प्रकास 10 - Dhimal NT

स्वर्गदुत कालाउ म्हुइका किताप

¹ कालाउ न्हुसो का एमि बल्लियाका स्वर्गदुतहेङ स्वर्गसो लेता खुतेङ लोका का तिङघा। बादेल वाको कोरपाहाङ हिघाहि कालाउ धेङगुर वाको पुरिङको कोरपाहाङ हिघाहि। वाको ह्राइ सान्हे भाइपा चिल्कातेङ हिघाहि कालाउ वाको खोकोइ मेको खाम्बागेलाइ भाइका हिघाहि।

² वाको दाम्पाहा खोकोइ समुन्द्रता हिघाहि, कालाउ वाको केपाहाको खोकोइ काम्भेता हिघाहि। कालाउ वाको खुरता एनोङ खोलेका म्हुइका किताप हिघाहि।

³ उङको स्वर्गदुत बारका गालाहोइ ह्रिकाइहि कालाउ वाको गाला खुहाँको गर्जनको गाला भाइका हिघाहि। जेलाउ वा ह्रिकाइहि, कालाउ न्हि लोङ बारका गालासो वासेहेङ जोबाफ पिहि, जेदोङ इङको गर्जनको गाला भाइका हिघाहि।

⁴ जेलाउ इङको न्हि लोङ गर्जनगेलाइ ता-ताइको गाला ओल्लेपाहि, जेदोङ हिङघा इङको लेखेलि का तियार हिघाखा। ओदोङ बेला का स्वर्गसो एनोङ गाला हिङघा। इङको गाला कासेहेङ दोअ्हि, “न्हि लोङ गर्जनगेलाइ जेदोङ काथागेलाइ दोअ्हि इङको म्होतेङ ताअ्, इङकोहेङ मालेखे।”

⁵ कालाउ जेदोङ स्वर्गदुतहेङ समुन्द्र कालाउ काम्भेता खोकोइ ताअ्का का तिङघा, वा ताइको दाम्पाहा खुर स्वर्ग भारि तोल्लेहि जेदोङ केरा ह्रुलिको भाअ्सिङ हिघाहि।

⁶ स्वर्गदुत इङको मिङको केरा चाहि जाइ जेलाउलाउ बुङ सिन्हुका हितेङ हिखे, वा दोङ स्वर्ग, प्रिथिबि, समुन्द्र कालाउ इन्ता हिका गोताङ आमेनेगेलाइ सिरजाइहि। स्वर्गदुत दोअ्हि, “हिदोइ बुङ काथाको भाअ्सिङ आरु ह्रुम्लि आवास्यक मान्थु। गोताङ आमेने एला पुरा जेनाङ।”

⁷ एला धिला माजेनाङ। जेसाङ दोङ न्हितेङ स्वर्गदुत ताइको सानाइ म्होतावा कालाउ परमेस्वर एन्सालाउ दोङ ताइको काम पावा। वाको म्होन्हाका योजाना बुङ पुरा जेनावा, जाइ वा ताइकोङ बक्तागेलाइहेङ दोअ्का हिघाहि जाइ वाको सेवा पाखे।

⁸ कालाउ का इङको गाला आरोङ हिङघा जाइ का दोफा स्वर्गसो नुइ धुइका हिघाहि। ओदोङ गालाहोइ कासेहेङ दोअ्हि, “हाने, कालाउ खोलेका म्हुइका किताप ह्रु जाइ उङको स्वर्गदुतको खुरता हि जाइ समुन्द्र कालाउ काम्भेता जाअ्खे।”

^9-10 जेलाउ का वाकोता हानिघा कालाउ का वासेहेङ म्हुइका किताप पिलिको भाअ्सिङ हिअ्घा। कालाउ वा कासेहेङ दोअ्हि, “इङको ह्रु कालाउ चाअ्; इङको को स्वाद मह भाइकाङ ताअ्का हि, कालाउ न्हुसो नाङको हामु खाकाको कारानहोइ तुकावा।” ओदोङ भाअ्सिङ का इङको म्हुइका किताप ह्रुतेङ चाअ्घा, जेदोङ स्वर्गदुत चाअ्का हिघाहि। इङको सत्ये हिघाहि कि इङको को स्वाद मह भाइकाङ ताअ्का हिघाहि, कालाउ जेलाउ का इङकोहेङ निघा, कालाउ खाकाको कारानहोइ काङको हामु तुलि तेङहि।

¹¹ कालाउ कासेहेङ या दोअ्हि, “जेदोङ काथा परमेस्वर नासेहेङ धुइलिको भाअ्सिङ पिहि, इङको काथा आरोङ गोताङ जाति कालाउ गोताङ सारभिको द्‍याङगेलाइहेङ, भेनेङ-भेनेङ भासा धुइका द्‍याङगेलाइहेङ कालाउ गोताङ राजागेलाइहेङ दोअ्सु।”