प्रकास 11 - Dhimal NT

न्हेनोङ साक्सिगेलाइ

¹ कालाउ कासेहेङ दोङलिको भाअ्सिङ एनोङ लागासि पिहि कालाउ परमेस्वर कासेहेङ आग्या पिहि, “दोङ कालाउ काङको मुन्दिर, स्वर्गको बेदि दोङ कालाउ जाइ इन्ता काङको आराधाना पाखे इम्बालाइहेङ गान्दे।

² कालाउ मुन्दिरको बाहारको सालेङ मादोङसु, हाइपालिपानु इङको थामे इङको द्‍याङगेलाइहेङ पिहि जाइ कासेहेङ खाङधुरि मापाखे। कालाउ इम्बालाइ काङको पबित्तरो सहर यरुसेलेमहेङ न्हे कुरि न्हे माइना थेकापा राज्य पावा।

³ इङको बेला, का काङको न्हेमि वाबाल दिङगिल्याङका जाइ काङको सत्ये सन्‍देस घोसाना पावा। कालाउ इम्बालाइ दा:का रङको धुसा होनावा कालाउ इङको ए-हाजार न्हे साइ सुम कुरि दिना थेकापा इङको द्‍याङ काङको सन्‍देस घोसाना पावा।”

⁴ इदोइ न्हेनोङ साक्सिगेलाइ न्हेनोङ जैतुनको सिङगेलाइ कालाउ न्हेनोङ चेरादानिगेलाइ दोफा तुलाना पाका हि जाइ परमेस्वरको आगाता जाअ्का हि। कालाउ परमेस्वर गोताङ सुमिङको प्रभु हि।

⁵ जेसापा हासु बुङ इङको न्हेनोङ साक्सिगेलाइहेङ हान्ति पालि भोखे पानु, कालाउ वाको नुइसो मे ओल्लेयावा कालाउ इम्बालाइको सतुरुगेलाइहेङ नासा पावा। कालाउ इदोइ तरिकाहोइ जाइ हासु बुङ इम्बालाइहेङ हान्ति पालि कोसिस पावा, कालाउ इम्बालाइहेङ बुङ सेअ्तावा।

⁶ जेलाउ इम्बालाइ परमेस्वरको सन्‍देस घोसाना पाका सोमोइता, जेसापा वाइ लोनु इङको वाइ लोलिसो रोकिलि परमेस्वर ओबालाइहेङ खाबारा पिहि। ओबालाइहेङ इदोइ चिजको बुङ खाबारा हि चिहेङ हिति भाइपा इ:का बानाइलि द्वावा, कालाउ प्रिथिबिता गोताङ खाल्को भायानक माहामारिगेलाइ चुमालि द्वावा। ओबालाइ इदोइ काम जेलाउ बुङ पालि द्वावा।

⁷ न्हेनोङ साक्सिगेलाइ परमेस्वरको सन्‍देस प्राचार पालि दोपालि दोतेङ, कालाउ राक्सेस जाइ वाङखाराका खारासो बाहार ओल्लेतेङ लावा, वा इङको इदोइ न्हेनोङ साक्सिगेलाइ दोफा धुम पावा। राक्सेस वासेहेङ हारिपावा कालाउ इम्बालाइहेङ सेअ्तावा।

⁸ इङको न्हेनोङ साक्सिगेलाइहेङ सेअ्लि दोतेङ, इम्बालाइको लासगेलाइ बारका सहर यरुसेलेमको सडकता एन्साङ लाअ्प्याङ, जेता इम्बालाइको प्रभुहेङ क्रुस्टता तोइका हिघाहि। साङकेतिक भासाता इङको सहर सोदोम माकुनु मिस्रो सारभि जेङलि द्वाङ। हाइपालिपानु इङको सहरता हिका द्‍याङ सोदोम सहर माकुनु इजिप्टता हिका भाइपा हेन्जा दुस्ट द्‍याङ हि।

⁹ सुम दिना आधा-दिना थेकापा उङको न्हेमि साक्सिगेलाइको लासगेलाइहेङ सुमिङको गोताङ कुल, भासा, रास्ट कालाउ जाति-जातिको झाराङ द्‍याङगेलाइ तिनावा। कालाउ इम्बालाइ हासुहेङ बुङ इङको लासगेलाइ लिअ्लि मापियाङ।

¹⁰ इङको न्हेमि साक्सिको सिकाको कारन, सुमिङता हिका द्‍याङगेलाइ खुसि जेनावा। कालाउ इम्बालाइ भोज पावा कालाउ एमिसो भेनेङहेङ उपाहार प्यावा, हाइपालिपानु इङको न्हेमि परमेस्वरको आगमबक्तागेलाइहेङ जाइ इम्बालाइहेङ लागातार याताना पिहि, एला इम्बालाइ सिका हि।

¹¹ सुम दिना आधा दिनाता न्हुसो, परमेस्वर पाहासो जिबन पिका हुसि इम्बालाइता लोहि, कालाउ इम्बालाइ सिन्हुतेङ ल्होहि। कालाउ झाराङ द्‍याङगेलाइ इङको न्हेमि साक्सिगेलाइहेङ आरोङ सिन्हुका तिङहि, कालाउ इम्बालाइ थिहि।

¹² कालाउ न्हुसो, उङको न्हेमि साक्सिगेलाइ स्वर्गसो हासुको बुङ बार्का गालाहोइ वाको दोफा काथा पाकाताङ पाका हिङघा। वा दोअ्हि, “इसो ह्रुता लोङ!” कालाउ इम्बालाइको गोताङ दुस्मनगेलाइ खाङकाताङ-खाङकाताङ, इम्बालाइ स्वर्ग ह्रुता हानिहि। इम्बालाइहेङ बादेल थुम्हि।

¹³ एन्सालाउ दोङ एनोङ बार्का भुइचाल यरुसेलेम सहरता हानिहि, सहरको साअ् तेतेङ भाग भाअ्पाहि। इदोइ भुइचाल को कारान, न्हि-हाजार द्‍याङगेलाइ सेन्हाहि। बाकि हिका द्‍याङगेलाइ थिहि, ओदोङ भाअ्सिङ इङको स्वर्गता हिका परमेस्वरको महिमा पालि तेङहि।

¹⁴ न्हेतेङ बिपतिगेलाइ दोहोइ, आरोङ सुमतेङ बिपतिगेलाइ धेमाङ लोलि तोम्का हि, आझाइ इन्ता एनोङ हि जेदोङ धेमाङ लोदोङखे।

न्हि लोङ सानाइ

¹⁵ जेलाउ न्हितेङ स्वर्गदुत ताइको सानाइ म्होहि, का स्वर्गता बा-बारका गालाहोइ एसा ह्रिकाइतेङ हिका हिङघा, “सुमिङको सासन पाका एला हासु बुङ मान्थु। खिनिङ केलाइको प्रभु परमेस्वर कालाउ वाको चुनिका ख्रिस्ट। कालाउ परमेस्वर जेलाउलाउ बुङ सासन पावा।”

¹⁶ कालाउ परमेस्वरको आगाता ता-ताइको सिङहासनता हिका उङको ए कुरि द्‍यामि आगुवागेलाइ, तुघुरतेङ परमेस्वरको आराधाना पाहि।

¹⁷ इम्बालाइ दोअ्हि, “हे परमेस्वर, सरबुङसाइका परमप्रभु, नाअ् इसिका परमेस्वर हिना, जाइ सुरुको सोमोइसोङ, एला थेकापा कालाउ जेलाउलाउको भाअ्सिङ परिबतन माजेनाना केलाइ नासेहेङ जातिङकोङ धन्यबाद पिन्हाखे, हाइपालिपानु नाअ् एला ताइको माहान सरबुङ तिङपाका हिना, कालाउ एला नाअ् प्रिथिबिता ताइको सासन सुरु पान्हा।

¹⁸ जेदोङ द्‍यायाङगेलाइ नासेहेङ खाङधुरि मापाखे, इम्बालाइ हेन्जा चेर ताम्पाका हि, हाइपालिपानु एला नाङको चेर इम्बालाइता ह्रुता लोका सोमोइ लोका हि, कालाउ नाअ् सिका द्‍यायाङगेलाइको न्याय पाका सोमोइ लोलि दोका हि। एला या सोमोइ बुङ हि जेलाउ नाअ् परमेस्वरको बक्तागेलाइहेङ जाइ नाङको सेवा पाखे नाअ् वासेहेङ पुरुस्कार प्याना, कालाउ नाङको झाराङ द्‍याङगेलाइहेङ जाइ नासेहेङ थिखे। कालाउ जेदोङ द्‍याङगेलाइ जाइ हुइका हि कालाउ जाइ बल्लियाका हि। ओदोङ सोमोइ नाअ् झाराङहेङ नासापाना जाइ सुमिङहेङ हान्ति चुमाखे।”

¹⁹ कालाउ स्वर्गता परमेस्वरको मुन्दिर हेअ्हि जेदोङ स्वर्गता हि, कालाउ मुन्दिर लिता कारारको सन्दुक तिङचाहि। इङको सोमोइ इन्तासो बिजुलिगेलाइ चिलकातेङ लोघाहि, कालाउ बादेलसो गड्याङ-गुडुङको गालागेलाइ ओल्लेतेङ लोघाहि, कालाउ भुइचाल बुङ लोहि। कालाउ बारका वाइ दोफाङ बारका उन्ठुइ भाइका झोसे बुङ हुल्हि।