मर्कुस 5 - Dhimal NTभुत-आत्मा धेल्का द्याङ ( मति 8:28-34 ; लुक 8:26-39 ) 1 येसु कालाउ वाको चात्यागेलाइ समुन्द्रको ओदोइ पार गेरासनगेलाइको मुलुकता हानिहि। 2 कालाउ येसु नाउसो खुअ्हि, कालाउ एन्सालाउ दोङ एमि द्याङ जाइ दोफा भुत-आत्मा धेल्का हिघाहि। वा तोम भारिसो ओल्लेतेङ वासेहेङ भेतिहि। 3 वा तोमता योम्तेङ हिगिल्घाहि, कालाउ वासेहेङ द्याङगेलाइ धेउलि मादोघाहि, इता थेकापा कि फालामको बल्लियाका झिन्झिरिहोइ बुङ धेउलि मादोघाहि। 4 हेन्जा खेप वासेहेङ फालामको कलिहोइ खुर कालाउ खोकोइता झिन्झिरिहोइ धेउलाबुङ वा झिन्झिरि धोअ्पाघाखे कालाउ कलिगेलाइ चाना-चुनुपा पाघाखे, कालाउ हासु बुङ वासेहेङ काबुता ताअ्लि मादोघाहि। 5 नितिमा न्हिसिन्ता जेलाउलाउ बुङ वा तोम कालाउ तिकारगेलाइ भारि ह्रिकाइगिल्घाखे कालाउ उन्ठुइहोइ ताइमिहेङ कोताराइतेङ जिउता पेचारा बानाइघाहि। 6 जेलाउ उङको द्याङ येसुहेङ दुरेसोङ तिङहि कालाउ धाअ्तेङसाङ येसुको आगाता खोकोइता तुघुरतेङ सेउपाहि। 7-8 येसु वासेहेङ दोअ्हि, भुत-आत्मा इदोइ द्याङसो बाहार ओल्लेतेङ लौउ! कालाउ उङको द्याङ बार्का गालाहोइ ह्रिकाइतेङ दोअ्हि, “हे येसु सरबुङसाइका परमेस्वरको चान, नाङको कालाउ केलाइ दोफा हाइ सरोकार हि रो?” परमेस्वरको मिङता केरा चाअ् कि नाअ् केलाइहेङ दुख मापिप्याना। 9 कालाउ येसु वासेहेङ हिअ्हि, “नाङको मिङ हाइ?” वा जोबाफ पिहि, “केलाइको मिङ फाउज हि केलाइते हेन्जाङ हिनाहि।” 10 कालाउ इङको भुत-आत्मा येसुहेङ हेन्जाङ बिन्ति पातेङ दोअ्हि, “केलाइहेङ गेरासेनगेलाइको मुलुकसो माओल्लेपापि।” 11 इन्ता भेरपाङको तिकारता पायागेलाइको बार्का हुल दुगिल्घाहि। 12 कालाउ भुत-आत्मागेलाइ येसुहेङ बिन्ति पातेङ दोअ्हि, “केलाइहेङ इङको पायागेलाइ लिता दुल्लि आग्या पि।” 13 कालाउ येसु भुत-आत्मागेलाइहेङ आग्या पिहि कालाउ भुत-आत्मागेलाइ उङको द्याङसो ओल्लेतेङ पाया लिता दुल्हि। इङको हुलता लगभग न्हे हाजार पायागेलाइ हिघाहि। इम्बालाइ तिकार भारि धाअ्हि कालाउ गालिल समुन्द्रता वाङतेङ सिहि। 14 कालाउ पाया धोकालाइ इन्सिका तिङतेङ झाराङ खाअ्हि, कालाउ हानितेङ इङको काथा देरा कालाउ सहर भरि हिङपाहि। हेन्जाङ द्याङगेलाइ हाइ जेङहि दोअ्तेङ खाङलि येसुकोता लोहि। 15 कालाउ इम्बालाइ येसुकोता लोहि, इम्बालाइ उङको द्याङहेङ खाङहि जाइ एनोङ सोमोइता भुत-आत्माहोइ पोङघाका हिघाहि, वा एल्तेङ लोखोन होङतेङ योम्तेङ हिका तिङतेङ इम्बालाइ आवाइतुहि। 16 इदोइ घाटाना तिङका द्याङगेलाइ उङको भुत-आत्मा धेल्का द्याङ कालाउ पायाको काथा इन्ता लोका झाराङहेङ हिङपाहि। 17 इसिका काथा हिङतेङ उङको द्याङगेलाइ जाइ खाङलि लोका हिघाहि कालाउ येसुहेङ बिन्ति पातेङ दोअ्हि, “केलाइको मुलुक लाअ्तेङ हानेपि।” 18 कालाउ येसु हानिलिको भाअ्सिङ नाउता ताङलाहि, उङको द्याङ जाइ दोफा लाम्फा भुत-आत्मा हिघाहि, येसुहेङ सेउपालि तेङहि, “कासेहेङ बुङ दोफाङ चुम्पु।” 19 कालाउ येसु वासेहेङ ताइ दोफा लोलि आग्या मापिहि, कालाउ वा दोअ्हि, “ताइको साअ् हाने कालाउ परमप्रभु दोङ पाका माहान काम कालाउ वा दोङ नासेहेङ तिङपाका दायाका कालाउ वा दोङ पाका गोताङ काथा नाङको ताइकोगेलाइहेङ हिङपा।” 20 कालाउ उङको द्याङ ताइको साअ् भेरपाको डेकापोलोस इलाकाता हानिहितेङ गोताङ येसु दोङ ताइको भाअ्सिङ पाका झाराङहेङ हिङपाहि। कालाउ वासेहेङ हिङका झाराङ द्याङगेलाइ भारभुसाइहि। सिका बेजान कालाउ मिसा लोका बेबाल ( मति 9:18-26 ; लुक 8:40-56 ) 21 येसु आरोङ नाउता ताङतेङ गालिल समुन्द्रको ओदोइ पार हानिहि, कालाउ बार्का जेर लोतेङ येसुको कोर्पाहाङ जाअ्हि। जेलाउ वा समुन्द्रको काम्भेता जाअ्तेङ हिघाहि। 22 कालाउ यहुदिगेलाइको चाउघारा साअ्को माझि वाराङ मध्येसो एमि याइरस मिङ हिका येसुकोता लोहि। वा येसुहेङ तिङतेङसाङ येसुको खोकोइता तुघुरतेङ सेउपाहि। 23 कालाउ वा इसिका दोअ्तेङ बिन्ति पाहि, “काङको आतुइका चामिन्दि मिसा लोतेङ सिलि तोम्का हि, नेउ वाको ह्रुता लोतेङ खुर ताअ्पि, कालाउकि वा एल्तेङ बान्चियाको।” 24 कालाउ येसु याइरस दोफा हानिहि। एनोङ बार्का जेर वाको न्हु-न्हु लोहि, कालाउ द्याङगेलाइ वाको कोर्पाहाङसो चेसुमेसुपा जाअ्तेङ हिघाहि। 25 कालाउ इङको जेरता तेन्हे बासार हिति होका बेथाहोइ दुख निङका एमि बेबाल बुङ हिघाहि। 26 वा हेन्जाङ बैधे कालाउ ओसेरे पैति पालाउ बुङ एल्लि दोका मान्थुघाहि। गोताङ धन सम्पति खार्चा पालि दोका हिघाहि, कालाउ एल्लि खान्तेङ भरु झन बेथाहोइ वासेहेङ थेचाराइहि। 27-28 येसुको पाका कामगेलाइको बारेता जेलाउ वा हिङहि, कालाउ सोचिहि, वाको धाबा खिनिङ साइलि निङलाउ बुङ, का एलाङका दोअ्तेङ ओदोङ भाअ्सिङ वा जेरता दुल्तेङ न्हु पाहा लोतेङ येसुको धाबा साइहि। 29 येसुको धाबा साइनासिङ हिति होका बेथा एल्तेङ हिति ओताका वा थाहा गिहि। 30 येसु ताइमिसो चाङगाइको सरबुङ ओदोङ घुरि ओल्लेतेङ हानिका थाहा गिनाङ वा न्हु पाहा घुरितेङ जेरहेङ हिअ्हि, “काङको धाबा हासु साइहि?” 31 येसुको चात्यागेलाइ वासेहेङ दोअ्हि, “वथे बार्का जेर नाअ् तिङतेङ बुङ हासु साइहि दोअ्तेङ हेसा हिअ्लि दोअ्खेना?” 32 कालाउ येसु ताइमिहेङ हासु साइहि दोअ्तेङ कोर्पाहाङ खाङहि। 33 उङको बेबाल ताइमि एल्का थाहा गितेङ येसुको खोकोइता तुघुरतेङ सेउपाहि। का नासेहेङ साइघा दोअ्तेङ येसुहेङ दोअ्हि। कालाउ वा चेर तामपामबे दोअ्तेङ वा हेन्जा थिहि कालाउ फिरलि तेङहि। 34 कालाउ येसु उङको बेबालहेङ दोअ्हि, “ओइ चामिन्दि, नाअ् कासेहेङ खाङधुरि पानाङ एल्होइना। सान्तिसो सिता हाने कालाउ नाङको बेथा एला हेलाउ बुङ माघुरियाङ।” 35 येसु उङको बेबाल दोफा काथा पाअ्काताङ पालाउ यहुदिगेलाइको चाउघारा साअ्को माझिवाराङको द्याङगेलाइ लोतेङ याइरसहेङ दोअ्हि, “नाङको चामिन्दिते सिहोइ आरोङ हाइ पालि गुरुज्युहेङ दुख प्याना?” 36 इम्बालाइको काथाहेङ येसु वास्ताङ मापासिङ इन्ता यहुदिगेलाइको चाउघारा साअ्को माझिवाराङहेङ दोअ्हि, “माअ्थिसु नेलाइ कालाउ खाङधुरि खिनिङ पासु।” 37 येसु पतरुस, याकुब, याकुबको ओने युहान्नाहेङ खिनिङ ताइ दोफा लोलि आनुमति पिहि। जेर मध्ये आरोङ हासुहेङ बुङ ताइमि दोफा लोलि मापिहि। 38 कालाउ यहुदिगेलाइको चाउघारा साअ्को माझिवाराङको साअ्ता थुकातेङ ओबालाइहेङ ह्रिकाइकाताङ खारतेङ हिका तिङहि। ओबालाइ मन ओकलाइपाङ कालाउ जिउधाइ ल्होपाङ खारतेङ हिघाहि। 39 येसु लिता दुल्तेङ इम्बालाइहेङ दोअ्हि, जामाल सिका मान्थु, वाते जिम्तेङ खिनिङ हि। ओदोङ भाअ्सिङ एसापा ह्रिकाइतेङ कालाउ जिउधाइ ल्होपाङ खारलि मागोइयाङ। 40 येसुको काथा हिङतेङ, जेरगेलाइ लेङपिलि तेङहि। कालाउ वा इम्बालाइ झाराङहेङ साअ् बाहार ओल्लेपाहि, कालाउ बेजानको आबा-आमाइ कालाउ ताइको चात्यागेलाइहेङ खिनिङ चुम्तेङ बेजान हिका थामेता हानिहि। 41 कालाउ येसु बेजानको खुर चातेङ दोअ्हि, “तालिता कुमि!” इदोइ दोअ्का चाहि “ओइ आतुइका आनाउ, का नासेहेङ दोअ्खा, ल्हो!” 42 कालाउ जामाल ओदोङ घुरि हाकाधुकु ल्होहि कालाउ इसो ओसो तेगिल्लि तेङहि। कालाउ या तिङतेङ इम्बालाइ आवाइतुहि। 43 कालाउ न्हुसो येसु इम्बालाइहेङ इदोइ काथा हासुहेङ बुङ माअ्दो दोअ्तेङ थाङका आग्या पिहि कालाउ वाको आबा-आमाइहेङ दोअ्हि, “हाइ दोङ चाका आमेने पि।” |
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
Beyond Translation