातेङ पाप पापालि, वा मुर्तिगेलाइहेङ भोग पिका आमेने चालि-आम्लि कालाउ आनैतिक जिबन बितिपालि धिरपाहि।

¹⁵ इन्सिकाङ प्रकारसो नेलाइको माझाता हासु बुङ द्‍याङगेलाइ हि, जाइ निकोलाइटसको समुहको सिक्स्याहेङ केम्खे।

¹⁶ ओदोङ भाअ्सिङ पाप पालि लाअ्सु परमेस्वर भारि घुरिसु, जेसापा नेलाइ इङको पालि मालाअ्सुन्हा पानु, का धेमाङ ल्वाङका कालाउ इङको धाताइका सिक्स्या पिकालाइको बिरोधता का काङको नुइसो ओल्लेका कात्तिहोइ जुदियाङका जेदोङ काङको बचन हि।

¹⁷ जाइ काङको या काथा हिङदोङखे, वा इङको काथाहेङ ध्यान पितेङ हिनाको, परमेस्वरको आत्मा मन्डलिगेलाइहेङ हाइ दोअ्खे। उङको द्‍याङगेलाइहेङ जाइ दुस्टको सरबुङहेङ हारिपावा, का आधे मन्न प्याङका जेदोङ म्होका हिघाहि। का झाराङहेङ एनोङ जे:का उन्ठुइ प्याङका, जेदोङता नावा मिङ लेखेयाङ। इङको मिङ हासुहेङ बुङ थाहा माज्याङ इङको मिङ ह्रुका द्‍याङ बाहेक।

थिआटिराको मन्डलिगेलाइहेङ सान्‍देस

¹⁸ येसु कासेहेङ एसा बुङ दोअ्हि, थिआटिरा सहरको मन्डलिको स्वर्गदुतहेङ या सन्‍देस लेखे: का परमेस्वरको चान, नेलाइहेङ इदोइ काथा दोअ्दोङखा, जाइको मिसियाँ मेको दालाङगा-दलाङगाअ्का भाइका हि, जाइको पाइताला चिल्का पातेङ ताअ्का कासको भाइका हि, जेदोङ का नेलाइहेङ दोअ्खा वासेहेङ हिङसु।

¹⁹ कासेहेङ नेलाइको काम थाहा हि कि, नाअ् एमिसो भेनेङहेङ प्रेम पाखेना, नाअ् काङकोता ओसारापाङ भोरोसा ताअ्खेना। कालाउ कासेहेङ थाहा हि कि, नाअ् एमिसो भेनेङहेङ हेसा साघाइका हिना, कालाउ नाङको धैर्यको स्यमता। कालाउ का गिखा कि, नेलाइ एला बुङ लाम्फाङ खान्तेङ आसल कामगेलाइ पासुखेना, जेलाउ नाअ् का ह्रुता लाम्फा खाङधुरि पाका हिघाखेना।

²⁰ कालाउ नाङको बिरोधता कासेहेङ या गुनासो दोअ्लि हि: नाअ् इजेबेल दोअ्का बेबालहेङ सहिका हिना। वा ताइमिहेङ परमेस्वरको बक्ता दोअ्खे, कालाउ काङको द्‍याङगेलाइहेङ कासिबिरि पालि कालाउ मुर्तिगेलाइहेङ भोग पिका आमेने चालि-आम्लि कालाउ आसलिल जिबन बितिपालि धिरपाहि।

²¹ का वासेहेङ ताइको पाप पालि लाअ्तेङ परमेस्वर भारि घुरिसु दोअ्तेङ आबसर पिका हिघा, कालाउ वा इङको मारेम्का कामगेलाइ पालिसो रोकिलि इन्कार पाखे।

²² खाङसु, का वासेहेङ मिसा लोका बानाइ याङका। कालाउ का वा दोफा कासिबिरि पाकालाइहेङ थिलि गोइका कस्ट चुमा प्याङका, जेलाउ थेकापा इम्बालाइ वाको दोफा पातेङ हिका आखेका कामगेलाइ पालि मारोकिखे।

²³ का वाको सिक्स्या पिताइकालाइहेङ सेअ्ताङका। कालाउ गोताङ मन्डलिगेलाइको खान्धुराइगेलाइ बुझियाङ कि का आवाङ हिघा जाइ झाराङको मन बिचारगेलाइ जाचिखे, कालाउ द्‍याङगेलाइ हाइ भोखे दोअ्तेङ गिखे। का नेलाइ झाराङहेङ नेलाइको पाका पाप आन्सार दन्ड प्याङका।

^24-25 कालाउ थिआटिरा सहरता नाअ् बाकि हिकागेलाइ वाको धाताइका सिक्स्याहेङ केम्का मान्थु सुन्हा। नेलाइ इङको सिक्स्यागेलाइ सुइकार पाका मान्थु सुन्हा जाइ वासेहेङ पिताइकालाइ दोअ्खे, “हेन्जा महत्य पुर्न आमेनेगेलाइ जेदोङ साइतान पिखे।” का नासेहेङ दोअ्खा कि का आरु हिदोइ बुङ महत्य पुर्न आदेस नेलाइ ह्रुता मालादाइ याङका, इदोइ बाहेक कि नाअ् काङकोता बल्लियाका खाङधुरि पातेङ हि जेलाउ थेकापा का माल्वाङका।

²⁶ इम्बालाइ जाइ दुस्टको सरबुङहेङ हारिपावा कालाउ जाइ काङको आग्यागेलाइहेङ आन्त थेकापा केम्खे, का इम्बालाइहेङ सारभिगेलाइ ह्रुता सासन पालि खाबारा प्याङका।

²⁷ काङको आबासो का खाबारा निङका भाइपा का इम्बालाइहेङ सासन पालि खाबारा प्याङका। इम्बालाइको सासन चिरको डान्ठा भाइका बल्लियाका जेनावा जेदोङ माथुर्खे, कालाउ इम्बालाइको सतुरुगेलाइ पोङन्हाका भोनोइको भान्डा भाइपा नासातावा, कालाउ इम्बालाइ चाकनाचुर जेनाङ जेसाङ द्‍याङगेलाइ भोनोइको भान्डाहेङ भोइपाखे।

²⁸ का इम्बालाइको बिजोइको भाअ्सिङ इम्बालाइहेङ ह्रिमाको फुरु प्याङका।

²⁹ जाइ काङको या काथा हिङदोङखे, वा इङको काथाहेङ ध्यान पितेङ हिनाको, परमेस्वरको आत्मा मन्डलिगेलाइहेङ हाइ दोअ्खे।