प्रकास 17 - Dhimal NT

बेबाल कालाउ इ:का रङको राक्सेस

¹ इङको न्हि लोङ जाम बात्ति ह्रुहि न्हि लोङ स्वर्गदुतगेलाइ मध्ये एमि काङकोता लोतेङ दोअ्हि, “काङकोता लौउ, का नासेहेङ तिङपाङका कि हेसा परमेस्वर उङको बारका बेस्या हि याको माने बेबिलोन सहरहेङ साजाइ प्याङ, जाइ इन्ता योम्तेङ हि जेता हेन्जा झोरागेलाइ हि।

² प्रिथिबिको राजागेलाइ वाको दोफा कासिबिरि पाहि, इङको बेबाल गोताङ द्‍याङ जातिहेङ ताइको गोराहोइ म्हापाका हिघाहि, जेदोङ दोअ्का को आर्था हि कि वा गोताङ द्‍याङगेलाइ जातिहेङ ओसारापा हेन्जा मारेम्का ब्यभार पालि धिरपाहि हाइपालिपानु वा झाराङहेङ मुर्ति पुजिलि धिरपाहि।”

³ पबित्तरो आत्माको साघाइहोइ, स्वर्गदुत कासेहेङ चाका-मान्दा थामेता चुम्पुहि। का इन्ता एमि बेलाहेङ इ:का रङको राक्सेस ह्रुता योम्तेङ हिका तिङघा। राक्सेसको न्हि लोङ पुरिङ कालाउ तेलोङ दाङ हिघाहि। वाको जिउता परमेस्वर बिरोधको मिङगेलाइहोइ लेखेका हिघाहि।

⁴ उङको बेबाल गाङगाउरा कालाउ इ:का रङगको धाबा लोखोन बोअ्का हिघाहि। वा ताइको जिउहेङ सोनाको गाहानागेलाइ, उन्ठुइगेलाइ, कालाउ जाङका मोतिगेलाइहोइ साजाइतेङ हिघाहि। वाको दाम्पाहा खुरता वा सोनाको लोटा चाअ्का हिघाहि, जेदोङ गोराहोइ पोङघाका हिघाहि। इदोइ गोरा सिकाका वाको काम कालाउ सिद्रिका कुसुमि ब्यभारहोइ तिङपाखे।

⁵ वाको कापालता, म्होन्हाका को आर्था ताअ्का एनोङ मिङ इसिका लेखेका हिघाहि, “का माहान सहर बेबिलोन हिघा। का गोताङ वेस्यागेलाइको आमाइ हिघा कालाउ सुमिङता हिका गोताङ द्‍याङगेलाइहेङ का सिद्रिका कामगेलाइ पापाका।”

⁶ कालाउ का तिङघा कि उङको बेबाल परमेस्वरको द्‍याङगेलाइको हितिहोइ म्हाका हिघाहि। इदोइ द्‍याङ येसुहेङ खाङधुरिसोङ पिताइकानाङ सेअ्न्हाका हिघाहि। इङको बेबालहेङ तिङतेङ का ओसारापाङ भाङभाङघा।

⁷ इङको सोमोइ, इङको स्वर्गदुत कासेहेङ दोअ्हि, “माभाङभाङसु! का नासेहेङ उङको बेबालको कालाउ इङको राक्सेसको जाइको न्हि लोङ पुरिङ कालाउ तेलोङ दाङ हिघाहि, वाको म्होनाका आर्था बाताइयाङका। इङको बेबाल राक्सेसको ह्रुता योम्तेङ हिघाहि।

⁸ नाअ् भरखङ तिङका इङको राक्सेस ए सोमोइ बान्चिका हिघाहि, कालाउ एला बान्चिका मान्थु; या वाङखाराका खारासो बाहार लोलि तोम्का हि कालाउ परमेस्वर इङकोहेङ पुरा नासा पाङ। प्रिथिबिता हिका द्‍याङगेलाइको मिङ जाइको परमेस्वर सुमिङहेङ सिरजाइका खान्तेङ लाम्फा जिबनको कितापता लेखेका मान्थुघाहि, इदोइ झाराङ द्‍याङ, राक्सेसहेङ तिङतेङ भाङभाङका जेनावा। वा लाम्फा सिन्हुका हिघाहि कालाउ एला सिन्हुका मान्थु, कालाउ वा आरोङ ल्वाङ।

⁹ इदोइ बुझिलिको भाअ्सिङ बुद्दिको आस्यकता हि। जाइ दोफा बुद्दि हि, वा इदोइ आर्थाहेङ बुझियावा। राक्सेसको न्हि लोङ पुरिङ न्हि लोङ रागेलाइहेङ तिङपाखे, जाइ इङको बेलाल इङको सहरता सासन पाखे। इदोइ न्हिमि राजागेलाइहेङ बुङ तिङपाखे।

¹⁰ इङको न्हिमि राजागेलाइ मध्ये, नामि राजा लाम्फा दोङ सिलि दोहोइ। उङको मध्येसो एमि तुतेङ सासक हि एला वा सासन पादोङखे। आम्तिम राजा एला बुङ लोका मान्थु। कालाउ जेलाउ वा ल्वाङ, वा आतुइसा सोमोइको भाअ्सिङ खिनिङ सासन पावा।

¹¹ इङको राक्सेस जाइ हेन्जा लाम्फा सिन्हुका हिघाहि कालाउ एला वा सिन्हुका मान्थु, वा दोङ येएतेङ राजा हि। कालाउ उङको येएतेङ राजा लाङतिको न्हिमि राजा मध्ये एमि हि। कालाउ आन्ताको सोमोइता उङको राजाहेङ पाक्का दोङ जेलाउलाउको भाअ्सिङ साजाइ मिलियाङ।

¹² नाअ् लाम्फा तिङन्हा, इङको तेलोङ दाङ, इङको तेमि राजागेलाइहेङ तिङपाखे जाइ एला सासन पालि तेङका मान्थु। उङको तेमि राजागेलाइहेङ राक्सेस दोफा मिलितेङ सासन पालि खाबारा मिलिहि, कालाउ इम्बालाइको सासन आतुइसा सोमोइको भाअ्सिङ खिनिङ जेनाङ।

¹³ इदोइ गोताङ तेमि राजागेलाइको एनोङ दोङ उदेस्य हि, कालाउ इम्बालाइ ताइको सरबुङ कालाउ खाबारा राक्सेसहेङ प्यावा।

¹⁴ इम्बालाइ थुमाको बिरोधता धुम पावा, कालाउ थुमा ओबालाइहेङ हारिपावा, हाइपालिपानु थुमा प्रभुगेलाइको प्रभु कालाउ राजागेलाइको राजा हि। ताइको काइका, साल्का, कालाउ खाङधुरि योग्य द्‍याङगेलाइ दोफा इम्बालाइहेङ हारिपावा।”

¹⁵ इङको स्वर्गदुत कासेहेङ एसा बुङ दोअ्हि, “नाअ् लाम्फा तिङका हिना हेन्जा झोरागेलाइ जेदोङ ह्रुता इङको बेबाल योम्तेङ हिघाखे, वा सुमिङको गोताङ द्‍याङगेलाइ, गोताङ कुल, गोताङ रास्ट, कालाउ गोताङ भासाको द्‍याङ हि।

¹⁶ इङको सोमोइ ल्वाङ, जेलाउ राक्सेस कालाउ वाको दोफा सासन पाका तेमि राजागेलाइ वेस्याहेङ सिकातावा, जाइ राक्सेसको ह्रुता योम्का हि। इम्बालाइ वासेहेङ झाअ्मिरियावा, नाङघाङ बानाइयावा, वाको जिउको बिहा चाअ्वा, कालाउ बाकि हिका भाग ओपावा।

^17-18 उङको बेबाल जाइहेङ नाअ् तिङन्हा, इदोइ माहान सहर हि जेदोङ प्रिथिबिको गोताङ राजागेलाइ ह्रुता सासन पाखे। इदोइ गोताङ इङको बेबाल दोफा जेङहि हाइपालिपानु परमेस्वर ताइको उदेस्यगेलाइ पुरा पालिको भाअ्सिङ द्‍याङगेलाइको मनहेङ चालाइहि। इदोङ कारनहोइ, जेलाउ थेकापा परमेस्वरको दोअ्का काथा पुरा माजेङपा भरि। इम्बालाइ राक्सेसहेङ सासन पालिको भाअ्सिङ ताइको खाबारा पिहि।”