प्रकास 18 - Dhimal NT

बेबिलोनको सहरको नास

¹ कालाउ न्हुसो, का भेनेङ स्वर्गदुतहेङ स्वर्गसो लेता खुअ्तेङ लोका तिङघा। वाको दोफा बारका खाबारा हिघाहि कालाउ वाको बारका जोल्का को कारन सारा प्रिथिबि फाइसालामहि।

² वा बारका गालाहोइ दोअ्हि, “एला या नासा हि। माहान बेबिलोन सहर हेन्जा नासा हि। हाइपालिपानु गोताङ खाल्को भुत-आत्मागेलाइ, इन्ता हिलि तेङहि। इन्ता सिकाका न्हाम्का जिहाँ जुइलेङगेलाइ ताइको बासा ज्वाङ।

³ या इदोइ भाअ्सिङ जेनाङ हाइपालिपानु, इदोइ बेबाल जाइ बेबिलोन सहर हि, वा गोताङ सारभिको गोताङ द्‍याङगेलाइहेङ ताइको गोरा आम्पाहि, जेदोङ वाको मुर्तिगेलाइको पुजा हि। गोताङ प्रिथिबिको गोताङ राजागेलाइ वाको दोफा मारेम्का काम पालिको भाअ्सिङ वाको दोफा झ्वाइनाहि। प्रिथिबिको गोताङ ब्यापारिगेलाइ धनि जेङहि, हाइपालिपानु उङको बेबालको इच्छा जाङका आनेमानेगेलाइ निङलि हि।”

⁴ इङको सोमोइता का स्वर्गसो भेनेङ गाला एसा दोअ्काताङ पाका हिङघा, “नेलाइ जाइ काङको द्‍याङगेलाइ हिसुना, इङको सहर लाअ्सु। इङको सहरको द्‍याङगेलाइको पाप भाइपा मापासु, कालाउकि इम्बालाइ दोफा नेलाइ माहिसु।

⁵ हाइपालिपानु, इम्बालाइको पापगेलाइ हेन्जा बारका हि, जेदोङ रास आकास थेकापा थुकाहि। परमेस्वर इम्बालाइको पाका दुस्ट कामगेलाइ मानिलाङ।

⁶ ओदोङ भाअ्सिङ का दोअ्दोङखा, जेसाङ बेबिलोन सहर भेनेङ दोफा पाहि, वाको दोफा बुङ इन्सिकाङ पाअ्‌। याको गोताङ दुस्ट कामगेलाइ खान्तेङ, न्हे गुना हेन्जा घुरि पापि। इङको सहरको भाअ्सिङ न्हे गुना सरबुङसाइका याताना तियार पापि, इङको याताना भाइका जाइ वा आरु द्‍याङगेलाइहेङ पिका हिघाहि।

⁷ नाअ् इङको बेबालहेङ मारेम्फाङ पिडा कालाउ दुख पि, जेदोङ वाको माताइका जिबन कालाउ ताइमिङ ह्रुता गर्वको बानाबोर जेनाङ। वा ताइमिहेङ दोअ्हि, ‘का द्‍याङगेलाइहेङ रानिको भाइपाङ सासन पाखा कालाउ का बिना के को मान्थुघा। कालाउ कासेहेङ के सिकाको पिडा माजेनाङ।’

⁸ वाको गर्वको कारान, आचानाक वाको ह्रुता बिपति ल्वाङ। ए दिनाता मिसा, बेदाना, कालाउ आकाल ए दोफाङ वाकोता ल्वाङ। कालाउ वासेहेङ मेता ओपाङ हाइपालिपानु परमप्रभु परमेस्वर सरबुङसाइका हि, कालाउ वासेहेङ दन्ड प्याङ।”

⁹ “जेलाउ प्रिथिबिको राजा जाइ वाको दोफा कासिबिरि पाहि कालाउ माताइतेङ मोजमाज्जा पाहि, जेलाउ इम्बालाइ इङको बेबालहेङ ओतेङ हिलाउ धुवा ओल्लेतेङ हिका तिनावा, इम्बालाइ वाको भाअ्सिङ खारावा कालाउ जिउधाइ ल्होपाङ तुम्ता थेकावा।”

¹⁰ कालाउ इदोइ थिकाहोइ इङको जेदोङ पिडा वाको ह्रुता लोहि इङको वाको ह्रुता बुङ ल्वावा, वा दुरे हानितेङ दोअ्हि, “ओइ बारका सहर बेबिलोन! ओइ बल्लियाका सहर! नाअ् बुङ हेथे थिलि गोइका हि। परमेस्वर नासेहेङ आचानाक साजाइ पिहि।”

¹¹ प्रिथिबिको ब्यापारिगेलाइ वाको भाअ्सिङ खारावा कालाउ वाको भाअ्सिङ जिउधाइ ल्होपाङ तुम्ता थेकावा, हाइपालिपानु एला इसिका हासु बुङ मान्थु जाइ वाको पि:का आमेनेगेलाइ चोल्लि।

¹² इम्बालाइ हेन्जा खाल्को आमेनेगेलाइ पि:घाहि। जेसाङ सोना, चान्दि, रत्न कालाउ मोतिगेलाइ। जाङका सुतेसो बानाइका एस्मिको धाबा, सिन्दुर रङको धाबा कालाउ गाङगाउरा रङको धाबा बुङ हिघाहि। मालामालाका फालासो बानाइका आनेमानेगेलाइ, हारागेलाइहोइ बानाइका आनेमानेगेलाइ, कालाउ आरु आनेमानेगेलाइ जाङका फाला, कासा, चिर, सिङगमरमरसो बानाइका आरु हेन्जा आनेमागेलाइ हिघाहि।

¹³ कालाउ दालचिनि, गोताङ खाल्को मासाला, धुमाना, मुर्र, जे:का धुमाना, गोरा, चुइति, माइदा कालाउ गहम, गाइ-पिया, भेडा-मेसागेलाइ, ओह्याँगेलाइ कालाउ रथगेलाइ बुङ हिघाहि। कालाउ जेदोङ द्‍याङगेलाइ आमेनेगेलाइ चोल्घाहि कालाउ पि:घाहि एला इङको द्‍याङगेलाइहेङ बान्धाइतिको रुपता पि:लि मादोखे।

¹⁴ ब्यापारिगेलाइ वासेहेङ दोअ्तावा, “नाङको भोका गोताङ काथागेलाइ एला मान्थु। नाअ् मन्दा ताअ्का गोताङ: का मालामालाका आमानेगेलाइ, इङको गोताङ आनेमागेलाइ, जाइ नाअ् ताइको जिउहेङ कोइनाका बानाइ घाखेना, इङको गोताङ राम्हि, एला नाअ् मानिनाना।”

¹⁵ इदोइ ब्यापारिगेलाइ जाइ इङको नगरता ब्यापार पातेङ धनि जेङहि कालाउ इदोइ थिकाहोइ इङको जेदोङ पिडा वाको ह्रुता लोहि इङको वाको ह्रुता बुङ ल्वावा, वाकोसो वा दुरे हानितेङ जाअ्हि कालाउ वा खारावा जिउधाइ ल्होपाङ तुम्ता थेकावा।

¹⁶ कालाउ इम्बालाइ दोअ्तावा, “बारका सहर बेबाल हेथे थिलि गोइका हि! जाइ एमि कोइन्हाका बेजान ताइमिहेङ कोइन्हाका सोना, रत्न कालाउ मोतिगेलाइसो सानसाइतेङ हिघाहि। वा रेस्मि धाबा, सिन्दुर रङको धाबा, कालाउ गाङगाउरा रङको बोना बोअ्घाहि।

¹⁷ आतुइसा सोमोइता वाको गोताङ सम्पति नासा हि।” गोताङ जाहाजको क्यापतनगेलाइ, गोताङ द्‍याङगेलाइ जाइ जाहाजसो पाक पाखे, नाविगेलाइ, कालाउ इङको गोताङ जाइ समुन्द्रसो ताइको जिबिका चालाइखे, कालाउ इम्बालाइ झाराङ बेबिलोन सहर खाङतेङ दुरे जाअ्हि।

¹⁸ जेलाउ इम्बालाइ सहरहेङ ओतेङ हिका मेसो धुवा तिनावा, इङको सोमोइ इम्बालाइ बारका गालाहोइ आहुतावा, “इदोइ माहान सहर भाइका आरु हिदोइ बुङ सहर मान्थु!”

¹⁹ इम्बालाइ ताइको दुख तिङपालिको भाअ्सिङ, इम्बालाइ ताइको पुरिङता धुला उतावा। इम्बालाइ खारावा कालाउ जिउधाइ ल्होपाङ तुम्ता थेकावा कालाउ बारका गालाहोइ दोअ्तावा, “बारका सहर बेबाल हेन्जा थिहि! समुन्द्रको गोताङ जाहाजको गोताङ गिह्रि इङको सहरको सम्पतिको धनि जेङहि। कालाउ एला ए घान्टा ताङ जेदोङ सहरता हिका गोताङ आमेनेगेलाइ नासा हि।

²⁰ नेलाइ झाराङ जाइ स्वर्गता हिसुखेना, परमेस्वरको गोताङ द्‍याङगेलाइ, छाल्न्हाका चात्यागेलाइ, कालाउ परमेस्वरको बक्तागेलाइ, नेलाइ बेबिलोन सहरता जेदोङ जेङहि इङको भाअ्सिङ झाराङ हेन्जा खुसि मानाइसु। हाइपालिपानु परमेस्वर बेबिलोन सहरहेङ साजाइ प्याङ जेदोङ दुस्ट काम नेलाइ दोफा पाहि।”

बाबेल सहरको गोताङ नास

²¹ कालाउ का एनोङ बल्लियाका स्वर्गदुतहेङ तिङघा, जाइ जान्ता भाइका बारका उन्ठुइ तोल्लेका हिघाहि। वा एसा दोअ्काताङ इङकोहेङ समुन्द्रता थाइगिल्हि, “एसापा दोङ बारका सहर बेबिलोन बुङ हेन्जा हिङसानाङ नासाताङ। जेदोङ सुमुन्द्रता थाइगिल्का उन्ठुइ माघुरियाङ, बेबिलोन सहर बुङ हेलाउ बुङ मातिनाङ।

²² नाअ् बेबिलोन सहर, एलासो नाङकोता उर्निको खेकाको, कालाउ ले को लेका को गाला माहिनाङ। इन्ता मुरालिको माकुनु सानाइको पोदो बुङ माहिनाङ। इन्सिकाङ, इन्ता हिदोइ बुङ रेम्का कामदार माजेनाङ। जान्ताको घुमाइका गाला बुङ आरु एला हिदिकाल बुङ माहिनाङ।

²³ नाङकोता द्‍याङगेलाइ आरोङ हेलाउ बुङ गेसाको जोल्तेङ हिका फाइसालामका मातिनाङ, इम्बालाइ आरोङ हेलाउ बुङ वाजान कालाउ बेजानको बिहु पाकाको गाला माहिनाङ। इन्ताको ब्यापारिगेलाइ गोताङ सुमिङता झाराङ खान्तेङ प्रभाबसालि हिघाहि। कालाउ इन्ताको जादुगरगेलाइ सुमिङको गोताङ द्‍याङगेलाइहेङ धोका पिहि।

²⁴ परमेस्वर बेबिलोन सहरहेङ साजाइ पिहि हाइपालिपानु वासेहेङ परमेस्वरको बक्तागेलाइहेङ, कालाउ परमेस्वरको गोताङ द्‍याङगेलाइहेङ कालाउ गोताङ सुमिङको द्‍याङगेलाइहेङ सेअ्का दुसिका हिघाहि।”