प्रकास 14 - Dhimal NT

थुमा कालाउ वाको भक्ति पाकालाइ

¹ कालाउ न्हुसो का आरोङ स्वर्गदुतहेङ थुमाको सियोनको तिकारता जाअ्तेङ हिका तिङघा। वाको दोफाङ वाको ए लाख न्हे कुरि द्‍या हाजार द्‍याङगेलाइ हिघाहि। इम्बालाइको कापालता थुमाको कालाउ वाको आबाको मिङ लेखेका हिघाहि।

² कालाउ का स्वर्गता हासुको बुङ गाला हिङघा। इङको गाला चिको हेन्जा झारनाको तिराराइका गाला भाइका हिघाखे। माकुनु इङको गर्जनको बार्का गाला भाइका हिघाहि। जेदोङ का गाला हिङघा इङको सङगितकारगेलाइसो उर्नि धुइपाका पोदोको गाला भाइका हिघाहि।

³ ए लाख न्हे कुरि द्‍या हाजार द्‍याङगेलाइ सिङहासनको आगाता, द्‍यालोङ हुसि हिका प्रानिगेलाइको आगाता, कालाउ आगुवागेलाइको आगाता जाअ्हि। इम्बालाइ नावा ले लेघाहि जाइ वा खिनिङ ले धिरलि दोघाहि। प्रिथिबिता हिका द्‍याङगेलाइ मध्येसो, इम्बालाइहेङ खिनिङ परमेस्वर लाअ्पाहि।

⁴ इम्बालाइको जिबन पबित्तरो हि। वा वाबालाइ भाइपा जाइ हेलाउ बुङ कासिबिरि पाका मान्थु, एन्साङ दोङ ओबालाइ हासुको बुङ हेलाउ बुङ आराधाना मापाहि, इम्बालाइ थुमाको खिनिङ आराधाना पाखे। जेता थुमा हानिखे, इम्बालाइ बुङ वाको दोफा हानिखे। इम्बालाइ एबालाइ दोङ हि जाइहेङ प्रिथिबिको गोताङ द्‍याङगेलाइको माझासो लाअ्पाहि। जेसाङ द्‍याङगेलाइ ताइको मिलिङसो लाङ फल परमेस्वरता पिखे, एन्साङ दोङ एबालाइ बुङ परमेस्वरको कालाउ थुमाहेङ लाङ भेतिको रुपता चाढाइका हि।

⁵ इम्बालाइ हेलाउ बुङ माधाताइहि कालाउ इम्बालाइ दुसिन्हाका मान्थु।

सुमि स्वर्गदुतगेलाइ

⁶ कालाउ का भेनेङ स्वर्गदुतहेङ बुङ आकास ह्रुता उराइतेङ हिका तिङघा। इङको स्वर्गदुत गोताङ कुल, भासा, रास्ट, कालाउ जाति-जातिको गोताङ द्‍याङगेलाइहेङ सुसमाचार चुम्तेङ हिङपालि हानिघाहि। इदोइ सुसमाचार जेलाउलाउको भाअ्सिङ माबदलियाङ।

⁷ वा ह्रिकाइतेङ दोअ्हि, “परमेस्वरहेङ थिसु कालाउ वासेहेङ महिमा पिसु, हाइपालिपानु एला वाको सोमोइ हि कि वा द्‍याङगेलाइको न्याय पाको। वाको आराधाना पासु हाइपालिपानु वा दोङ स्वर्ग, प्रिथिबि, समुन्द्र कालाउ चिको झारनागेलाइ बानाइहि।”

⁸ इन्ता भेनेङ स्वर्गदुत बुङ हिघाहि जाइ लाङति स्वर्गदुतहेङ पिताइतेङ दोअ्हि, “एला या नासा हि। बेबिलोन सहर हेन्जा नासा हि। इङको बेबाल गोताङ द्‍याङ जातिहेङ ताइको गोराहोइ म्हापाका हिघाहि, जेदोङ दोअ्का को आर्था हि कि, वा गोताङ द्‍याङ जातिगेलाइहेङ ओसारापा हेन्जा मारेम्का ब्यभार धिरपाहि हाइपालिपानु वा झाराङहेङ मुर्ति पुजिलि धिरपाहि।”

^9-10 कालाउ सुम्तेङ स्वर्गदुत बाकि न्हेमि स्वर्गदुतहेङ पिताइहि। वा आहुतेङ दोअ्हि, “उङको द्‍याङगेलाइ जाइ इङको राक्सेस कालाउ इङको को मुर्तिहेङ पुजिखे, कालाउ इम्बालाइ जाइ इङको राक्सेसको चिन्हा ताइको कापालता माकुनु खुरगेलाइता दागाइखे, परमेस्वर उङको द्‍याङगेलाइहेङ ओसारापा खाका गोरा आम्पावा, जेदोङ चि मामिसालाइका ह्यावा। इङको को मतलप परमेस्वर बिना मोनोइसो इम्बालाइ दोफा मारेम्फाङ चेर ताम्पाहि। उङको द्‍याङगेलाइहेङ मे, कालाउ आङग्रोगेलाइता साताइयाङ। जेलाउ परमेस्वर इङको द्‍याङगेलाइहेङ साजाइ प्यावा, कालाउ पबित्तरो स्वर्गदुत थुमा दोफा इम्बालाइहेङ तिनावा।

¹¹ ओबालाइहेङ साताइका मेको धुवा जेलाउलाउको बुङ भाअ्सिङ आकास ह्रुता हानेखे। नितिम न्हिसिन ओबालाइहेङ साताइन्हाका मारोकियाङ, हाइपालिपानु ओबालाइ राक्सेस कालाउ इङको को मुर्तिहेङ पुजिका हिघाहि कालाउ ओबालाइ वाको मिङको छाप ताइको ह्रुता लागाइहि।”

¹² ओदोङ भाअ्सिङ इदोइ बुझिलि जरुरि हि कि परमेस्वरको द्‍याङगेलाइ गोताङ कस्टगेलाइ बुङ सहिलि गोइखे। ओबालाइ परमेस्वरको आग्यागेलाइ केमावा कालाउ येसुता खाङधुरि पालि मालातावा।

¹³ आरोङ का हासु बुङ स्वर्गसो काङको दोफा नुइ धुइतेङ हिका हिङघा। वा दोअ्हि, “इदोइ काथागेलाइ इता लेखे। एलासो इङको द्‍याङगेलाइ धन्यको हि जाइ प्रभुता खाङधुरि पातेङसाङ सिखे।” कालाउ पबित्तरो आत्मा बुङ दोअ्हि कि, “इदोइ काथा सत्ये हि। इङको द्‍याङगेलाइ धन्यको हि हाइपालिपानु इम्बालाइ ताइको परिस्रोमसो माइसा चावा कालाउ जेदोङ काम पाहि इङको को भाअ्सिङ इनाम निनावा।”

प्रिथिबिको बालि चेका सोमोइ

¹⁴ कालाउ का एनोङ जे:का रङको बादेल तिङघा कालाउ बादेलको ह्रुता हासु बुङ योम्तेङ हिघाहि। इङको द्‍याङ भाइका तिङघाखे। वाको पुरिङता सोनाको मुकुट हिघाहि कालाउ वाको खुरता एनोङ चु:का धार हिका काचिया हिघाहि।

¹⁵ ठिक एन्सालाउ दोङ, एमि भेनेङ स्वर्गदुत स्वर्गको मुन्दिरसो परमेस्वरको सन्‍देस चुम्तेङ बाहार लोहि। वा द्‍यातेङ स्वर्गदुत हि। वा बादेल ह्रुता योम्तेङ हिका द्‍याङसो आहुतेङ दोअ्हि, “प्रिथिबिता बालि मिङलि दोहोइ। बालि चेका सोमोइ लोहोइ। ओदोङ भाअ्सिङ एला ताइको काचियासो बालि चेसु।”

¹⁶ ओदोङ भाअ्सिङ बादेल ह्रुता योम्तेङ हिका द्‍याङ प्रिथिबि ह्रुता ताइको काचियाहोइ चेहि, कालाउ वा सारा सुमिङता बालि चेहि।

¹⁷ कालाउ न्हुसो, जाइ स्वर्गता हिखे एमि भेनेङ स्वर्गदुत स्वर्गको मुन्दिरसो बाहार लोहि। इदोइ नातेङ स्वर्गदुत हि। वाको दोफा बुङ एनोङ चु:का धार काचिया हिघाहि।

¹⁸ ठिक एन्सालाउ दोङ भेनेङ स्वर्गदुत जेदोङ तुतेङ स्वर्गदुत हि, जाइ स्वर्गको बेदि ह्रुता मेहोइ धुमाना जोलाइखे, वा इन्ता बाहार लोहि। वा चु:का धार हिका स्वर्गदुत दोफा आहुतेङ दोअ्हि, “प्रिथिबिता आङगुरको झुप्पा लाम्फाङ मिङलि दोहोइ! ताइको काचियाहोइ चे।”

^19-20 कालाउ स्वर्गदुत सारा आङगुरगेलाइ पेतेङ रुम्भाइहि जेदोङ प्रिथिबिता हिघाहि। कालाउ आङगुरगेलाइहेङ ए थामे रुम्भाइहि कालाउकि आङगुरहेङ थिचाइतेङ कालाउ रस ओल्लापालि द्वाको। याको मतलब हि कि परमेस्वर थाङका साजाइ प्याङ। आङगुरगेलाइहेङ सहरको बाहार थिचाइयाङ। जेता आङगुरगेलाइहेङ थिचाइहि, इन्तासो जेदोङ हिति होतेङ हिघाहि, इङको एनोङ वाङखाराका धाराता हानितेङ झोहि। इङको इदोइ झोको वाङखारा हिघाहि कि इङको ओह्याँको लागाम थेकापा थुकाहि कालाउ सुमसाइ किलो मिटर फारापा होहि।