मत्‍ति 4 - Dhimal NT

साइतानसो येसुहेङ जाचियाको

¹ कालाउ पबित्तरो आत्मासो येसुहेङ चाका-मान्दा थामेता चुम्पुहि, कालाउकि साइतानसो येसुहेङ जाचियाको।

² येसु न्हे कुरि दिना कालाउ न्हे कुरि न्हिसिन थेकापा हाइ बुङ माचाहि, ओदोङ भाअ्सिङ वा ओसारापाङ म्हितुहि।

³ जेलाउ साइतान वाकोता लोतेङ दोअ्हि, नाअ् परमेस्वरको चान हिना पानु इदोइ उन्ठुइगेलाइहेङ तोले जेनाको दोअ्तेङ आग्या पितेङ प्रामानित पाअ्‌, कालाउ नाअ् इङको तोले चालि द्वाना।

⁴ कालाउ येसु साइतानहेङ जोबाफ पिहि, “धर्मसास्तरता एसा बुङ लेखेका हि, ‘द्‍याङ तोलेहोइ खिनिङ माको, भरु परमेस्वर दोङ दोअ्का गोताङ बचन केम्तेङ सिन्हुतेङ हिलि द्वाङ।’”

⁵ कालाउ न्हुसो साइतान येसुहेङ पबित्तरो सहर यरुसेलेमता चुम्पुतेङ मुन्दिरको टुप्पाता जाअ्पाहि,

⁶ कालाउ येसुहेङ दोअ्हि, “नाअ् परमेस्वरको चान हिना पानु, इतासो लेता धाअ्सितेङ प्रमानित पाअ्‌, कि नासेहेङ चोट मालागियाङ, हाइपालिपानु धर्मसास्तरता लेखेका हि, ‘वा दोङ ताइको स्वर्गदुतगेलाइको जिम्माता नासेहेङ प्यावा, कालाउ ओबालाइ दोङ नासेहेङ ताइको खुर-खुरता खोअ्तावा, माकुनुते नाङको खोकोइ उन्ठुइता थुन्हावा।’”

⁷ येसु साइतानहेङ दोअ्हि, “धर्मसास्तरता इदोइ बुङ लेखेका हि, ‘नाअ् प्रभु नेलाइको परमेस्वर ताइमिहेङ प्रमानित पालि माग मापासु।’”

⁸ आरोङ साइतान येसुहेङ एनोङ झाउका राता चुम्पुहि, “कालाउ गोताङ सुमिङको राइजिगेलाइ कालाउ धन-सम्पति तिङपातेङ दोअ्हि,

⁹ जेसापा नाअ् दोङ कासेहेङ तुघुरतेङ आराधाना पान्हा पानु, कालाउ का नासेहेङ इदोइ गोताङ आनेमाने प्याङका।”

¹⁰ जेलाउ येसु साइतानहेङ दोअ्हि, “साइतान, इतासो हाने! हाइपालिपानु धर्मसास्तरता इसिका लेखेका हि।” नाअ् दोङ परमप्रभु ताइको परमेस्वरहेङ खिनिङ तुघुरतेङ आराधाना पालि कालाउ वाको खिनिङ सेवा पालि।

¹¹ कालाउ साइतान येसुहेङ लाअ्तेङ हानिहि, कालाउ स्वर्गदुतगेलाइ लोतेङ येसुको सेवा पाहि।

येसु गालिल जिल्लाता ताइको काम पालि तेङका

¹² जेलाउ येसु या हिङहि कि बप्तिस्ता पिका युहान्नाहेङ झ्यालखानाता ताअ्का हि, वा यहुदिया जिल्लाहेङ लाअ्तेङ गालिल जिल्लाता हानिहि।

¹³ येसु नासरत देरा लाअ्तेङ कर्फनहुम सहरता हानितेङ इन्ताङ बासा हिलि तेङहि। कर्फनहुम सहर चाहि गालिल समुन्द्रको काम्भेता परिखे, जेता जाबुलुन कालाउ नाप्तालिको कुल इन्ता हिघाखे।

¹⁴ एसापा यासाइया परमेस्वरको बक्ताको दोअ्का काथा पुरा जेङहि।

¹⁵ नेलाइ जाइ जाबुलुन कुलको इलाकाता कालाउ नाप्तालि कुलको थामेता हिसुखेना, जाइ चाहि इङको दामाता हि जाइ गालिल समुन्द्रको चेम्ताङ कालाउ यर्दन झोराको नुहेपाहाको काम्भेता हि।

¹⁶ जाइ परमेस्वरहेङ मानाल्तेङ कितिकितिकाता हिकालाइ एनोङ बार्का फाइसालामका तिनावा। इदोइ फाइसालामका दोङ उङको द्‍याङगेलाइहेङ मुक्तिको दामा तिम्पावा, जाइ परमेस्वरहेङ मानाल्तेङ जिबन बितिपाखे, कालाउ जेलाउलाउको भाअ्सिङ सिकाको साजाइ जेनाङ।

¹⁷ इङको बेलासो येसु प्राचार पाकाताङ दोअ्हि, पाप पालि लाअ्सु परमेस्वर भारि घुरिसु, हाइपालिपानु परमेस्वरको सासन चेम्ताङ लोका हि।

येसु हाया माङकालाइहेङ काइहि

¹⁸ गालिल समुन्द्रको आलि-आलि हानिकाताङ पालाउ वा पतरुस दोअ्का सिमोन कालाउ वाको ओने आन्द्रियास, न्हेमि दादा ओने दोङ समुन्द्रता जाले आकाताङ पाका तिङहि। इम्बालाइ हाया माङकालाइ हिघाहि।

¹⁹ येसु इम्बालाइहेङ दोअ्हि, “का दोफा लोसु कालाउ काङको चात्या जेङसु का नेलाइहेङ धिरपाङका कि हेसा द्‍याङगेलाइ कासेहेङ खाङधुरि पाका बानाइलि।”

²⁰ सिमोन कालाउ आन्द्रिरियास एन्सालाउ दोङ ताइको जाले लाअ्तेङ येसुको चात्या जेङलि येसु दोफा हानिहि।

²¹ इन्तासो हानिकाताङ पालाउ वा जब्दियाको न्हेमि चान याकुब, कालाउ वाको ओने युहान्नाहेङ, ओबालाइको आबा जब्दिया, दोफाङ नाउ ह्रुता ताइको आउलिका जाले लाअ्पाकाताङ पाका तिङहि, कालाउ येसु इम्बालाइहेङ काइहि।

²² कालाउ ओबालाइ ओदोङ घुरि नाउ कालाउ आबाहेङ सिधितेङ येसु दोफा हानिलि तेङहि।

येसुको सिक्स्या कालाउ एल्पाका

²³ येसु गालिल जिल्लाको गोताङ थामे भारि घुराइगिल्हि, कालाउ थामे-थामेता हिका यहुदिगेलाइको चाउघारा साअ्गेलाइता परमेस्वरको सासन लोलि तोम्होइ दोअ्तेङ सुसमाचार हिङपाहि कालाउ गोताङ खाल्को मासाधेका मिसा लोकालाइहेङ एल्पाहि।

²⁴ कालाउ सिरिया प्रदेसको गालिल जिल्लाको माहे भारि हिघाहि, जेता येसुको बारेता चार-चाराइहि। कालाउ द्‍याङगेलाइ गोताङ खाल्को मिसा लोकालाइहेङ कालाउ दुखता परिकालाइहेङ वाकोता चुमाहि। इम्बालाइ मध्ये आधिमिहेङ भुत-आत्मा धेल्का हिघाहि, आधिमि झाका लोङका बेथा खोअ्का हिघाहि कालाउ आधिमि चाहि गाइल्हि खोअ्का हिघाहि। कालाउ येसु दोङ झाराङहेङ एल्पाहि।

²⁵ कालाउ हेन्जा द्‍याङगेलाइ येसुहेङ पिताइहि। उङको द्‍याङगेलाइ गालिल जिल्ला, डेकापोलोस इलाका कालाउ यरुसेलेम सहर, यहुदिया जिल्ला, कालाउ यर्दन झोराको ओदोइ पारिसो लोका हिघाहि।