मर्कुस 14 - Dhimal NT

येसुहेङ सेअ्लि दाउ भोगिल्का

¹ एला न्हेनि न्हुसो निस्तार कालाउ आखिमिरि तोलेको पार्बा सुरु जेङलि तोम्का हिघाहि। मुलि पुजारिगेलाइ कालाउ व्यवस्था धिरपाका द्‍याङगेलाइ येसुहेङ हेसा पातेङ रिम्तेङ सेअ्लिला दोअ्तेङ दाउता हिघाहि।

² कालाउ इम्बालाइ इसिका बिचार पाहि, पार्बाको बेलाता येसुहेङ रिम्तेङ सेअ्लि माएल, माकुनुते द्‍याङगेलाइको हुलदुङगा मचियावा।

³ जेलाउ येसु बेथानिया देराता सिमोन जाइहेङ येसु रोग्या खोअ्कासो एल्पाका हिघाहि, वाको साअ्ता चाअ्लि योम्लाउ एमि बेजान सिङगमरमरको बोतलता हेन्जा जाङका आत्तरको चुइति चुम्तेङ वाकोता लोहि, कालाउ वा चाअ्लि योम्लाउ उङको बेजान आत्तरको चुइति पुरिङता हुपिहि जेदोङ सिङगमरमरको उन्ठुइसो बानाइका हिघाहि। जेदोङ सुद्द जतामसिसो बानाइका हिघाहि, इङको खोलितेङ येसुहेङ साम्मान पालि येसुको पुरिङता हुपिहि।

⁴ कालाउ आधिमि चेर ताम्पातेङ ता-ताइमिता दोअ्लि तेङहि, “वा वथे जाङका आत्तर हाइ पालि एसापा नासा पाखे?”

⁵ हाइपालिपानु इदोइ आत्तरको चुइति साअ्-बासार खान्तेङ बुङ हेन्जा ज्यालाको कामाइ, “कालाउ इङको चुइति पिइतेङ गरिबगेलाइहेङ ताका पिलि दोअ्धाङ।” आरोङ इम्बालाइ उङको बेजानहेङ मिसियाँ दाइ-दाइ पातेङ चेरहि।

⁶ येसु दोअ्हि, “वासेहेङ एकलाङ लाअ्पिसु, नेलाइ वासेहेङ हाइ दोङ मादोअ्सु। का ह्रुता याको आत्तर हुपिलि एनोङ रेम्का काम हि।

⁷ गरिबगेलाइते नेलाइ दोफा जेलाउ बुङ ह्यावा। कालाउ मन लागेका हिदोइ बुङ सोमोइ नेलाइ इम्बालाइको भालो पालि दोस्वाना। कालाउ का ते नेलाइ दोफा जेलाउ बुङ माह्याङका।

⁸ या काङको भाअ्सिङ पाका हि, हाइपालिपानु इङको पाका हि। इदोइ बेजान कासेहेङ लिअ्लि खान्तेङ लाम्फाङ लिअ्लिको भाअ्सिङ काङको जिउता मालामालाका चुइति मोअ्पिका हि, वा जेथे पालि खाङका पाहि वाको दोफा जेथे हि इङको पाहि।”

⁹ जातिङ भारि का नेलाइहेङ दोअ्खा, “सुमिङको जेता-जेता काङको बारेता इदोइ रेम्का सुसमाचार थुकातावा, इन्ता इदोइ बेजान हाइ पाका हि वाको फोम लावा।”

¹⁰ वाको तेन्हे झना चात्यागेलाइसो एमि चात्या यहुदा इस्कोरियत वासेहेङ रिम्पालिको भाअ्सिङ मुलि पुजारिको जेरगेलाइकोता हानिहि, कालाउ वासेहेङ रिम्पालि साघाइयाङ।

¹¹ यहुदाको काथा हिङतेङ ओबालाइ मेनाङ लेङचाहि। ताका केलाइ नासेहेङ प्याङ दोअ्तेङ केरा चाहि। हाइपालिपानु वासेहेङ हेसा पातेङ रिम्लि ला दोअ्तेङ वा दामा खाङतेङ हिघाहि।

प्रभु-भोज

¹² आखिमिरि तोले चाअ्का पार्बाको लाङ दिनाता, जेलाउ ओबालाइ निस्तार पार्बाको भेडाको बलि पिहि कालाउ येसुहेङ वाको चात्यागेलाइ हिअ्हि, “नाङको मन हाइ हि, केलाइ निस्तार पार्बाको भोज हिता चालि?”

¹³ कालाउ येसु ताइको न्हेमि चात्यागेलाइहेङ इसिका दोअ्तेङ दिङगिल्हि, “निधिमि यरुसेलेम सहर हानेसु, इन्ता एमि द्‍याङहेङ घाइलाता चि चुम्तेङ तेअ्काताङ पाका तिङस्वाना। नेलाइ वाको लेसारा पिताइसु।

¹⁴ नेलाइ इङको साअ्को गिह्रिहेङ दोअ्सु, ‘केलाइको गुरु ज्यु हिअ्खे, काङको चात्यागेलाइ दोफा निस्तार पार्बाको भोज चाअ्का बान्सालाइको कोठा हिता हि?’

¹⁵ कालाउ उङको द्‍याङ साअ्को ह्रुता साजाइतेङ ताअ्का एनोङ बार्का कोठा नेलाइहेङ तिम्प्यावा, केलाइको भाअ्सिङ इन्ताङ निस्तार पार्बाको चाका-आम्का बानाइतेङ ताअ्सु।”

¹⁶ कालाउ उङको न्हेमि चात्यागेलाइ ओल्लेतेङ सहर हानिहि, प्रभु जेदोङ काथा दोअ्तेङ दिङगिल्का हिघाहि। इम्बालाइ इन्सिकाङ निङहि, कालाउ निस्तार पार्बाको भाअ्सिङ इम्बालाइ चाका-आम्का बानाइतेङ ताअ्हि।

¹⁷ बेल्हाका पहरता येसु ताइको तेन्हे चात्यागेलाइ दोफा लोहि।

¹⁸ ओबालाइ चाकाताङ पालाउ चात्यागेलाइहेङ येसु दोअ्हि, जातिङ भारि का नेलाइहेङ दोअ्खा, नेलाइसो एमि हि, का दोफा चादोङखे, वा कासेहेङ रिम्पालिको भाअ्सिङ सतुरुहेङ साघाइयाङ।

¹⁹ एन्सालाउ इसिका हिङतेङ चात्यागेलाइ उदास जेङहि, झाराङ एमि-एमिपा एसा दोअ्लि तेङहि हाइ इदोइ का ते माको दोकाताङ हिअ्हि?

²⁰ येसु इम्बालाइहेङ दोअ्हि, “इङको तेन्हे झना चात्यासो एमि हि, जाइ केलाइ दोफा ए दोफाङ एनोङ दोङ बातिता तोले चोदोङखे।

²¹ हाइपालिपानु का द्‍याङको चानको भाअ्सिङ लेखेका हि, द्‍याङको चान धर्मसास्तरता लेखेका भाइपाङ सिलि गोयाङ कालाउ उङकोहेङ धिक्कार हि। जाइ द्‍याङको चानहेङ धोका पितेङ रिम्पावा, वाकोते जोलोम जेङका खान्तेङते माजेङका रेम्का जेङधाङ।”

²² चाकाताङ पालाउ येसु तोले चुम्हि। कालाउ तोलेको भाअ्सिङ परमेस्वरहेङ धन्यबाद पिहि कालाउ तोले पोङहि कालाउ चात्यागेलाइहेङ तोले पितेङ दोअ्हि, “कोसु, या काङको जिउ दोङ हि।”

²³ कालाउ आङगुरको रस बातिता चुम्तेङ परमेस्वरहेङ धन्यबाद पिहि कालाउ चात्यागेलाइ झाराङ इङको बात्तिसो आम्हि।

²⁴ कालाउ इम्बालाइहेङ येसु दोअ्हि, “इदोइ काङको आङगुरको रस काङको हितिको कारार दोङ। काङको हिति हेन्जा द्‍याङको भाअ्सिङ बलिको रुपता होपाङ। इदोइ इङको बाचाहेङ जानाइखे जेदोङ परमेस्वर ताइको द्‍याङगेलाइ दोफा होपातेङ हि।

²⁵ जातिङ भारि का नेलाइहेङ दोअ्खा, कालाउ न्हुसो का इङको दिना थेकापा हेलाउ बुङ आङगुरको रस माआमाङका, जेलाउ थेकापा का परमेस्वरको सासनता नावा आङगुरको रस माआम्पा।”

²⁶ जेलाउ येसु कालाउ वाको चात्यागेलाइ परमेस्वरको बाखिन पाहि कालाउ यरुसेलेम सहरको बाहार ओल्लेतेङ जैतुन तिकार भारि हानिहि जेदोङ भेरपाङ हिघाहि।

²⁷ जेलाउ इम्बालाइ तिकार भारि हानिदोङघाहि। येसु चात्यागेलाइहेङ दोअ्हि, नेलाइ झाराङ कासेहेङ लाअ्तेङ हानिस्वाना। हाइपालिपानु पबित्तरो धर्मसास्तर काङको बारेता जेदोङ दोअ्खे इङको सत्ये हिलि गोयाङ। का उङको द्‍याङहेङ सेअ्ताङका जाइ काङको द्‍याङगेलाइहेङ लाखुरिया भाइपा सामाराइखे, कालाउ इम्बालाइ भेडा मेसा भाइपा आउलिगिल्लावा।

²⁸ कालाउ सिकासो सिन्हुतेङ ल्होकाङका कालाउ का गालिल जिल्लाता नेलाइ खान्तेङ लाम्फा थुकाताङका।

²⁹ पतरुस येसुहेङ दोअ्हि, “झाराङ लाअ्तेङ खाअ्लाउबुङ का नासेहेङ चाहि हेलाउ बुङ मालाताङका।”

³⁰ कालाउ येसु पतरुसहेङ दोअ्हि, “जातिङ भारि का नासेहेङ दोअ्खा, नानिङ न्हिसिन्ता न्हेखे धाङगाइ किया ओलि खान्तेङ लाम्फा नाअ् कासेहेङ सुम्खे दोअ्ताना कि का वासेहेङ मानाल्खा।”

³¹ कालाउ झन पतरुस ह्रिकाइतेङ दोअ्हि, “का नाअ् दोफा सिलि गोइलाउ बुङ स्याङका, का हेलाउ बुङ मादोअ्ताङका कि का नासेहेङ मानाल्खा!” कालाउ झाराङ चात्यागेलाइ इन्सिकाङ दोअ्हि।

येसु गेतसमनि बागाइचाता

³² जेलाउ येसु चात्यागेलाइ दोफा गेतस्मनि दोअ्का बागाइचाता थुकालाहि, कालाउ वा ताइको चात्यागेलाइहेङ दोअ्हि, “का परमेस्वरता प्रार्थाना पापाभरि नेलाइ इताङ हिसु।”

³³ कालाउ येसु पतरुस, याकुब युहान्नाहेङ बागाइचाता ताइमि दोफा आसा फारापा चुम्पुतेङ हानिहि। कालाउ वाको मन मेनाङ जिउधाइ ल्होपाङ खारतेङ हिघाहि।

³⁴ वा चात्यागेलाइहेङ दोअ्हि, काङको मन मेनाङ जिउधाइ ल्होपाङ खारतेङ हि, ना सिलिना हिलि जेङका हि। नेलाइ इताङ जागितेङ हिसु।

^35-36 कालाउ येसु आसा दुरे हानितेङ भोनोइता तिरु थोतेङ परमेस्वरता प्रार्थाना पाघाहि, काङको आबा, नाङको योजानाता इदोइ जेङलि दोनु का ह्रुता लोका दुखसो बान्चिपा, नाङको भाअ्सिङ गोताङ काम सम्भब हि, इदोइ दुख लोलि मापि। नाअ् इङको पाअ्‌ जेदोङ भोखेना। इङको माको, जेदोङ का भोखा।

³⁷ येसु आरोङ धुरितेङ लोलाउ सुमि चात्यागेलाइहेङ जिम्तेङ हिका तिङहि। कालाउ वा पतरुसहेङ दोअ्हि, “सिमोन नाअ् निन्धा धुलाइतेङ हिना? हाइ ए घान्टा बुङ जागितेङ हिलि मादोसुना?

³⁸ जागितेङ हिसु कालाउ ल्होतेङ प्रार्थाना पासु, नेलाइ जाचिकाता मापरिसु। जातिङ भारि नेलाइको आत्मा तियार हि, कालाउ बुङ नेलाइको जिउ चाहि हुइका हि।”

³⁹ येसु आरोङ एखे हानितेङ ओदोङ थामेता प्रार्थाना पालि तेङहि।

⁴⁰ आरोङ बुङ लोलाउ वा चात्यागेलाइहेङ जिम्तेङ हिका तिङहि, हाइपालिपानु इम्बालाइ हेन्जा माइका हिघाहि कालाउ जेलाउ वा इम्बालाइहेङ ल्होपाहि वासेहेङ हाइ जोबाफ पिलि, दोअ्तेङ इम्बालाइहेङ थाहा मान्थुघाहि।

⁴¹ सुम्खे चात्यागेलाइ हिका थामेता धुरितेङ लोलाउ येसु दोअ्हि, “हाइ नेलाइ एला थेकापा बुङ जिम्तेङ हिसुन्हा? एला जिम्का पहर हानिहोइ! खाङसु एला का द्‍याङको चानहेङ रिम्तेङ पापि द्‍याङगेलाइको खुरता सुम्पिका सोमोइ जेङहोइ।

⁴² एला ल्होसु, जागियाइने! खाङसु, कासेहेङ रिम्पाका द्‍याङ भेरपा लोका हि।”

येसुहेङ रिम्का

⁴³ येसु काथा पाअ्काताङ हिघाहि, उङको एन्सालाउ दोङ यहुदा देखाल जेङहि, यहुदा इस्कोरियत तेन्हे चात्यागेलाइसो एमि हिघाहि। यहुदा दोफा हेन्जा द्‍याङगेलाइ हिघाहि। उङको द्‍याङगेलाइहेङ मुलि पुजारिगेलाइ, व्यवस्था धिरपाका द्‍याङगेलाइ कालाउ यहुदि आगुवागेलाइ दिङगिल्का हिघाहि। यहुदाको इङको द्‍याङगेलाइ काटि कालाउ खापरगेलाइ चुम्तेङ लोका हिघाखे।

⁴⁴ येसुहेङ रिम्पाका यहुदा उङको द्‍याङगेलाइहेङ इसिका दोअ्का हिघाहि, “जाइहेङ का साम्मान पातेङ खोमाङका, ओदोङ दोङ येसु, नेलाइ गोर्हाइतेङ वासेहेङ रिम्तेङ चुम्पुसु।”

⁴⁵ कालाउ यहुदा सरासर येसुकोता लोतेङ दोअ्हि, “सेउपाखा गुरु ज्यु!” कालाउ येसुहेङ चुमाइ चाहि।

⁴⁶ ओदोङ बेला दोङ इम्बालाइ येसुहेङ रिम्हि।

⁴⁷ कालाउ वाको भेरपाङ जाअ्तेङ हिका एमि कात्ति होअ्तेङ प्राधान पुजारिको चाकारियाको एनोङ न्हातोङ पुक्कापा पाल्पिहि।

⁴⁸ इम्बालाइहेङ येसु दोअ्हि, “हाइ का डाकु नेलाइ कासेहेङ खुकालाइ भाइपा लाठि, कात्ति चुम्तेङ कासेहेङ रिम्लि लोसुन्हा?

⁴⁹ का लिपाङ नेलाइ दोफाङ योम्तेङ मुन्दिरता धिर्पालाउ हाइ पालि मारिम्सुना। कालाउ बुङ परमेस्वरको धर्मसास्तरता लेखेका काथा पुरा जेङलि दोङ गोयाङ!”

⁵⁰ ओदोङ घुरि गोताङ चात्यागेलाइ येसुहेङ लाअ्तेङ खाअ्हि।

⁵¹ ताइको जिउहेङ एनोङ जाङका धुसा गुअ्तेङ एमि वाजन वाको न्हु-न्हु हानिहि, द्‍याङगेलाइ उङको वाजानहेङ रिम्हि।

⁵² कालाउ जाङका धुसा लाअ्तेङ वा नाङघाङ खाअ्हि।

येसु यहुदिको चाउघारा साअ्को आगाता

⁵³ जेलाउ इम्बालाइ येसुहेङ प्राधान पुजारिको साअ्ता चुम्पुहि, कालाउ इन्ता झाराङ खान्तेङ मुलि पुजारिगेलाइ, मोसाको व्यवस्था धिरपाका द्‍याङगेलाइ कालाउ यहुदि आगुवागेलाइ जोम्तेङ हिघाहि।

⁵⁴ पतरुस चाहि दुरेसोङ प्राधान पुजारिको साअ्लेङ लिता वाको न्हु-न्हु हानिहि, कालाउ इन्ता मुन्दिरको पालेगेलाइ दोफाङ योम्तेङ वा मे एम्तेङ हिघाहि।

⁵⁵ इन्ता हिका मुलि पुजारिको जेर कालाउ यहुदि माहासभाको आरु सदस्यगेलाइ येसुहेङ सेअ्लिको भाअ्सिङ वाको बिरोधता मारेम्का साक्सि भोहि कालाउ इन्सिका हाइ दोङ मानिङहि।

⁵⁶ हेन्जाङ द्‍याङगेलाइ वाको बिरोधता धाताइका साक्सि पितेङ हिघाहि। कालाउ जेदोङ इम्बालाइ दोअ्हि इङको साक्सि दोफा सदर माजेङहि।

⁵⁷ आधिमि द्‍याङगेलाइ ल्होतेङ वाको बिरोधता एसा दोकाताङ साक्सि पिहि,

⁵⁸ “वा एसा दोअ्का केलाइ हिङन्हाहि, द्‍याङको खुरहोइ बानाइका इदोइ मुन्दिर का ह्राताङका, कालाउ का सुम दिनाता भेनेङ मुन्दिर बानाइ याङका, जेदोङ द्‍याङगेलाइको खुरसो बानाइका मुन्दिर माको।”

⁵⁹ इदोइ बुङ इम्बालाइ दोअ्हि, इदोइ पिका साक्सि दोफा बुङ हिदोइ बुङ सदर माजेङहि।

⁶⁰ कालाउ प्राधान पुजारि चाउघारा साअ्को आगाता जाअ्पातेङ येसुहेङ हिअ्हि, “हाइ नाअ् दोफा हाइ दोङ जोबाफ मान्थु? इदोइ द्‍याङगेलाइ नाङको बिरोधता पिका साक्सि हाइ हि?”

⁶¹ कालाउ येसु सिकापा दोङ हि, वा हाइ दोङ जोबाफ मादोअ्हि। आरोङ येसुहेङ प्राधान पुजारि हिअ्हि, “हाइ नाअ् परमेस्वरको चान ख्रिस्ट दोङ हिना जाइको केलाइ आराधाना पालि?”

⁶² येसु दोअ्हि, “एइ का दोङ कालाउ नेलाइ का द्‍याङको चानहेङ सरबुङसाइका परमेस्वरको दाम्पाहा सिङहासनता योम्तेङ हिका नेलाइ स्वर्गता तिङस्वाना। कालाउ आकास ह्रुता सरबुङता लोकाताङ पाका बुङ तिङस्वाना।”

⁶³ प्राधान पुजारि ताइको धाबा थेअ्तेङ दोअ्हि, “भेनेङ साक्सि केलाइहेङ मागोयाङ, इदोइ झोकोनु जेनाङ।

⁶⁴ नेलाइ परमेस्वरहेङ मन्दा माताका कालाउ मारेम्का काथा दोअ्काते हिङसुन्हा, एला नेलाइ हाइ दोस्वाना कुनु?” ओबालाइ झाराङ या द्‍याङ सिलि गोयाङ दोअ्हि।

⁶⁵ आधिमि द्‍याङगेलाइ थोअ्तेङ वाको मिसियाँ थुम्तेङ चाउरेहि। आधिमि खुजालाइतेङ दोअ्हि, “जेसापा नाअ् परमेस्वरको बक्तानु, दोअ् हासु नासेहेङ दानाइहि?” चाउघारा साअ्को पालेगेलाइबुङ वासेहेङ दानाइलि तेङहि।

पतरुसको इन्कार पाका

⁶⁶ पतरुस प्राधान पुजारिको साअ्को सालेङता हिलाउ एमि चाकारिया बेजान इन्ता लोहि।

⁶⁷ वा मे एम्तेङ हिका पतरुसहेङ तिङहि। वासेहेङ रेम्फा खाङतेङ दोअ्हि, नाअ् बुङ येसु नासरत दोफा हिघाना?

⁶⁸ पतरुस इसिका दोकाताङ, “माको दोअ्हि नाअ् हाइ दोअ्खेना का वाको मिङ हिङका बुङ मान्थुघा कालाउ नाल्का बुङ मान्थुघा” कालाउ पतरुस फिनुको भेरपा हानिहि। एन्सालाउ धाङगाइ किया ओहि।

⁶⁹ जाअ्कालाइ दोफा आरोङ इङको चाकारिया बेजान पतरुसहेङ तिङहि इङको आरोङ दोअ्लि तेङहि, “या बुङ येसुको सानाइति मध्येसो एमि हि।”

⁷⁰ पतरुस आरोङ का माको दोअ्हि। एघुरिङताङ इन्ता जाअ्तेङ हिकालाइ आरोङ पतरुसहेङ हिअ्हि, “जातिङ भारि नाअ् वाको सानाइति मध्ये एमि दोङ, हाइपालिपानु नाङको धुइका हिङतेङ लागिखे कि नाअ् गालिलिको द्‍याङ भाइका हिना।”

⁷¹ कालाउ पतरुस केरा चातेङ दोअ्हि, का धाताइकानु परमेस्वर कासेहेङ साजाइ प्याको का उङको द्‍याङहेङ मानाल्खा जाइको बारेता नेलाइ दोअ्सुखेना, हाइ पालि वाको बारेता कासेहेङ हिअ्सुखेना।

⁷² एन्सालाउ दोङ ह्रिमाको न्हेखे धाङगाइ ओहि, येसुको दोअ्का काथा पतरुसहेङ फोम लोहि, “नाअ् कासेहेङ न्हेखे धाङगाइ ओलि खान्तेङ लाम्फा सुम्खे वाको सानाइति का माको दोअ्ताना” इदोइ काथाहेङ फोम पातेङ पतरुस ताइमिहेङ मन थुर्पातेङ खारहि। हाइपालिपानु वा येसुहेङ इन्कार पाका हिघाहि।