मत्‍ति 8 - Dhimal NT

रोग्या खोअ्का एल्हि

¹ जेलाउ वा तिकारसो लेता खुअ्हि कालाउ हेन्जा द्‍याङगेलाइ येसुहेङ लेसारा पिताइहि।

² एन्सालाउ एमि दुन्दिया रोग्या येसुकोता लोतेङ कालाउ वा तुघुरतेङ दोअ्हि, हे प्रभु, नाअ् मन पानु कासेहेङ एल्पालि द्वाना।

³ येसु उङको द्‍याङहेङ खुर चातेङ दोअ्हि, “का मन पाखा, नाअ् एल कालाउ ओदोङ घुरि वाको दुन्दिया रोग्या खोअ्का एलहि।”

⁴ कालाउ येसु वासेहेङ दोअ्हि, “हासुहेङ बुङ माअ्दो, हाने मुलि यहुदि पुजारिगेलाइकोता तिङपा कालाउ मोसाको आग्या आन्सार पाका भेति चढाइ, कालाउ द्‍याङगेलाइहेङ प्रमानित ज्याको।”

कप्तानको खाङधुरि

⁵ जेलाउ येसु कर्फनहुम सहरता लोलाउ एमि रोमि कप्तान वाकोता लोतेङ येसु दोफा बिन्ति पाहि, कि कासेहेङ साघाइ।

⁶ हे प्रभु, काङको चाकारिया गाइल्हि खोअ्तेङ साअ्ता सिधाउ जेङतेङ हि। कालाउ वासेहेङ हेन्जा तुका हि।

⁷ येसु वासेहेङ दोअ्हि, का साअ्ता लोतेङ वासेहेङ एल्पाङका।

⁸ कालाउ रोमि कप्तान दोअ्हि, हे प्रभु, नासेहेङ काङको साअ्ता स्‍वागत पालि का सोबाइका मान्थुघा। भरु बचन खिनिङ दोअ्पि कालाउ काङको चाकारिया एनाङ दोङ एलाङ (या एसा दोअ्हि हाइपालिपानु वा गैर-यहुदि हिघाहि)।

⁹ इदोइ का गिखा, कि हाइपालिपानु का बुङ बारका आधिकारिगेलाइको खाबाराता हिघा। कालाउ काङको खाबाराता सेना हि। का एमिहेङ हाने दोअ्खा कालाउ वा हानिखे, कालाउ भेनेङहेङ लौउ दोनु कालाउ वा लोखे। काङको चाकारियाहेङ एसा पाअ्‌ दोअ्खा कालाउ वा पाखे।

¹⁰ वाको काथा हिङतेङ येसु आवाइ तुअ्हि, कालाउ ताइको दोफा लोकालाइहेङ दोअ्हि, का जातिङ भारि नेलाइहेङ दोअ्खा, इस्राएल सारभिता बुङ इदोइ झोको बारका खाङधुरि तिङका मान्थुघा जेदोङ इदोइ गैर-यहुदिकोता हि।

¹¹ जातिङ भारि का नेलाइहेङ दोअ्खा, “नुहे कालाउ दिहेसो हेन्जा गैर-यहुदिगेलाइ परमेस्वरको सासनता ल्वाङ कालाउ आब्राहाम, इसाहाक, कालाउ याकुब दोफा चालि योमावा।

¹² कालाउ परमेस्वरको सासनता हिलि गोइका इस्राएललिगेलाइ चाहि बाहार कितिकितिकाता थाइगिल्न्हाङ। कालाउ इन्ता इम्बालाइ जिउधाइ ल्होपाङ खाराङ कालाउ तासिङ जिताङ।”

¹³ जेलाउ येसु उङको रोमि कप्तानहेङ दोअ्हि, नाङको सिता हाने, “नादोङ जेसाङ खाङधुरि पाना, एन्साङ जेनाङ।” कालाउ कोकोङ पहर कप्तानको चाकारिया एल्हि।

मासाधेकालाइ एल्हि

¹⁴ येसु पतरुसको साअ्ता हानिहि। इन्ता पतरुसको जुबेहेङ येसु ओसारापाङ मिसासो ल्होलि मादोका कालाउ चौकिता उन्धितेङ हिका तिङहि।

¹⁵ कालाउ येसु वाको खुर साइहि, एन्सालाउ दोङ वा मिसासो एल्हि। कालाउ ल्होहि वा वासेहेङ साम्हेर्लि तेङहि।

¹⁶ कालाउ बेल्हाका पहर, द्‍याङगेलाइ भुत-आत्मा धेलकालाइहेङ येसुकोता चुमाहि। कालाउ येसु भुत-आत्मागेलाइहेङ दिगिल्हि, जाइ-जाइ मासाधिका हिघाहि। उङको झाराङहेङ एल्पा पिहि।

¹⁷ यासाइया परमेस्वरको बक्ता दोअ्का गोताङ काथा येसु पुरा पाहि, “वा केलाइको कमजोरिगेलाइ लापापिहि, कालाउ केलाइको बेथागेलाइ वा दोङ चुम्पुहि।”

चात्यागेलाइ तिरिलि गोइका मोल

¹⁸ येसु ताइको कोरपाहाङ बारका द्‍याङगेलाइको जेर तिङतेङ ताइको चात्यागेलाइहेङ आदेस पिहि, लोसु केलाइ गालिल समुन्द्रको ओदोइ पार हानाइने।

¹⁹ जेलाउ इम्बालाइ हानिलिको भाअ्सिङ तियार जेङहि, एन्सालाउ दोङ एमि व्यवस्था धिरपाका द्‍याङ वाकोता लोहि कालाउ दोअ्हि, “हे गुरु ज्यु, नाअ् जेता हानाना, का बुङ नाङको चात्या जेङलि हानाङका।”

²⁰ येसु वासेहेङ दोअ्हि, “स्याइलेगेलाइको हिका घारा हि, आकासता हिका जिहाँ-जुइलेङको हिका भाअ्सा हि, कालाउ का द्‍याङको चानको भाअ्सिङ ते एनोङ बुङ साअ् मान्थु जेता का जिम्लि द्वाको।”

²¹ कालाउ चात्यागेलाइ मध्येसो एमि दोअ्हि, “हे प्रभु, कासेहेङ लाम्फा साअ्ता हानितेङ काङको आबाको सिका जिउहेङ लिअ्लि पि, कालाउ न्हुसो का लोतेङ नाङको चात्या जेनाङका।”

²² येसु उङको द्‍याङहेङ दोअ्हि, “का दोफा लौउ कालाउ काङको चात्या जेङ जेदोङ द्‍याङगेलाइ आत्माता सिका हि, इम्बालाइहेङ ताइको सिकालाइहेङ लिइलि पिसु।”

येसु दुमभेरमाहेङ गाम्पाहि

²³ येसु नाउता धोल्लि दोतेङ, वाको चात्यागेलाइ दोफाङ हानिहि।

²⁴ जेलाउ नाउ समुन्द्रता हानिकाताङ पालाउ थाहा मागिसिङ एन्सालाउ दोङ बारका दुम भेर्मा लोहि। उल्लाउ-उल्लाउपा बाने लोनाङ नाउ बुङ दुबिलि तोम्हि। कालाउ चि बुङ नाउता पोङघालि तोम्हि। येसु चाहि जिम्तेङ हिघाहि।

²⁵ चात्यागेलाइ ल्होतेङ येसुहेङ इसिका दोअ्तेङ ल्होपाहि, “प्रभु! केलाइहेङ बान्चिपा केलाइ वाङलि तोम्न्हाहोइ।”

²⁶ येसु इम्बालाइहेङ दोअ्हि, “नेलाइ हाइ पालि एसापा थिसुखेना?” हाइ नेलाइता इङको झोको बुङ खाङधुरि मान्थु। कालाउ येसु भेरमा कालाउ उल्लाउ-उल्लाउका बानेहेङ दोअ्हि भेरमा सिकापा गाङ, कालाउ गाङहि कालाउ भेरमा चाकामान्दा जेङहि।

²⁷ गोताङ द्‍याङगेलाइ भाङ-भाङहि। कालाउ ओबालाइ दोअ्हि, याते हिसिका द्‍याङ, हाइपालिपानु भेरमा कालाउ समुन्द्र बुङ याको काथा साअ्खे।

भुत धेल्का न्हेमि द्याङ

²⁸ जेलाउ येसु ओदोइ पार गदरिनिगेलाइको मुलुकता लोहि, कालाउ भुत-आत्मा धेल्का न्हेमि द्‍याङ तोमसो लोकाताङ पालाउ येसुहेङ दुसुहि। इम्बालाइ इसिका थिलि गोइका द्‍याङ हिघाहि, हासु बुङ इन्तासो हानेलि कालाउ लोलि मादोघाखे।

²⁹ इम्बालाइ येसुकोता हानितेङ बारका गालाहोइ ह्रिकाइतेङ दोअ्हि, “सरबुङसाइका परमेस्वरको चान, नाङको कालाउ केलाइ दोफा हाइ सरोकार हि रो?” केलाइको बेला माजेङसिङ केलाइहेङ दन्ड पिलि नाअ् इता लोन्हा?

³⁰ आसा दुरे पायाको ए हुल दुगिल्घाखे। कालाउ भुत-आत्मागेलाइ येसुहेङ बिन्ति पातेङ दोअ्हि, केलाइहेङ ओल्लेपालि खाङन्हा पानु, इङको पायागेलाइ लिता दुल्लि आग्या पि।

³¹ कालाउ येसु बुङ भुत-आत्मागेलाइहेङ पायागेलाइ लिता दुल्लि दोअ्तेङ आग्या पिहि।

³² कालाउ भुत-आत्मागेलाइ ओल्लेतेङ पायागेलाइ लिता दुल्हि, कालाउ पायाको गोताङ जेर तिकारसो धाअ्सिकाताङ समुन्द्रता वाङतेङ सिहि। इङको हुलता लगभग न्हे हाजार पायागेलाइ हिघाहि।

³³ कालाउ पाया घोकालाइ खाअ्हि, कालाउ सहर भारि हानितेङ गोताङ काथा कालाउ इङको भुत-आत्मा धेल्काहेङ हाइ जेङहि गोताङ हिङपाहि।

³⁴ कालाउ सहरको गोताङ द्‍याङगेलाइ ओल्लेतेङ येसुहेङ खाङलि ल्होहि, कालाउ द्‍याङगेलाइ येसुहेङ तिङहि। कालाउ ओबालाइ इङको मुलुकसो नाअ् हाने दोअ्तेङ येसुहेङ सेउपालि तेङहि।