प्रकास 16 - Dhimal NT

परमेस्वरको क्रोड न्हि लोङ बात्तिगेलाइ

¹ कालाउ न्हुसो, का मुन्दिरसो एनोङ बारका गाला हिङघा, जाइ इङको न्हि लोङ स्वर्गदुतगेलाइ दोअ्हि, “हाने कालाउ प्रिथिबिता हिका द्‍याङगेलाइ ह्रुता परमेस्वरसो इङको साजाइ हुपिसु जेदोङ न्हि लोङ जाम बातिता हि।”

² ओदोङ भाअ्सिङ, लाङति स्वर्गदुत वाको जाम बातिता साजाइ हिघाहि, इङको प्रिथिबि ह्रुता हुपिहि। कालाउ जाइ ह्रुता राक्सेसको चिन्हा हिघाहि, कालाउ जाइ वाको मुर्तिहेङ पुजिका हिघाहि, इम्बालाइ झाराङहेङ थिलि गोइका ओसारापा गेने-गेनेका पेचारागेलाइ निङहि जेदोङहोइ हेन्जा पिडा जेङघाहि।

³ न्हेतेङ स्वर्गदुत वाको जाम बातिता साजाइ हिघाहि, इङको समुन्द्र ह्रुता हुपिहि। एन्सालाउ दोङ समुन्द्रता सिका द्‍याङको हिति भाइकाङ जेङहि कालाउ ओदोङ भाअ्सिङ, समुन्द्रता हिका गोताङ थोकगेलाइ सिहि।

⁴ सुमतेङ स्वर्गदुत वाको जाम बातिता साजाइ हिघाहि, इङको झोराको झारनागेलाइको समुन्द्र ह्रुता हुपिहि, कालाउ गोताङ चि हिति जेङहि।

⁵ कालाउ इङको स्वर्गदुत जाइ दोफा गोताङ चि ह्रुता खाबारा हि, परमेस्वरसो इसिका दोअ्का हिङघा, “हे पबित्तरो परमेस्वर, जाइ सुरुको सोमोइसोङ एला थेकापा कालाउ जेलाउलाउको भाअ्सिङ परिबतन माजेनाङ, जेदोङ साजाइ नाअ् पिन्हा इङको सहि हि।

⁶ हाइपालिपानु इम्बालाइ नाङको द्‍याङगेलाइहेङ कालाउ बक्तागेलाइहेङ सेअ्का हिघाहि, कालाउ इम्बालाइको हिति होपाका हिघाहि, ओदोङ भाअ्सिङ, एला नेलाइ ओबालाइहेङ हिति आम्लि प्याना। कालाउ या वाको भाअ्सिङ सहि इनाम हि।”

⁷ आरोङ का हासु बुङ स्वर्गको बेदिसो नुइ धुइका हिङघा, “एइ, परमप्रभु परमेस्वर सरबुङसाइका, द्‍याङ जातिता नाङको साजाइ सत्ये कालाउ न्याय पुर्न हि।”

⁸ द्‍यातेङ स्वर्गदुत वाको जाम बातिता जेदोङ साजाइ हिघाहि वासेहेङ सान्हे ह्रुता हुपिहि, कालाउ सान्हेहेङ सरबुङ पिहि कि ताइको धाङकाहोइ द्‍यायाङगेलाइ ओअ्पाको।

⁹ द्‍याङगेलाइ ओअ्का को कारनसो, इम्बालाइ परमेस्वरहेङ साराप पिहि। हाइपालिपानु परमेस्वर दोफा खिनिङ इसिका साजाइ चुमाका खाबारा हिघाहि। कालाउ बुङ इम्बालाइ पाप पालि लाअ्तेङ परमेस्वर भारि माघुरिहि। कालाउ इम्बालाइ परमेस्वरको महिमाहेङ बुङ सुइकार मापाहि।

¹⁰ नातेङ स्वर्गदुत वाको जाम बातिता जेदोङ साजाइ हिघाहि वा राक्सेसको सिङहासनको ह्रुता हुपिहि। कालाउ इङको को कारान, वाको गोताङ राइजि कितिकितिहि। कालाउ द्‍याङगेलाइ मारेम्फाङ तुकाको कारन ताइको देतोङ चिहि।

¹¹ तुकाको कालाउ पेचाराको कारन, इम्बालाइ स्वर्गता हिका परमेस्वरहेङ साराप पिहि। कालाउ एला इम्बालाइको आबास्था इन्सिका जेङलाउ बुङ, इम्बालाइ पाप पालि लाअ्तेङ परमेस्वर भारि माघुरिहि। कालाउ इम्बालाइ दुस्ट काम पालि बुङ मालाअ्हि।

¹² तुतेङ स्वर्गदुत वाको जाम बातिता जेदोङ साजाइ हिघाहि माहान युफ्रितिस झोराता हुपिहि। वाको कारन झोराको चि सि:हि कालाउ इदोइ कारनहोइ, नुहेको राजागेलाइ ताइको सेना दोफा इङको झोराहेङ पाराहि।

¹³ कालाउ न्हुसो, का सुमलोङ भुत-आत्मा तिङघा जाइ चोम्फेगेलाइ भाइपा तिङघाखे। लाङति बारका आजिङगरको नुइसो बाहार ओल्लेहि, न्हेतेङ लाङति राक्सेसको नुइसो बाहार लोहि, कालाउ सुमतेङ राक्सेसको नुइसो बाहार लोहि, जाइ धाताइका आगमबानि पिघाहि।

¹⁴ इदोइ भुत-आत्मा दोफा आचाम्माका काम पाका सरबुङ हिघाहि। कालाउ इदोइ सुमिङको गोताङ सारभिगेलाइता सासन पाकालाइहेङ जोम्पाहि कालाउकि, परमेस्वर सरबुङसाइकाको बिरोधता वाको माहान दिनाता धुम पालि द्वाको। इङको इदोइ दिना हि जेलाउ परमेस्वर ताइको सतुरुगेलाइहेङ न्याय पाङ कालाउ ताइको द्‍याङगेलाइहेङ बान्चि पावा।

^15-16 भुत-आत्मा सासन पाका द्‍याङगेलाहेङ कालाउ इम्बालाइको सेनागेलाइहेङ ए थामेता जोम्पाहि। इङको थामेको मिङ हिब्रु भासाता आरमागाडोन दोअ्खे। ओदोङ भाअ्सिङ, प्रभु येसु दोअ्हि, “इदोइ काथा हिङसु, काङको लोलि खाङका एमि चोर लोका भाइपाङ आचानाक जेनाङ। उङको द्‍याङ धन्य हि जाइ काङको लोका बेलाता नाङघातेङ हिखे, कालाउ वाको धाबा लोखोनगेलाइ तियार पाखे। कालाउ इम्बालाइ नाङघाङ माज्याङ कालाउ जेसापा वाको हेन्जा द्‍याङगेलाइको माझाता बाहार हानिलाउ बुङ, इम्बालाइहेङ लेदेर पाका हिदोइ बुङ दोङ काथा माजेनाङ।”

¹⁷ न्हितेङ स्वर्गदुत ताइको जाम बातिता जेदोङ साजाइ हिघाहि वासेहेङ भेरमाता हुहि। कालाउ स्वर्गता हिका मुन्दिरको लितासो परमेस्वरको सिङहासनसो, का हासुको बुङ इसिका ह्रिकाइतेङ हिका हिङघा, “का गोताङ काम पुरा पाघा।”

¹⁸ इङको सोमोइता बिजुलिगेलाइ चिलकातेङ लोघाहि, कालाउ बादेलसो गड्याङ-गुडुङको गालागेलाइ ओल्लेतेङ लोघाहि, कालाउ बारका भुइचाल बुङ लोहि। इसिका बारका नासा पाका भुइचाल द्‍याङगेलाइ सुमिङको सुरुसोङ एला थेकापा हेलाउ बुङ तिङका मान्थुघाहि।

¹⁹ बेबिलोनको माहान सहर सुम टुक्राता खेङनाहि, कालाउ सुमिङ भरिको गोताङ सहरगेलाइ भाअ्पाहि। हाइपालिपानु परमेस्वर इङको बेबिलोनको द्‍याङगेलाइको साजाइको बिसोइता पाका प्रतिग्याहेङ पुरा पाहि। परमेस्वर बेबिलोनहेङ थाङका साजाइ प्याङ। परमेस्वर द्‍याङगेलाइहेङ ओसारापा हेन्जा खाका गोरा आम्पावा, जेदोङता चि मिसालाइका मान्थुवावा। इङको को मतलप परमेस्वर बिना मोनोइसो इम्बालाइ दोफा मारेम्फाङ चेर ताम्पावा।

²⁰ इङको सोमोइता, इङको समुन्द्रको गोताङ टापुगेलाइ आचानाक मोहि, कालाउ हिदोइ बुङ हेमा धेङगारागेलाइ मान्थुघाहि।

²¹ बारका झोसेगेलाइ आकाससो द्‍याङगेलाइ ह्रुता हुल्हि। गोताङ झोसे माकुलाउ बुङ न्हे कुरि ते सेर ल्हिका हिघाहि। इदोइ कारन, इम्बालाइ परमेस्वरहेङ साराप पिहि हाइपालिपानु द्‍याङगेलाइ परमेस्वरको पिगिल्का हेथे थिलि गोइका बिपतिको कारन इम्बालाइ ओसारापाङ कस्ट भोगितेङ हिघाहि।