मर्कुस 2 - Dhimal NT

एमि गाइल्हि खोअ्काहेङ एल्पाहि

¹ आले दिना न्हुसो येसु कर्फनहुम सहरता आरोङ लोहि, कालाउ द्‍याङगेलाइ वा साअ्ता लोका हि दोअ्का हिङहि।

² कालाउ इन्ता इदोइ झोको द्‍याङगेलाइ जोमन्हाहि कि, फिनुको बाहार बुङ योम्का थामे मान्थुघाहि। कालाउ इन्ता येसु इम्बालाइको माझाता परमेस्वरको बचन हिङपाघाहि।

³ द्‍यामि द्‍याङ, एमि गाइल्हि खोअ्का द्‍याङहेङ वाकोता चुम्तेङ भेरपा चुमाहि।

⁴ जेलाउ बिरुबिरुपा द्‍याङ हिनाङ गाइल्हि खोअ्का द्‍याङहेङ येसुको भेरपा चुम्पुलि मादोहि, कालाउ वा हिका साअ्को चाल्हा ह्रुता ताङतेङ चाल्हा आतेङ। इन्तासो गाइल्हि खोअ्का द्‍याङहेङ द्‍यामि द्‍याङ धोक्रा सुधाङ लेता येसुको भेरपा खुअ्पाहि।

⁵ जेलाउ येसु ताइ ह्रुता इम्बालाइको खाङधुरि तिङतेङ उङको गाइल्हि खोअ्काहेङ दोअ्हि, “ओइ चान, नाङको पापगेलाइ स्यामा जेङहोइ।”

⁶ आधिमि मोसाको व्यवस्था धिरपाका द्‍याङगेलाइ इङको साअ्ता योम्तेङ हिघाहि। कालाउ येसुको दोअ्का काथाहेङ इम्बालाइ ताइको मन-मन्ता इसिका बिचार पातेङ हिघाहि।

⁷ “इदोइ द्‍याङ हेसा इसिका दोअ्लि दोअ्खे? याते परमेस्वरहेङ मन्दा माताका काथा। परमेस्वर बाहेक हासु बुङ पापगेलाइ स्यामा पालि माद्वाङ!”

⁸ येसु ओदोङ घुरि ताइको मनसो इम्बालाइको मनको बिचार पाका थाहा गिहि। कालाउ मोसाको व्यवस्था केम्का द्‍याङगेलाइहेङ दोअ्हि, नेलाइ इसिका सोचिलि मागोइधाङ।

⁹ का गाइल्हि खोअ्काहेङ दोअ्घा, नाङको पापगेलाइ स्यामा जेङहोइ हाइ वासेहेङ एसा दोअ्लि रेम्का जेनाङ, “ल्हो, नाङको धोक्रा तोल्हे, कालाउ तेअ् दोअ्लि हिदोइ पालि रेम्का हि दोअ्सु?”

¹⁰ का चाहिखा कि नेलाइ गिसु कि का द्‍याङको चानहेङ प्रिथिबिता द्‍याङगेलाइको पाप स्यामा पालि खाबारा हि। कालाउ वा गाइल्हि खोअ्काहेङ दोअ्हि,

¹¹ का नासेहेङ दोअ्खा “नाअ् ल्हो, नाङको धोक्रा चुम्तेङ सिता हाने।”

¹² ओदोङ घुरि उङको ल्होहि कालाउ झाराङको माझासो धोक्रा चुम्तेङ हानिहि। इन्ता हिका झाराङ द्‍याङ भाङ-भाङहि। “केलाइते इसिका हेलाउ बुङ तिङका मान्थुघान्हाहि दोअ्काताङ, इम्बालाइ परमेस्वरको महिमा पाहि।”

येसु दोङ लेबिहेङ ताइको चात्या जेङलि काइका

¹³ येसु आरोङ समुन्द्रको काम्भेता हानिहि। कालाउ हेन्जाङ बार्का द्‍याङगेलाइको जेर वाकोता लोहि। वा इम्बालाइहेङ परमेस्वरको बचन हिङपालि तेङहि।

¹⁴ जेलाउ वा हानिकाताङ पालाउ आल्फायसको चान लेबिहेङ पोत ल्होपाका थामेता योम्तेङ हिका तिङहि। येसु वासेहेङ दोअ्हि, “ति का दोफा लौउ कालाउ काङको चात्या जेङ, वा ताइको काम लाअ्तेङ लोहि कालाउ येसुको चात्या जेङहि।”

¹⁵ आले दिना न्हुसो येसु कालाउ वाको चात्या लेबिको साअ्ता चाघाखे। एन्सालाउ हेन्जा पोत ल्होपाका द्‍याङगेलाइ कालाउ जेदोङ गेलाइहेङ पापि दोअ्तेङ गिघाहि, इम्बालाइ इन्ता हिघाहि। येसुहेङ पिताइकालाइ बुङ हिघाहि, ओबालाइ बुङ वाको दोफा चाघाखे।

¹⁶ जेलाउ फारिसि दोअ्का समुहको आधिमि व्यवस्था धिरपाका द्‍याङगेलाइ येसुहेङ एसापा पोत ल्होपाकालाइ कालाउ आरु द्‍याङगेलाइ दोफा तिङहि जाइहेङ इम्बालाइ पापि दोअ्घाखे, इम्बालाइ दोङ चाकाताङ पाका तिङहि कालाउ ओबालाइ वाको चात्यागेलाइहेङ हिअ्हि, हाइ पालि येसु इन्सिका पोत ल्होपाका कालाउ पापि द्‍याङगेलाइ दोफा योम्तेङ चाखे?

¹⁷ इदोइ काथा हिङतेङ येसु इम्बालाइहेङ दोअ्हि, जेदोङ द्‍याङगेलाइ निरोगि हि ओबालाइहेङ ओसेरे पैति मागोइखे कालाउकि जाइ रोगाइका द्‍याङगेलाइहेङ खिनिङ गोइखे। इसिकाङ का बुङ पापिगेलाइहेङ बान्चिपालि लोघा वासेहेङ माको जाइ द्‍याङ ताइमिहेङ धर्मि सम्झिखे।

बारिकाको बारेता हिअ्का

¹⁸ युहान्नाको चात्यागेलाइ कालाउ फारिसिगेलाइ बारिघाहि। एनि आधिमि द्‍याङगेलाइ लोतेङ येसुहेङ हिअ्हि, “युहान्नाको चात्यागेलाइ कालाउ फारिसिको चात्यागेलाइ बारिखे, कालाउ हाइ पालि नाङको चात्यागेलाइ माबारिखे?”

¹⁹ येसु इम्बालाइहेङ दोअ्हि, “हाइ दारा इम्बालाइ दोफा हिपा भरि जन्तिगेलाइ बारिखे रो? जेसाङ काङको चात्या बुङ माबारियाङ जेलाउ थेकापा का ओबालाइ दोफा ह्याङका।

²⁰ एनि इङको सोमोइ ल्वावा, जेलाउ दारा ओबालाइसो लाअ्न्हावा, एन्सालाउ इम्बालाइ बारिखे।”

²¹ “हिदोइ बुङ द्‍याङ पुरना धाबाता नावा धाबा मातालाइयावा, माकुनुते पुरना धाबा आरोङ थेअ्तेङ हानावा, इन्सिकाङ नावा धाबा फेलाउ पुरनासो इस्तु थेअ्तेङ हानावा।”

²² “एन्साङ पातेङ हासु बुङ नावा दाखरस पुरना धालेको झोलाता माह्वातावा, ओदोङ भाअ्सिङ माकुनुते इङको नावा दाखरसहोइ फुलियावा कालाउ पुरना धालेको झोला थेअ्तावा कालाउ दाखरस धालेको झोलाता नासातावा। कालाउ नावा दाखरस चाहि नावा धालेको झोलाता दोङ ह्वाखे।”

परमेस्वर पबित्तरो दिनाको प्रभु

²³ परमेस्वरको पबित्तरो दिनाता जेलाउ येसु कालाउ वाको चात्यागेलाइ मिलिङ भारिसो हानिघाहि। कालाउ वाको चात्यागेलाइ इङको पाहासो हानिकाताङ पालाउ से उमको सिसा पेतेङ चाअ्लि तेङहि।

²⁴ कालाउ फारिसिगेलाइ येसुहेङ दोअ्हि, “खाङ हाइ पालि परमेस्वरको पबित्तरो दिनाता पालि माएल्का काम पाखे, जेदोङ चाहि व्यवस्थाको बिरोध हि! नाअ् इम्बालाइहेङ एन्सा पालि माएल दोअ्लि गोयाना।”

²⁵ येसु इम्बालाइहेङ दोअ्हि, जेलाउ राजा दाउद कालाउ वाको दोफा हिकालाइ चाअ्का-आम्का मान्थुतेङ लालाइ गिल्का हिघाहि। कालाउ म्हितुपाङ हिलाउ राजा दाउद हाइ पाहि? नेलाइ हेलाउ पढेका मान्थु सुन्हा?

²⁶ जेलाउ आबियाथास प्राधान पुजारि हिघाहि, राजा दाउद परमेस्वरको मुन्दिर लिता दुल्हि, कालाउ परमेस्वरहेङ चाढाइका तोले चाहि। कालाउ ताइको सानाइतिगेलाइहेङ बुङ पिहि, जेदोङ मोसाको व्यवस्था आन्सार प्राधान पुजारिहेङ खिनिङ तोले चालि खाबारा हिघाहि।

²⁷ जेलाउ येसु इम्बालाइहेङ दोअ्हि, परमेस्वरको पबित्तरो दिना द्‍याङगेलाइको भाअ्सिङ बानाइका हि, द्‍याङगेलाइ चाहि परमेस्वरको पबित्तरो दिनाको भाअ्सिङ माको।

²⁸ ओदोङ भाअ्सिङ का द्‍याङको चान परमेस्वरको पबित्तरो दिनाको बुङ प्रभु दोङ हिघा।