मत्‍ति 3 - Dhimal NT

बप्तिस्ता पिका युहान्नाको सुसमाचार

¹ ओदोङ बेला बप्तिस्ता पिका युहान्‍ना यहुदिया जिल्लाको चाका-मान्दा थामेता हानितेङ एसा दोअ्तेङ प्रचार पालि तेङहि,

² “पाप पालि लाअ्सु, हाइपालिपानु परमेस्वरको सासन चेम्ताङ लोका हि।”

³ जाइको बिसोइता यासाइया परमेस्वरको बक्ता एसा दोअ्हि, “हिङसु, एमि द्‍याङको ह्रिकाइका गाला चाका-मान्दा थामेता, प्रभुको लोलि खाङका दामा बानाइसु, कालाउ वाको दामा सिधा बानाइसु।”

⁴ युहान्‍ना उटको मुइसासो थिर्का धाबा होङघाहि, केङखेनेता धालेको तेपाना तेअ्घाहि, कालाउ झारभारिको जिराम बाय्हाँको दिमाइगेलाइ चाघाहि।

⁵ यरुसेलेम सहर कालाउ गोताङ यहुदिया जिल्ला कालाउ यर्दन झोराको करपाहाङसो चाका-मान्दा थामेता गोताङ द्‍याङगेलाइ वाको दोफा लोहि,

⁶ कालाउ ओबालाइता-ताइको पाप मानितेङ यर्दन झोराता वाकोसो बप्तिस्ता हुलि तेङहि।

⁷ कालाउ न्हुसो हेन्जा फारिसिगेलाइ कालाउ सदुकिगेलाइ माझासो बप्तिस्ता ह्रुलि लोका तिङतेङ वा ओबालाइहेङ दोअ्हि, ओइ बिस हिका पुय्याँको चान भाइका, परमेस्वरको पालि खाङका न्यायसो खाअ्लि हासु नेलाइहेङ धिर्पाहि?

⁸ ओदोङ भाअ्सिङ पाप पालि लाअ्सु कालाउ सोबाइका काम पासु।

⁹ केलाइको आबा आब्राहाम दोङ दोअ्तेङ ता-ताइमिता मादोअ्सु, हाइपालिपानु का नेलाइहेङ दोअ्खा, परमेस्वर इङको उन्ठुइगेलाइसो आब्राहामको भाअ्सिङ चान-चामिन्दि, बानाइपिलि द्वावा।

¹⁰ कालाउ परमेस्वर झाराङको न्याय पालि तियार हि, जाइ दोङ पाप पालि मालाखे, ठिक एन्साङ पाअ्तेङ दुफे हिका द्‍याङ इङको सिङको जारिहेङ पाल्लि तियार हि, जेदोङ रेम्का फल मासेखे।

¹¹ नेलाइहेङ का ते दोअ्खा पाप पालि लाअ्सु कालाउ का चिको बप्तिस्ता प्याङका, का न्हुसो जाइ एमि ल्वाङ, वा का खान्तेङ हेन्जा माहान हि, कालाउ का वाको खोकोइको जुत्ता बुङ चुम्लि सोबाइका मान्थुघा। एला वा दोङ नेलाइहेङ पबित्तरो आत्मा कालाउ मेको बप्तिस्ता प्यावा।

¹² सिसा फाचिका रा वाकोङ खुरता हि, कालाउ ताइको खाइरामहेङ रेम्फा जाहाँपा फेकाङ कालाउ ताइको से उम फासितेङ भाकारता जोम्पावा, कालाउ पिताना चाहि हेलाउ बुङ मासिका मेता दुकावा।

येसुको बप्तिस्ता

¹³ इङको सोमोइ येसु गालिल जिल्लासो युहान्नाकोता वाको पाहासो बप्तिस्ता ह्रुलि यर्दन झोराता लोहि।

¹⁴ कालाउ युहान्‍ना एसा दोअ्तेङ वासेहेङ रोकिलि खाङघाखे, “भरु कासेहेङ कि नाङकोसो बप्तिस्ता ह्रुलि गोइका हि, नाअ् दोङ काङको दोफा लोन्हा?”

¹⁵ कालाउ येसु वासेहेङ दोअ्हि, “एलाङ एसाङ दोङ हिलि पि हाइपालिपानु परमेस्वरको गोताङ धार्मिकता पुरा पालि गोयाङ कालाउ युहान्‍ना राजि जेङहि।”

¹⁶ कालाउ येसु बप्तिस्ता ह्रुतेङ ओदोङ घुरि चिसो ओल्लेतेसाङ आकास फाङगिल्हि, कालाउ ताइ ह्रुता परमेस्वरको आत्माहेङ कुर्जा भाइपा खुअ्काताङ पाका तिङहि।

¹⁷ कालाउ आकाससो परमेस्वरको इसिका एनोङ गाला लोहि, या काङको मायारु चान का वाको दोफा लेङचाका हिघा।