मर्कुस 11 - Dhimal NT

यरुसेलेमता येसु लोका

¹ जेलाउ येसु कालाउ वाको चात्यागेलाइ यरुसेलेम सहरको भेरपाङ लोहि, इम्बालाइ बेथफागे कालाउ बेथानिया देराता लोहि। इदोइ देरा जैतुन तिकार भारि हिघाहि। इन्तासो येसु दोङ ताइको न्हेमि चात्यागेलाइहेङ एसा दोअ्तेङ दिङगिल्हि कि,

² “इङको भेरपाको देराता हानेसु, देराता दुल्नासाङ नेलाइ हेलाउ बुङ हासु बुङ माधोल्का गधाको एनोङ चान धेउका तिङस्वाना। इङकोहेङ खाइतेङ चुमासु।

³ जेसापा हासु बुङ, ‘हाइ पासुखेना दोअ्तेङ हिअ्नु?’ कालाउ एसापा दोअ्सु कि, ‘इङको केलाइको येसु प्रभुहेङ गोइका हि, इता वा धेमाङ पिगिल्लावा दोअ्तेङ दोअ्सु।’”

⁴ चात्यागेलाइ कालाउ गधाको चान एनोङ साअ्को फिनु आगा धेउतेङ ताअ्का निङहि, इङकोहेङ खाइलि तोम्हि।

⁵ भेरपाङ जातेङ हिका द्‍याङगेलाइ इम्बालाइहेङ हिअ्हि, “इदोइ गधाको चानहेङ खाइतेङ नेलाइ हाइ पासुखेना?”

⁶ येसु दोङ दोअ्का भाइपा चात्यागेलाइ जोबाफ पिहि कालाउ इन्ता द्‍याङगेलाइ गधाको चानहेङ चुम्पुलि पिहि।

⁷ उङको न्हेमि चात्यागेलाइ धाना गधाको चानहेङ येसुकोता चुमाहि, कालाउ ताइको लोखोन धाबागेलाइ वाको गान्धेता दाअ्पिहि, कालाउ इङको ह्रुता येसु धोल्हि।

⁸ येसु गधाता योम्तेङ यरुसेलेम सहर हानिकाताङ पालाउ हेन्जा द्‍याङगेलाइ ता-ताइको धाबागेलाइ खाइतेङ येसुको भाअ्सिङ दामाता दाअ्पिहि कालाउ आरोङ हेथेते चाहि वाको आदार पालि दामाता सिङको ल्हाफागेलाइ दाअ्पिहि, जाइहेङ ओबालाइ मिलिङ भारिसो पोतेङ चुमाका हिघाहि।

⁹ झाराङ ह्रिकाइकाताङ हिघाहि, “धन्य परमेस्वरको मिङको जय ज्याको।” इम्बालाइ मध्ये आधिमि द्‍याङगेलाइ येसुको आगाता तेगिल्तेङ हिघाहि कालाउ आधिमि वाको न्हु-न्हु तेगिल्घाखे।

¹⁰ परमेस्वरको आनुग्रह लोलि तोम्का सासन ह्रुता जेदोङ केलाइको पुर्खा राजा दाउदको सासनको आदार हि! परमेस्वर जाइ स्वर्गता हि, वाको जय ज्याको!

¹¹ येसु यरुसेलेम सहरता लोतेङ वा मुन्दिरता दुल्हि, कालाउ वा कोरपाहाङ मन लागाइतेङ गोताङ आमेने भारि खाङहि कालाउ आरोङ वा सहर लाअ्हि हाइपालिपानु हेन्जाङ बेला हानिलि दोका हिघाहि। कालाउ वा ताइको चात्यागेलाइ दोफा बेथानिया देरा भारि हानिहि।

येसु मुन्दिरहेङ सुद्द पाहि

¹² न्हु दिना ओबालाइ बेथानिया देरागेलाइ भारिसो घुरिलाउ येसु म्हितुहि।

¹³ कालाउ येसु दुरेसोङ एनोङ लाब्राको सिङ तिङहि। कालाउ फल सेका हिबे दोअ्तेङ खाङलि हानिलाउ इङको सिङता ल्हाफा खिनिङ तिङहि हाइपालिपानु लाब्राको सेका सोमोइ जेङका मान्थुघाहि।

¹⁴ कालाउ येसु इङको सिङहेङ दोअ्हि, “एलासो नाअ् हेलाउ बुङ फल मासेपाना।” कालाउ इदोइ काथा वाको चात्यागेलाइ हिङतेङ हिका हिघाहि।

¹⁵ कालाउ न्हुसो येसु कालाउ वाको चात्यागेलाइ यरुसेलेम सहरता थुकालाहि, कालाउ मुन्दिरको साअ्लेङता हानिहि। वा इम्बालाइहेङ इङको इलाकासो धाअ्कालाइतेङ ओल्लेपाहि। जेदोङ द्‍याङगेलाइ भोग पालिको भाअ्सिङ गपुस कालाउ आरु आमेने चोल्का पिअ्का काम पातेङ हिघाहि। कालाउ वा ताका सोका चाङ चाउकि बुङ तुपिगिल्हि। कालाउ वा बलि पालिको भाअ्सिङ कुर्जा पिअ्का इङको द्‍याङगेलाइको चाङ चाउकि तुगिल्पिहि।

¹⁶ कालाउ वा द्‍याङगेलाइहेङ आग्या पिहि कि नेलाइ मुन्दिरको साअ्लेङ भेरपाको थामेसो बाहार आमेनेगेलाइ माचुम्पुसु।

¹⁷ कालाउ वा द्‍याङगेलाइहेङ सिक्स्या पिकाताङ दोअ्हि, परमेस्वरको पबित्तरो धर्मसास्तरता इसिका लेखेका हि, कि काङको साअ् गोताङ जातिको द्‍याङगेलाइको भाअ्सिङ प्रार्थाना पाका साअ् दोअ्न्हाङ कालाउ नेलाइ यासिहेङ डाकागेलाइको आरडाङ बानाइसुखेना।

¹⁸ जेलाउ मुलि पुजारिगेलाइ कालाउ व्यवस्था धिरपाका द्‍याङगेलाइ हिङहि, कि येसु हाइ दोअ्हि कालाउ हाइ पाहि, इम्बालाइ वासेहेङ सेअ्लि दाउगेलाइ भोलि तेङहि। कालाउ येसुसो थिघाखे हाइपालिपानु द्‍याङगेलाइ येसुको सिक्स्याहेङ जेरगेलाइ मन्दा ताघाहि।

¹⁹ जेलाउ बेल्हाहि येसु कालाउ वाको चात्यागेलाइ सहर लाअ्तेङ बेथानिया देरा भारि हानिहि ओदोङ बेल्हाका पहरता जिम्लिको भाअ्सिङ हानिहि।

खाङधुरिको सरबुङ

²⁰ न्हु दिना एह्रिमाङ येसु कालाउ वाको चात्यागेलाइ यरुसेलेम सहर भारि हानिदोङघाहि, इम्बालाइ इन्ताङ लाब्राको सिङ तिङहि जाइ येसु साराप पिका हिघाहि। इङकोते जारिसुधाङ सेङलि दोका हिघाहि।

²¹ येसु इङको सिङहेङ दोअ्का काथा फोम पातेङ पतरुस वासेहेङ दोअ्हि, “खाङ गुरु ज्यु नाअ् दोङ एन्सा साराप पिका आन्जिरको सिङते सेङहि।”

²² कालाउ येसु चात्यागेलाइहेङ दोअ्हि, “परमेस्वर ह्रुता खाङधुरि पासु कि जेदोङ नाअ् ह्रेकाना इङको परमेस्वर पाखे।”

²³ का नेलाइहेङ जातिङ भारि दोअ्खा, हासु बुङ मनता आतुइसा बुङ साङखा मातासिङ ताइमि दोअ्का काथा पुरा जेङखे दोअ्तेङ परमेस्वरता खाङधुरि पातेङ इदोइ तिकारहेङ इतासो हानितेङ समुन्द्रता हुल दोअ्नु वाको दोअ्का इङको काथा परमेस्वर पुरा पाप्यावा।

²⁴ ओदोङ भाअ्सिङ का नेलाइहेङ दोअ्खा, नेलाइ प्रार्थाना पातेङ जेदोङ ह्रेस्वाना, का निङलि दोअ्होइका दोअ्तेङ खाङधुरि पासु कालाउ परमेस्वर नेलाइको ह्रेका आमेने प्यावा।

²⁵ एसापा नेलाइ जेलाउ प्रार्थाना पालि तोम्लाउ नेलाइको बोमि दोफा मारेम्का काथा हिनु वासेहेङ स्यामा पि। स्वर्गता हिका नेलाइको परमेस्वर आबा बुङ नेलाइको पापगेलाइ स्यामा पाप्यावा।

²⁶ कालाउ बो गेलाइहेङ स्यामा मापिस्वाना पानु स्वर्गता हिका नेलाइको परमेस्वर आबा बुङ नेलाइको पाप स्यामा माप्याङ।

येसुको खाबारा

²⁷ येसु ताइको चात्यागेलाइ दोफा आरोङ यरुसेलेम सहरता थुकालाहि। मुन्दिरता तेगिल्तेङ हिलाउ यहुदिको मुलि पुजारि, व्यवस्था धिरपाका द्‍याङगेलाइ कालाउ आरोङ यहुदि आगुवागेलाइ वाकोता लोहि।

²⁸ इम्बालाइ येसुहेङ हिअ्हि, “नाअ् इदोइ कामगेलाइ हिदोइ खाबाराहोइ पाखेना, नाअ् दोफा हाइ खाबारा हि?” हासु नासेहेङ इसिका खाबारादोफाङ दिङगिल्हि?

²⁹ येसु जोबाफ पिहि, “का बुङ नेलाइहेङ एनोङ काथा हिअ्लि मन पाखा, जेसापा नेलाइ कासेहेङ जोबाफ पिसुना पानु, का हिदोइ खाबारासो इदोइ कामगेलाइ पादोङखा, दोअ्तेङ दोअ्ताङका

³⁰ युहान्‍ना द्‍याङगेलाइहेङ बप्तिस्ता पिका खाबारा स्वर्गको परमेस्वर पाहासो ना द्‍याङगेलाइ पाहासो लोहि? कासेहेङ दोअ्सु।”

³¹ जेलाउ इम्बालाइ ता-ताइमिता नाइसुलि तेङसुहि कालाउ दोअ्हि, जेसापा केलाइ स्वर्गको परमेस्वर पाहासो दोअ्नु वा दोङ केलाइहेङ हिअ्तावा आरोङ “नेलाइ हाइ पालि वाको ह्रुता खाङधुरि मापासुन्हा?”

³² कालाउ जेसापा केलाइ इङको द्‍याङगेलाइ पाहासो दोङ दोअ्नु, कालाउ केलाइहेङ द्‍याङगेलाइ सेअ्ताङबे दोअ्तेङ थिनाखे, कि हाइपालिपानु झाराङ द्‍याङगेलाइ युहान्नाहेङ परमेस्वरको सत्ये बक्ता मानिखे।

³³ कालाउ न्हुसो इम्बालाइ येसुहेङ जोबाफ पिहि, “केलाइहेङ फोम मान्थु।” कालाउ येसु दोअ्हि, “का बुङ हिदोइ खाबाराहोइ इदोइ कामगेलाइ पादोङखा इदोइ नेलाइहेङ मादोअ्ताङका।”